Tórtkúl rayonındaǵı Shoraxan APJ aymaǵında jaylasqan “Aq kepter” jazǵı salamatlandırıw dem alıw orayında jaslar ushın ruwxıy-aǵartıwshılıq ilaj shólkemlestirildi.

Ilaj Respublika Ruwxıylıq hám aǵartıwshılıq orayınıń Tórtkúl rayonlıq bólimi hám rayonlıq Málimleme-kitapxana orayı menen birgelikte ótkerildi, – dep maǵlıwmat beredi rayon hákimliginiń Málimleme xızmeti bólimi.
Ilaj “Eń bilimli kitapqumar jaslar” súreni astında shólkemlestirilip, oqıwshılar arasında kitapqumarlıq boyınsha soraw-juwaplar ótkerildi. Sorawlarǵa durıs juwap bergen jaslarǵa minnetdarshılıq xatları hám kitaplar tapsırıldı.
Sonday-aq, balalardıń bos waqıtların mazmunlı ótkeriw, olardı hár qıylı kásip-ónerlerge qızıqtırıw maqsetinde “Bárkamal áwlad” balalar mektebi dógerek basshıları tárepinen “Shıǵıs bazarı” kórgizbeli ilajı da kórsetildi. Onda balalar ózleriniń qol miynetleri menen tayarlaǵan jumısların usındı.
Ilajǵa Qaraqalpaqstan Respublikası Joqarǵı Keńesiniń deputatı J.Settiev, Ózbekstan hám Qaraqalpaqstan Jazıwshılar awqamınıń aǵzası M.Yusupova, rayonlıq Málimleme-kitapxana orayınıń direktorı U.Matniyazov hám basqalar qatnastı.
Jaslar nama-qosıqlar astında kóterińki keypiyatta qatnasıp, kitap hám ilimge bolǵan qızıǵıwshılıǵın jáne bir márte kórsetti.
Bunday ilajlar kitapqa bolǵan súyispenshilikti kúsheytedi hám jas áwladtıń ruwxıy dúnyaqarasın bayıtıwǵa xızmet etedi.

Qaraqalpaqstan xabar agentligi