Ózbekstan Sawda-sanaat palatası Qaraqalpaqstan Respublikası basqarması tárepinen isbilermenlik subektleriniń jumısın ǵalaba xabar quralları arqalı keń jámiyetshilikke jetkeriw maqsetinde press-tur shólkemlestirildi.

Press-tur sheńberinde ǴXQ wákilleri elimizde jumıs alıp barıp atırǵan “Tumaris Tour” turistlik agentligine barıp, agentliktiń xızmet túrleri, baǵdarları, sonday-aq, turistler ushın jaratılıp atırǵan sharayatlar menen tanıstı. Bul agentlik házirgi waqıtta ishki hám sırtqı turizm xızmetlerin jolǵa qoyǵan bolıp, Egipet, Túrkiya, Gruziya, Ázerbayjan, Qırǵızstan, BAÁ, Rossiya, Mavrikiy hám CHernogoriya mámleketlerin sırtqı turizm baǵdarları menen qamtıp alǵan. Ishki turizm sheńberinde bolsa turistlerge Samarqand, Buxara, Xiywa sıyaqlı elimizdiń biybaha tariyxıy qalalarına sayaxatlar usınıs etilmekte.
Agentlik tárepinen hár bir turisttiń jeke talap hám usınıslarınan kelip shıqqan halda individual turlar hám aviabiletlerdi tayarlap beriw xızmetleri de jolǵa qoyılǵan. Bul nárse qarıydarlarǵa jáne de qolaylı hám nátiyjeli xızmet kórsetiw imkaniyatların jaratpaqta.
Bunnan soń ǴXQ wákilleri Taqıyatas rayonında jaylasqan “Surxon Taqiyatosh Tekstil” JShJ tigiwshilik kárxanasınıń jumısı menen jaqınnan tanıstı.
Bul kárxana 180 jumısshıǵa mólsherlengen bolıp, házirgi kúnde 150 den aslam jergilikli hayal-qızlar turaqlı jumıs penen támiyinlengen. Tigiwshilik cexında jaratılǵan sharayatlar, zamanagóy jumıs kestesi hám qáwipsiz miynet ortalıǵı jumısshılar ushın múnásip sharayat jaratıwǵa qaratılǵan.
Kárxanada tayarlanıp atırǵan kiyim-kenshekler tiykarınan sırtqı bazarǵa, atap aytqanda, Rossiya Federaciyasına eksport etilmekte. Bul bolsa kárxananıń xalıqaralıq bazardaǵı abırayın hám eksport potencialın jáne de rawajlandırıwǵa xızmet etedi.
Press-turdıń gezektegi mánzili rayonda endi qurılısı alıp barılatuǵın balalar dem alıw orayı boldı. Bul dem alıw ornı aldın kóp jıllardan berli bos turǵan orın bolǵanlıǵı sebepli isbilermen tárepinen usınıs kirgizilip 49 jılǵa ijaraǵa alınǵan. Búgingi kúnge shekem bir qansha abadanlastırıw jumısları ámelge asırılıp, házirgi waqıtta oray aymaǵında balalar ushın batutlar, suwda háreketlenetuǵın kater sıyaqlı kewilashar obektler jumıs alıp barmaqta. Bul jazǵı dem alıs dáwirinde balalardıń mazmunlı hám qáwipsiz dem alıwın támiyinlewde áhmiyetli dáslepki qádem esaplanadı.
Isbilermen menen sáwbetlesiw waqtında bul joybar investiciya baǵdarlaması sheńberinde ámelge asırılıp atırǵanın hám búgingi kúnde oraydı bunnan bılay da rawajlandırıw, dem alıw ornın zamanagóy kóriniske keltiriw hám balalar ushın barlıq qolaylı sharayatlardı jaratıw boyınsha rejelerin aytıp ótti.

Press-tur juwmaǵında Ózbekstan Sawda-sanaat palatasınıń Qaraqalpaqstan Respublikası basqarmasında ǵalaba xabar quralları wákilleri ushın baspasóz konferenciyası shólkemlestirildi.
Ilajda basqarma baslıǵınıń orınbasarları M.Kosnazarov hám A.Seytaxovlar shıǵıp sóylep, mámleketimizde isbilermenlikti rawajlandırıwǵa qaratılǵan keń kólemli reformalar, mámleket tárepinen jeke menshik sektordı qollap-quwatlaw, jańa biznes baslamaların xoshametlew hám isbilermenlik ortalıǵın jaqsılaw maqsetinde isbilermenlerge jaratılǵan imkaniyatlar hám jeńillikler boyınsha maǵlıwmat berdi.
Ilaj dawamında qatnasıwshılar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi