Ózbekstan – Franciya qatnasıqlarında sanlı tarawdaǵı birge islesiw jańa basqıshqa kóterilmekte. Samarqand qalasında bolıp ótken BMSh Mámleketlik xızmeti forumı sheńberinde sanlı texnologiyalar ministri Sherzod Shermatov Franciya Respublikasınıń Ózbekstandaǵı Ayrıqsha hám tolıq huqıqlı elshisi Oreliya Bushez penen ushırasıw ótkerdi.

Ushırasıwda sanlı texnologiyalar, sanlastırıw, jasalma intellekt, IT autsorsing, mámleketlik xızmetlerdi transformaciyalaw, sanlı sheshimler máseleleri dodalandı.
Ministr Ózbekstanda sanlı húkimet hám sanlı ekonomikanı rawajlandırıw boyınsha ámelge asırılıp atırǵan reformalar haqqında maǵlıwmat berdi. Sonıń menen birge, mámleketlik hám jeke menshik sektor arasındaǵı birge islesiwdi kúsheytiw, sanlı xızmetlerdi keńnen engiziw áhmiyetli ekenligi atap ótildi.
Óz gezeginde, elshi Franciyadaǵı sanlastırıw processleri, sanlı xızmetlerden paydalanıw mádeniyatı hám tarawdaǵı aldınǵı tájiriybeler haqqında aytıp, bul baǵdarda Ózbekstan menen tıǵız birge islesiwge tayar ekenin bildirdi.
Ushırasıw barısında IT autsorsing potencialın rawajlandırıw, Franciya elshixanasınıń imkaniyatlarınan kelip shıǵıp, ózbek IT-kompaniyalarınıń Evropa bazarlarına shıǵıwına járdemlesiw hám basqa da mámleketlerge IT xızmetlerin eksport etiw máseleleri de dodalandı.
Ushırasıw juwmaǵında tárepler sanlı transformaciya, kiberqáwipsizlik hám IT eksportın rawajlandırıw tarawlarında birge islesiwdi jáne de tereńlestiriw, birgeliktegi joybarlardı ámelge asırıwǵa kelisip aldı.

N.Rahmonova, ÓzA