Gazeta hám jurnallar, kúndelikli basılımlar, telekórsetiwler hám radioesittiriwler qalay tayarlanadı? Olardıń artında kimlerdiń mashaqatlı miynetleri jámlengen?

Tashkent Fotosúwretler úyinde 27-iyun – Baspasóz hám ǵalaba xabar quralları xızmetkerleri kúni múnásibeti menen Ózbekstan Kórkem óner akademiyası, Ózbekstan Respublikası Ádillik ministrligi janındaǵı “Ózarxiv” agentligi, Ózbekstan Milliy málimleme agentligi, Ózbekstan Kinofotofono hújjetleri milliy agentligi, Tashkent Fotosúwretler úyi menen birgelikte “Ózbekstan baspasózi arxiv hújjetlerinde” atamasındaǵı kórgizbede áne usı sorawlarǵa tolıq juwap alıw imkaniyatı bar.
Ilajda milliy baspasózimizge kórsetilip atırǵan itibar jurnalistlerdi jáne de úlken juwapkershilik hám pidayılıq penen miynet etiwge shaqırıp atırǵanı atap ótildi.
Bul kórgizbede Ózbekstan Kinofotofono hújjetleri milliy arxivinde saqlanıp atırǵan 1928-2021-jıllarǵa baylanıslı súwretler jáne Ózbekstan Milliy málimleme agentligi tárepinen usınılǵan elimizdiń baspasóz hám ǵalaba xabar qurallarınıń rawajlanıwın sáwlelendiriwshi 150 den aslam foto hújjetler kórsetilmekte.
Kórgizbede kúndelikli basılımlarda ótkerilgen dóretiwshilik ushırasıwlar, sóylesiwler, qızǵın miynet processleri, baspaxanalardıń jumısı, intervyu hám sáwbetler, respublikalıq oraylıq hám aymaqlıq, jergilikli gazeta hám jurnallar, teleradiostudiyalardıń jumıs processleri, media materiallar ústinde jumıs alıp barıw, xabarshılar, baspalar, poligrafshılardıń mashaqatlı jumısı fotosúwretlerde sáwlelendirilgen. Sonıń menen birge, bul jerde teleradio tarawınıń pidayı xızmetkerleriniń miyneti menen de hár qıylı fotosúwretler arqalı tanısıw múmkin.
Bul kórgizbe arqalı milliy baspasózimiz mashaqatlı hám tabıslı jollardı basıp ótkenine jáne bir márte gúwa bolıw múmkin.

Nazokat Usmonova, Oybek Pardaev (foto), ÓzAnıń xabarshıları