Tórtkúl rayonında Baspasóz hám ǵalaba xabar quralları xızmetkerleri kúni múnásibeti menen bayram ilajı bolıp ótti. Ilajda rayon hákimi I.Xudaybergenov qatnasıp, taraw xızmetkerlerin kásiplik bayramı menen qızǵın qutlıqladı.

Bul ilaj dógerek sáwbeti túrinde ótkerildi. Rayon hákimi baspasóz hám ǴXQ xızmetkerleriniń jámiyettegi ornın ayrıqsha atap ótip, olardıń xalıqqa málimleme jetkeriw, jámiyette ashıq-aydınlıqtı támiyinlew hám rawajlanıwǵa qosqan úleslerin joqarı bahaladı. Hákim, sonday-aq, jurnalist hám dóretiwshilerdiń jumısına minnetdarshılıq bildirdi.
Rayon hákimligi Málimleme xızmeti bóliminiń maǵlıwmatına bola, ilaj sońında taraw wákilleri hám nuranıy miynet veteranları hákimlik tárepinen estelik sawǵaları hám minnetdarshılıq xatları menen sıylıqlandı. Qızǵın ortalıqta ótken sáwbet jurnalist hám dóretiwshilerge jańa temalar hám ilham dáregi boldı.
Bunday ilajlar baspasóz xızmetkerleriniń jumısın jáne de xoshametlewde úlken áhmiyetke iye.
Baspasóz hám ǵalaba xabar quralları xızmetkerleri kúni hár jılı 27-iyunde keńnen belgilenip, jurnalistler jámiyetlik turmısta haqıyqattı sáwlelendiriwshi, xalıq penen mámleket arasında kópir wazıypasın atqarıwshı shaxslar sıpatında tán alınadı. Ótkerilgen bul bayram ilajı da áne, usınday áhmiyetli wazıypalardı jáne bir márte eske saldı hám jurnalistlik jumıstı bunnan bılay da rawajlandırıwǵa qaratılǵan baǵdarlamalardı ámelge asırıwda úlken ruwxlanıw hám ilham dáregi boldı.

Qaraqalpaqstan xabar agentligi