Házirgi kúnlerde orınlarda Oliy Majlis Nızamshılıq palatasınıń deputatları ózleri saylanǵan aymaqlarda ushırasıwlar ótkermekte. Nızamshılıq palatasınıń deputatı Gúljan Xalmuratovanıń saylawshılar menen ushırasıwınıń gezektegisi eń shetki rayonlardıń biri Qońırat rayonında shólkemlestirildi. Xalıq wákili dáslep rayondaǵı Qańlı awıl puqaralar jıyınında kóp jıllardan berli fermerlik penen shuǵıllanıp kiyatırǵan “Adil-K” fermer xojalıǵında boldı.

Deputat sońǵı jılları mámleketimizde barlıq tarawlar sıyaqlı fermerlikti rawajlandırıw, olardı hár tárepleme qollap-quwatlaw baǵdarında sistemalı jumıslardıń ámelge asırılıp atırǵanın atap ótip, fermerdiń jumısları menen qızıqtı. Fermerge tiyisli jerdiń ulıwma maydanı 61 gektar bolsa, sonıń 52 gektarına paxta egilgen. Xojalıq tiykarınan paxtashılıqqa qánigelestirilgen. Xalıq wákili fermerdiń usınıs hám mashqalaları, keleshektegi rejeleri menen ortaqlastı. Deputat usı máhálle jetekshileri menen de sóylesip, olardıń jumısların úyrendi.
Danıshpan xalqımız qıytaq jer – jeti ǵáziyneniń biri ekenin ańlaǵanı ushın onıń hár bir qarıs jerinen utımlı paydalana alǵan. Qańlı awıl puqaralar jıyınınıń geografiyalıq jaylasıwı, topıraqtıń ónimdarlıǵı, qalaberse, aymaq turǵınlarınıń jerdiń tilin túsinip, hár qıylı eginlerden mol ónim alıwdıń usılın biliwi jıldıń tórt máwsiminde de diyqanshılıq etiwge imkaniyat beredi. Ázelden baǵmanlar eli bolǵan bul awıl xalqı qıytaq jerlerinen únemli paydalanıp kelmekte. Xalıq wákili ushırasıw dawamında usı máhállede jasawshı D.Sadikov hám S.Qalbaevalardıń shańaraǵında bolıp, olar menen sáwbetlesti. Qıytaq jer iyeleri diyqanshılıq, sharwashılıq, baǵshılıq penen kóp jıllardan berli shuǵıllanıp kiyatırǵan eken. Qıytaq jer – dáramat dáregi ekenligin shańaraq iyeleri ózleriniń balalarına, kelinlerine hám aqlıqlarına ata kásip etip úyretip kiyatırǵanlıǵın atap ótti.
Xalıq wákiliniń ushırasıwı orınlarda dawam etip, deputat Qanlıkól rayonındaǵı iri isbilermenlik subektinde de boldı. Deputat usı rayondaǵı “LAN-G” juwapkershiligi sheklengen jámiyetiniń jumısı menen jaqınnan tanıstı. Bul kárxana 2020-jıldan berli ónim islep shıǵarıwdı baslaǵan. Onda boyan tamırınıń shiresi alınıp, keptirilip, Yaponiya, Koreya, Franciya mámleketlerine eksport etilmekte. Kárxana texnologiyaları Qıtay mámleketinde islep shıǵarılǵan bolıp, boyan tamırı tórt basqıshta qayta islenip, yarım tayar ónim halında shıǵarılmaqta. Kárxanada jumısshılar ushın barlıq qolaylı sharayatlar jaratılǵan, miynet haqıları óz waqtında tólenip, bos waqıtlarında sport penen shuǵıllanıwı ushın sport maydanshası, bilyard zalı bar.
Deputat G.Xalmuratova kárxanada alıp barılıp atırǵan jumıslardı, jumısshılardıń boyan tamırın kesiw, tazalaw processlerin kózden ótkerip olar menen de sáwbetlesti, pikirlerin tıńladı. Sóylesiw dawamında deputat rayonnıń sociallıq-ekonomikalıq jaqtan rawajlanıwında iri kárxanalardıń iske qosılıwı xalıqtıń bántligin támiyinlew menen birge xalqımızdıń abadanlıǵın arttırıwǵa xızmet etetuǵının atap ótti.
27-iyun – Baspasóz hám ǵalaba xabar quralları xızmetkerleri kúni bayramı múnásibeti menen deputat Guljan Xalmuratova orınlarda usı taraw wákilleri menen de ushırasıp, Minnetdarshılıq xatı hám bayram sawǵaların tapsırdı.

Qaraqalpaqstan xabar agentligi.