Turaqlı rawajlanıw sheshimleri tarmaǵı (Sustainable Development Solutions Network — SDSN) tárepinen 2025-jıl ushın tayarlanǵan gezektegi esabatqa bola, Ózbekstan 73 ball toplap, 62-orındı iyeledi.

Bul kórsetkish 2024-jılǵa salıstırǵanda 19 tekshege jaqsılanıp, mámleket Oraylıq Aziya hám Shıǵıs Evropa regionında 2015-jıldan berli turaqlı rawajlanıp atırǵan mámleket sıpatında tán alındı.
Kúni keshe usı esabattıń rásmiy onlayn prezentaciyası bolıp ótti. Onda SDSN shólkemlestiriwshilerinen biri, Kolumbiya universitetiniń professorı Jeffri Saks, Ózbekstan Respublikası Ekonomika hám qarjı ministriniń orınbasarı Umid Obidxwjaev hám basqa da abıraylı xalıqaralıq ekspertler qatnastı.
Ministrlik málimleme xızmetiniń xabar beriwinshe, bul ilaj dawamında Ózbekstanda Turaqlı rawajlanıw maqsetleri (TRM) ne erisiw boyınsha ámelge asırılıp atırǵan reformalar, sonıń ishinde, kámbaǵallıqtı qısqartıw, sociallıq qorǵawdı kúsheytiw, azıq-awqat qáwipsizligin támiyinlew, densawlıqtı saqlaw hám bilimlendiriw sistemasın rawajlandırıw, sanlı hám “jasıl” ekonomikanı qollap-quwatlaw, statistikalıq maǵlıwmatlardı ashıp beriw sıyaqlı baǵdarlardaǵı háreketler haqqında maǵlıwmatlar berildi.
Professor Jeffri Saks óziniń shıǵıp sóylegen sózinde turaqlı rawajlanıwǵa erisiwde siyasiy jetekshilik sheshiwshi faktor ekenin atap ótip, Ózbekstandaǵı tabıslardı “úlken siyasiy erk-ıqrar hám isenimli jetekshilik nátiyjesi” sıpatında bahaladı. Sonday-aq, mámlekette ámelge asırılıp atırǵan reformalar, ásirese, kámbaǵallıqtı qısqartıw tarawındaǵı jetiskenlikler xalıqaralıq ekspertler tárepinen ayrıqsha atap ótildi.
Esabatta atap ótilgenindey, Ózbekstanda ámelge asırılıp atırǵan institucionallıq hám strukturalıq reformalar mámlekettiń xalıqaralıq reytinglerdegi ornın sezilerli dárejede jaqsılamaqta. Turaqlı rawajlanıw tarawındaǵı bunday aldınǵı nátiyjeler mámlekettiń global kólemdegi abırayınıń artıwına xızmet etpekte.

N.Ziyodullaeva tayyorladi, ÓzA