Ózbekstan Respublikası Prezidenti Shavkat Mirziyoevtiń Mongoliyaǵa mámleketlik saparı sheńberinde Ulan-Bator qalasında ótkerilgen “Jipek jolı dúrdanası” turizm forumı da dúnya baspasózinde keńnen sáwlelendirildi.

Sonıń ishinde, Ózbekstan Milliy málimleme agentligi – ÓzAnıń sherigi – Mongoliya milliy málimleme agentligin (MONCAME) de bul forum eki mámleket arasında turizm tarawındaǵı birge islesiw imkaniyatların úyreniwge xızmet etetuǵını jazıldı.
XIII ásirde Samarqand, Buxara hám Tashkent sıyaqlı qalalar mádeniyat, din, kórkem óner hám arxitekturanıń orayına aylangan edi. Usı tariyxıy miyras tiykarında 1992-jılı diplomatiyalıq baylanıslar ornatqan Ózbekstan hám Mongoliya búgingi kúnde turizm tarawındaǵı birge islesiwdi jańa basqıshqa alıp shıǵıw niyetinde, – delingen maqalada.
Mámleketimiz basshısınıń Mongoliyaǵa mámleketlik saparı sheńberinde Qubla Koreyanıń jetekshi ǵalaba xabar qurallarında da Ózbekstan-Mongoliya eki tárepleme qatnasıqlarına baǵıshlanǵan bir qatar maqalalar járiyalandı.
“Diplomacy Journal” jurnalında basıp shıǵarılǵan maqalada Ózbekstan hám Mongoliya arasında diplomatiyalıq qatnasıqlar 1992-jılı ornatılǵanı aytılǵan.
– Keyingi jıllarda Ózbekstan – Mongoliya siyasiy sóylesiwiniń jedelleskeni baqlanbaqta. Mongoliya Prezidenti 2022-jılı ShBShnıń Samarqand sammitinde qatnasqan edi. Ózbekstan hám Mongoliya basshıları 2023-jıl 1-dekabr kúni Dubayda bolıp ótken BMShtıń klimat ózgeriwi boyınsha konferenciyası sheńberinde de ushırastı, – dep eske alınadı Prezidentlerdiń ushırasıwları.
Uxnaagiyn Xurelsuxtıń 2024-jıl iyun ayında Ózbekstanǵa birinshi mámleketlik saparı da basılım itibarına tústi. Eki mámleket basshılarınıń nátiyjeli sóylesiwleriniń juwmaqları boyınsha Mámleketleraralıq qatnasıqlar hám birge islesiw haqqındaǵı birgeliktegi bildiriwge, sonday-aq, 14 húkimetleraralıq hám basqa da hújjetlerge qol qoyılǵan.
“The Korea News Plus” onlayn-jańalıqlar basılımı Ózbekstan hám Mongoliya arasındaǵı sawda-ekonomikalıq birge islesiwdiń búgingi jaǵdayı hám perspektivalarına itibar qarattı.
Maqalada atap ótilgenindey, 2019-2024-jıllarda tovar almasıwdıń kólemi 10,5 eseden aslam – 1,9 million dollardan 20,4 million dollarǵa artqan. Sonıń menen birge, Ózbekstan eksportı 1,5 million dollardan 15,1 million dollarǵa, import bolsa 519 mıń dollardan 5,31 million dollarǵa kóbeygen.
Tek ǵana 2024-jıldıń ózinde eki mámleket arasındaǵı tovar almasıw kólemi 46,8 procentke, eksport hám import kólemi bolsa 47 procentke ósti.

B.Xudayberdiev tayarladı. ÓzA