27-iyun – Baspasóz hám ǵalaba xabar quralları xızmetkerleri kúni múnásibeti menen Qaraqalpaqstan Respublikası Pedagogikalıq sheberlik orayında da taraw wákilleriniń qatnasıwında bayram keshesi shólkemlestirildi.

Ilajda oray direktorı V.Bekmuratova barlıq jurnalistler hám málimleme tarawı xızmetkerlerin kásiplik bayramı menen qızǵın qutlıqlap, jurnalistlerdiń jumısınıń búgingi jámiyettegi ornı hám áhmiyetin ayrıqsha atap ótti.
Atap ótilgenindey, ǵalaba xabar qurallarınıń miyneti arqalı jámiyette sóz erkinligi, ashıq-aydınlıq sıyaqlı demokratiyalıq qádiriyatlar bekkemlenbekte. Jurnalistlerdiń málimleme tarawındaǵı konstituciyalıq huqıqtı támiyinlew, xalıqqa haqıyqıy hám operativ málimleme jetkeriw baǵdarındaǵı pidayılıǵı maqtawǵa ılayıq. Búgingi kúnde mámleketlik hám jámiyetlik basqarıwda ashıq-aydınlıq principleriniń engiziliwinde olardıń ornı ayrıqsha.
Ushırasıw sońında oray menen birge islesip, bul jerde ámelge asırılıp atırǵan jumıslardı keńnen sáwlelendiriwde belsendilik kórsetip kiyatırǵan bir topar taraw xızmetkerlerine minnetdarshılıq xatı hám estelik sawǵaları tapsırıldı.

Qaraqalpaqstan xabar agentligi.