Ózbekstan Respublikası Prezidenti Shavkat Mirziyoev Mongoliya Prezidenti Uxnaagiyn Xurelsuxtıń mirát etiwine bola 24-iyun kúni ómirlik joldası menen birge mámleketlik sapar menen usı mámleketke keldi.

Mámleketimiz basshısın Mongoliya sırtqı isler ministri Batmunx Baceseg hám basqa da rásmiy shaxslar kútip aldı.
Eki mámleket bayraqları menen bezelgen “Buyant-Uxaa” aeroportında joqarı mártebeli miymanlardıń húrmetine húrmetli qarawıl sap tarttı.
Bul sapar etiwdiń mazmun-mánisine bola tariyxıy waqıya, desek, qátelespeymiz. Sebebi, eki mámleket arasındaǵı diplomatiyalıq qatnasıqlar ornatılǵan otız jıldan aslam waqıt ishinde birinshi márte Ózbekstan basshısı Ulan-Batorǵa mámleketlik sapar menen barmaqta.
Usı mániste, bul sapar etiw ótken jıldıń iyun ayında Mongoliya Prezidenti Uxnaagiyn Xurelsuxtıń Ózbekstanǵa saparı waqtında baslanǵan jedel siyasiy sóylesiwdiń logikalıq dawamı bolıp esaplanadı.
Ózbekstan hám Mongoliya geografiyalıq jaqtan uzaq jaylasqan hám ulıwma shegaralarǵa iye bolmasa da óz-ara baylanıslar diplomatiya, ekonomika, transport, mádeniyat hám gumanitarlıq tarawlarda jedel rawajlanbaqta. Atap aytqanda, Tashkentte Mongoliya elshixanasınıń ashılǵanı, húkimetleraralıq hám parlamentleraralıq sóylesiwdiń jedelleskeni, 14 eki tárepleme kelisimge qol qoyılǵanı óz-ara isenim hám sheriklikti tereńlestiriw tileginiń kúsheygeninen dárek beredi.
Shavkat Mirziyoevtiń Ulan-Batorǵa mámleketlik saparı Ózbekstan-Mongoliya qatnasıqlarında jańa basqıshtı baslap beredi. Onda pragmatizm, óz-ara mápdarlıq, turaqlı rawajlanıw hám zamanagóy mashqalalarǵa awızbirshilikli qatnas jasaw tiykarǵı baǵdarlawshı principler bolıp esaplanadı.
Mámleketlik sapar menen Mongoliyada bolıp turǵan Ózbekstan Respublikası Prezidenti Shavkat Mirziyoevti rásmiy kútip alıw máresimi boldı.
Mámleketimiz basshısı hám ómirlik joldasın Mongoliya Prezidenti Uxnaagiyn Xurelsux ómirlik joldası menen kútip aldı.
Suxe-Botir maydanında ullı mártebeli miyman húrmetine húrmetli qarawıl sap tarttı.
Áskeriy orkestrdiń atqarıwında eki mámlekettiń gimnleri jańladı.

Prezidentler húrmetli qarawıl qatarı aldınan ótip, rásmiy delegaciyalardıń aǵzaların qutlıqladı.

Máresimnen soń Ózbekstan Prezidenti Mongoliya Mámleketlik sarayındaǵı Húrmetli miymanlar kitabına jazıw jazıp qaldırdı.

Mongoliya Mámleketlik sarayında Ózbekstan Respublikası Prezidenti Shavkat Mirziyoev hám Mongoliya Prezidenti Uxnaagiyn Xurelsuxtıń tar sheńberdegi hám rásmiy delegaciyalardıń qatnasıwındaǵı sóylesiwleri bolıp ótti.

Ushırasıw aldınan mámleketimiz basshısı Mongoliya jetekshisine shın júrekten qabıllaǵanı hám usı mámleketke juwap retinde mámleketlik sapar menen keliwge mirát etkeni ushın minnetdarshılıq bildirdi.

Eki tárepleme qatnasıqlar tariyxında birinshisi bolǵan bul sapar etiw kóp tárepleme Ózbekstan – Mongoliya baylanısların rawajlandırıwda jańa basqıshtı baslap beretuǵını ayrıqsha atap ótildi. Ózbekstan Prezidenti Mongoliya tárepin jaqınlasıp kiyatırǵan Xalıq revolyuciyası kúni menen de qutlıqladı.

Ózbekstan – Mongoliya doslıq hám kóp tárepleme birge islesiw qatnasıqların bunnan bılay da rawajlandırıwdıń áhmiyetli máseleleri kórip shıǵıldı.

Barlıq dárejedegi baylanıslar hám almasıwlar jedellesti. Tovar almasıw kórsetkishleri jedel ósip barmaqta. Birgeliktegi kárxanalardıń sanı kóbeymekte, densawlıqtı saqlaw, bilimlendiriw, elektron sawda, awıl xojalıǵı, qurılıs materialların islep shıǵarıw tarawlarında dáslepki kooperaciya joybarların ámelge asırıw baslandı.

Kúni keshe eki eldiń isbilermen toparları hám uyımları wákilleriniń qatnasıwında birgeliktegi biznes forumı tabıslı ótkerildi, Ulan-Bator qalasında Ózbekstan ónimleriniń shourumına iye sawda úyi ashıldı.

Sóylesiwlerde ekonomikalıq kooperaciyanı tereńlestiriwge ayrıqsha itibar qaratıldı.

Jaqın jıllarda óz-ara sawdanı, bárinen burın, talap joqarı bolǵan ónimlerdiń nomenklaturası hám kólemin arttırıwdıń esabınan jáne de keńeytiw ushın salmaqlı potencial bar ekenligi atap ótildi.

Usı maqsette jeńilletilgen sawda hám investiciyalardı qorǵaw haqqındaǵı kelisimlerdi qabıl etiwdi jedellestiriw áhmiyetli ekenligi atap ótildi.

Mámleketimiz basshısı ekonomikanıń belgili bir tarmaqlarında sanaat kooperaciyasın tereńlestiriw zárúr ekenligin atap ótti. Birge islesiwdiń bir qatar perspektivalı baǵdarları tiykarǵı etip belgilep alındı.

Bul, bárinen burın, taw-kán tarawındaǵı sheriklik, sonıń ishinde, geologiya-izlew baǵdarlamasın islep shıǵıw, shiyki zat resursları kánlerin ózlestiriw, texnologiyalar transferi, tájiriybe almasıw hám kadrlar tayarlaw tarawları.

Usı mánide, tarawdaǵı joybarlardı alǵa qoyıw maqsetinde Ulan-Bator qalasında Ózbekstan geologiya ministrliginiń wákilxanası ashılǵanı qanaatlanıwshılıq penen atap ótildi.

Birgeliktegi klasterlerdi shólkemlestiriw, gósh-sút, jún hám bılǵarı ónimlerin qayta islew jáne islep shıǵarıw boyınsha kooperaciya joybarların alǵa qoyıw tiykarında awıl xojalıǵında kompleksli birge islesiwdi tereńlestiriwden mápdarlıq bildirildi.

Transport jaǵınan óz-ara baylanıslılıqtı bekkemlew hám jańa logistika baǵdarların rawajlandırıw máselelerine ayrıqsha itibar qaratıldı. Jıldıń aqırına shekem paytaxtlar arasında tikkeley aviaqatnawlardı jolǵa qoyıw rejelestirilgen.

Teńizge shıǵıw imkaniyatı joq mámleketler ushın xalıqaralıq tallaw institutı menen birgelikte eń qısqa hám nátiyjeli transport koridorların anıqlaw boyınsha ámeliy izertlewler ótkeriw usınısı bildirildi.

Jedel mádeniy-gumanitarlıq almasıwlardı dawam ettiriw áhmiyetli ekenligi atap ótildi. Usı kúnlerde Ulan-Bator qalasında Ózbekstan mádeniyatı kúnleri, kórkem óner hám turizm ilajları ótip atırǵanı qanaatlanıwshılıq penen atap ótildi.

Joqarı bilimlendiriw mákemeleri arasındaǵı birge islesiwdi jedel rawajlandırıw, ajıratılıp atırǵan kvotalar sheńberinde monǵol jaslarınıń Ózbekstandaǵı joqarı bilimlendiriw mákemelerinde bilim alıwın qayta tiklewge kelisip alındı.

Erisilgen kelisimlerdi óz waqtında hám sapalı ámelge asırıw boyınsha “jol kartası”n qabıl etiw boyınsha kelisip alındı.

Ulan-Bator qalasında bolıp ótken joqarı dárejedegi sóylesiwlerdiń juwmaǵında Ózbekstan Respublikası Prezidenti Shavkat Mirziyoev hám Mongoliya Prezidenti Uxnaagiyn Xurelsux Keń kólemli sheriklik qatnasıqların ornatıw haqqındaǵı birgeliktegi deklaraciyaǵa qol qoydı.

Sonday-aq, Prezidentlerdiń qatnasıwında tómendegi hújjetlerge qol qoyıldı:

– ósimlikler karantini hám onı qorǵaw, joqarı bilimlendiriw, taw-kán sanaatı, qorshaǵan ortalıqtı qorǵaw, jınayatshılıqtıń aldın alıw hám oǵan qarsı gúresiw, densawlıqtı saqlaw hám medicina ilimi, denetárbiya hám sport tarawlarında birge islesiw haqqındaǵı kelisimler;

– eki mámleket arxiv uyımları arasındaǵı birge islesiw haqqında protokol;

– Ózbekstan Respublikası Investiciyalar, sanaat hám sawda ministrligi menen Mongoliya Ekonomika hám rawajlanıw ministrligi arasında, sırtqı isler ministrlikleri arasında 2026-2027-jıllarǵa mólsherlengen, Ózbekstan Respublikası Mádeniyat ministrligi menen Mongoliya Mádeniyat, sport, turizm hám jaslar ministrligi arasında 2025-2028-jıllarǵa mólsherlengen birge islesiw baǵdarlamaları;

– Ózbekstan Respublikası Awıl xojalıǵı ministrligi hám Mongoliya Azıq-awqat, awıl xojalıǵı hám jeńil sanaat ministrligi arasında awıl xojalıǵı tarawındaǵı birge islesiwdi keńeytiw boyınsha birge islesiw rejesi;

– Ózbekstan Respublikası Ekologiya, qorshaǵan ortalıqtı qorǵaw hám klimat ózgeriwi ministrligi menen Mongoliya Mádeniyat, sport, turizm hám jaslar ministrligi arasında ekoturizm tarawındaǵı háreketler rejesi.

Ǵalaba xabar qurallarınıń wákilleri menen ushırasıwda Ózbekstan Respublikası Prezidenti Shavkat Mirziyoev hám Mongoliya Prezidenti Uxnaagiyn Xurelsux ótkerilgen sóylesiwlerdiń nátiyjeleri boyınsha pikirlerin bildirdi.

Mámleketimiz basshısı óziniń shıǵıp sóylegen sóziniń basında dos Mongoliya xalqın jaqınlasıp kiyatırǵan milliy bayram – Xalıq revolyuciyası kúni menen qızǵın qutlıqladı.
– Mongoliyalı doslarımızdıń sociallıq-ekonomikalıq reformalardı ámelge asırıwdaǵı itibarǵa ılayıq tabısları hám jetiskenliklerinen shın júrekten quwanıshlımız, siziń tınıshlıq súyer sırtqı siyasatıńızdı tolıq qollap-quwatlaymız, – dedi mámleketimiz jetekshisi.
Búgingi kúnde Mongoliya ekonomikası turaqlı joqarı ósiw pátlerin kórsetip atırǵanı atap ótildi. Mámlekette sanaat tarmaqları, awıl xojalıǵı, infrastruktura modernizaciyalanbaqta. Qaraqurım qalasın keń kólemli rekonstrukciyalaw jumısları baslanǵan. Izbe-iz, pragmatikalıq hám jedel siyasat sebepli mámlekettiń xalıqaralıq abırayı artpaqta.
Ózbekstan Prezidentiniń Mongoliyaǵa dáslepki saparı eki mámleket arasındaǵı doslıq hám kóp tárepleme birge islesiw qatnasıqlarınıń rawajlanıwında tariyxıy waqıya bolǵanı ayrıqsha atap ótildi.
Mámleketimiz basshısı sapar etiwdiń tiykarǵı nátiyjelerinen biri sıpatında Ózbekstan – Mongoliya birge islesiwinde jańa basqıshtı baslap beretuǵın áhmiyetli hújjet – Keń kólemli sheriklik haqqındaǵı birgeliktegi deklaraciyaǵa qol qoyılǵanın atap ótti.
Sóylesiwler dawamında ámeliy birge islesiwdiń barlıq tiykarǵı máseleleri hám perspektivalı baǵdarları hár tárepleme kórip shıǵılǵanı, keleshekke mólsherlengen anıq wazıypalar menen rejeler belgilep alınǵanı aytıldı.
2024-jılı Tashkentte bolıp ótken sammitten soń barlıq baǵdarlarda baylanıslar jedelleskeni atap ótildi. Usı jıldıń fevral ayında Húkimetleraralıq komissiyanıń birinshi májilisi nátiyjeli ótkerildi.
Birlesken Milletler Shólkemi, Shanxay birge islesiw shólkemi hám basqa da kóp tárepleme strukturalar sheńberinde tıǵız birge islesiw hám óz-ara qollap-quwatlawdı dawam ettiriwge kelisip alındı.
Ózbekstan Prezidentiniń sózlerine bola, sóylesiwlerde tiykarǵı itibar ekonomikalıq birge islesiwge qaratıldı. Jaqın jıllarda tovar almasıw kólemin, bárinen burın, ótimli ónimler nomenklaturası hám kólemin keńeytiw arqalı bir neshe esege arttırıw wazıypaları belgilendi. Ulan-Batorda kórgizbe zalına iye bolǵan Ózbekstan sawda úyiniń ashılıwı bul jumıslar ushın ámeliy tiykar bolatuǵını atap ótildi.
Sapar aldınan Ózbekstan hám Mongoliya isbilermenleriniń biznes forumı hám ushırasıwları tabıslı ótkerilgeni, jańa shártnama hám kelisimlerge qol qoyılǵanı qanaatlanıwshılıq penen atap ótildi. Mámleket basshıları bunnan bılay da isbilermenlik ushın barlıq sharayatlardı jaratıw hám olardıń isbilermenlik baslamaların hár tárepleme qollap-quwatlawǵa kelisip aldı.
Usı múnásibet penen jeńilletilgen sawda hám investiciyalardı óz-ara qorǵaw haqqındaǵı kelisimlerdi eń qısqa múddetlerde qabıl etiwge kelisip alındı.
Bunnan tısqarı, sóylesiwler waqtında eki mámleket ekonomikaları bir-birin nátiyjeli tolıqtırıwı múmkin bolǵan tarmaqlarda sanaat kooperaciyasınıń anıq baǵdarları belgilep alındı.
Tárepler turaqlı túrde óz-ara koncertler, kórgizbeler, kino prezentaciyaların shólkemlestiriw, festivallarda qatnasıwǵa kelisip aldı.
Erisilgen kelisimler hám qol qoyılǵan kelisimlerdi óz waqtında hám sapalı ámelge asırıw ushın eki mámleket húkimetleri tárepinen keń kólemli “jol kartası” qabıl etiletuǵını atap ótildi.
Sóziniń juwmaǵında mámleketimiz basshısı Mongoliya Prezidentin rásmiy sapar menen Ózbekstanǵa keliwge mirát etkenin málim etti.
Ózbekstan Prezidenti Shavkat Mirziyoev hám Mongoliya Prezidenti Uxnaagiyn Xurelsux ómirlik joldasları menen birgelikte eki mámleket kórkem óner sheberleriniń koncertinde qatnastı.
Búgin mámleket basshılarınıń erk-ıqrarı hám háreketleri sebepli xalıqlarımız jáne de jaqınlastı, mámleketleraralıq qatnasıqlar keń kólemli sheriklik dárejesine kóterildi.
Birgeliktegi koncert Ózbekstan – Mongoliya doslıǵı, eki hám kóp tárepleme qatnasıqlarda jańa basqısh baslanǵanınıń gezektegi kórinisi boldı.
Talantlı kórkem óner sheberleriniń atqarıwındaǵı qosıqlarda mádeniyatlarımızdıń baylıǵı, ráńbáreńligi hám ózine tánligi jámlendi.
Ózbekstan Respublikası Prezidenti Shavkat Mirziyoevtiń Mongoliyaǵa mámleketlik saparı dawam etpekte.

ÓzA