“ACI Europe” – Evropa xalıqaralıq aeroportları keńesi bolıp, pútkil dúnya boylap 2000ge shamalas aeroport operatorların birlestirgen global shólkem bolıp esaplanadı.

Usı jıldıń 18-20-iyun kúnleri “Uzbekistan Airports” wákilleri Afina qalasında (Greciya) bolıp ótken “ACI Europe”tiń XXXV jıllıq kongressi hám Bas assambleyasında qatnastı.
Ilaj aviaciya tarawı jetekshileri hám menedjerlerin birlestirip, global aviaciyadaǵı jańa shaqırıqlar hám imkaniyatlardı dodalaw, keleshektegi birgeliktegi joybarlardı ámelge asırıw ushın xalıqaralıq aeroportlar menen qatnasıqlardı ornatıw, ACI birge islesiwshileriniń innovaciyaları menen tanısıw ushın tiykarǵı platformaǵa aylandı.
Ánjumanda dúnya jetekshilerinen “Vinci Airports” (Franciyadaǵı global aeroport operatorı), AENA (Ispaniyadaǵı jetekshi aeroportlar tarmaǵı), Stanbul aeroportı (Evropa hám Aziyanı baylanıstıratuǵın tiykarǵı aeroport), “Hethrow” (Ullı Britaniyadaǵı eń adamı kóp aeroport), “Aeroporti di Roma” (Italiyadaǵı jetekshi aeroportlar operatorı) hám basqa iri aeroport operatorları qatnastı.
Ilaj dawamında “ACI Europe” direktorı Olive Yankovec ótken 2024-jılı shólkemge aǵza mámleketlerde jolawshı tasıwdıń pandemiyadan aldınǵı dáwir – 2019 jılǵa salıstırǵanda dinamikası menen tanıstırdı.
Tallawlarǵa bola, ótken jılı mámleketimiz aeroportlarınıń jolawshı tasıw kólemi 2019-jılǵa salıstırǵanda eki esege kóbeygen. Sonday-aq, shólkemge aǵza mámleketler arasında Ózbekstan eń jaqsı nátiyjeni kórsetkeni atap ótildi.
“Uzbekistan Airports” 2024-jıl oktyabr ayınan baslap “ACI Europe” shólkemindegi aǵzalıǵın qayta tiklegenin maǵlıwmat ornında atap ótiw zárúr.

Muhayyo Toshqoraeva,
ÓzA