Mámleketlik puqaralıq xızmeti sistemasın zaman talapları hám xalıqaralıq standartlar tiykarında jańalaw, onıń nátiyjeliligin arttırıwǵa ayrıqsha itibar qaratılmaqta.

Usı maqsette Prezidentimizdiń “Mámleketlik puqaralıq xızmetin jańa qatnaslar tiykarında shólkemlestiriw jáne professional hám nátiyjelilikke baǵdarlanǵan mámleketlik xızmetkerler korpusın qáliplestiriw ilajları haqqında”ǵı pármanı qabıl etildi.
Prezident janındaǵı Mámleketlik xızmetti rawajlandırıw agentliginiń juwapker xızmetkeri Oybek Sayidumarov pármannıń orınlanıwına baylanıslı pikirleri menen ortaqlastı:
– Párman sheńberinde mámleketlik xızmetti rawajlandırıwdıń eń áhmiyetli baǵdarlarınan biri – kadrlardı tayarlaw, mamanlıǵın arttırıw hám qayta tayarlawdıń bir pútin sisteması engiziledi. Bul processte Mámleketlik xızmetti rawajlandırıw agentligi, Mámleketlik siyasat hám basqarıw akademiyası hám “El-yurt umidi” qorı óz-ara birgelikte birden-bir klaster sıpatında jumıs alıp baradı.
Endi mámleketlik xızmetkerlerdiń kásiplik potencialı hám kompetenciyaların bahalaw, olardıń jeke portfeliosın qáliplestiriw, rawajlandırılıwı kerek bolǵan bilim hám kónlikpelerin anıqlap beriw sistemalı túrde ámelge asırıladı. Sonıń menen birge, milliy kadrlar rezervine kirgizilgen mámleketlik xızmetkerlerdiń kásiplik tayarlıǵı, olardı mamanlıǵın arttırıw hám qayta tayarlaw kurslarına baǵdarlaw sistemalı túrde ámelge asırıladı.
“El-yurt umidi” qorı tárepinen mámleketlik xızmet ushın talap joqarı bolǵan qánigelikler hám baǵdarlar boyınsha talaplar úyrenilip, xızmetkerlerdi sırt eldegi aldınǵı shólkemlerge ámeliyatqa jiberiw de jolǵa qoyıladı. Qalaberdi, perspektivalı kadrlardıń sırt elde bilim hám kásiplik mamanlıǵın arttırıw processleri muwapıqlastırıladı.
Párman menen mámleketlik xızmetkerlerdiń sırt elde oqıwı hám ámeliyat ótewi Mámleketlik xızmetti rawajlandırıw agentligi menen kelisilgen halda ámelge asırılatuǵını belgilendi.
Sonday-aq, Mámleketlik siyasat hám basqarıw akademiyası professional jańa áwlad basshı kadrların tayarlaw sistemasın jetilistiriw jáne olardı tarmaqlar hám tarawlar ushın qayta tayarlaw hám mamanlıǵın arttırıw procesin sapa jaǵınan jańa basqıshqa kóteriw jáne “Aymaqlardı kompleksli rawajlandırıw,” “Mámleketlik basqarıw,” “Insan resursların rawajlandırıw” “Mámleketlik siyasat” hám “Mámleketlik qarjılardı basqarıw” sıyaqlı magistratura qánigelikleri boyınsha kadrlar tayarlawdı ámelge asıradı.
Mámleketlik uyımlar hám shólkemler sistemasındaǵı kadrlardı qayta tayarlaw hám olardıń mamanlıǵın arttırıw orayları (institutları) nıń basshılıq hám basqarıw baǵdarlarındaǵı bilimlendiriw baǵdarlamaları ilimiy-metodikalıq jaqtan támiyinlenedi hám muwapıqlastırıladı.
Pármanǵa muwapıq, 2026-jıl 1-yanvardan baslap mámleketlik xızmetke birinshi ret qabıl etilgen mámleketlik xızmetkerler arnawlı “Mámleketlik xızmetke kiriw” kursların ótewi májbúriy boladı. Sonday-aq, hár úsh jılda bir márte mamanlıq arttırıw kurslarında qatnasıw talap etiledi.
Mámleketlik xızmetkerlerdiń tiyisli taraw hám tarmaq boyınsha bilim hám kónlikpeleri, hújjetler tayarlaw, mámleketlik tilde jumıs júrgiziw, basshılıq hám kommunikativlik tájiriybeleri, zamanagóy málimleme texnologiyaları, nızamshılıq jańalıqları, Ózbekstan tariyxı hám shet tillerin biliw dárejesi hár tárepleme bahalanadı.
Sonıń menen birge, hár bir xızmetker ushın jeke kásiplik rawajlanıw kartası islep shıǵıladı hám onıń tiykarında “jumsaq” hám “qattı” kónlikpelerdi rawajlandırıw boyınsha arnawlı oqıw baǵdarlamaları shólkemlestiriledi.
Párman tiykarında mámleketlik xızmetkerlerdiń kásiplik kompetenciyaların turaqlı arttırıwǵa baylanıslı arnawlı reje de tastıyıqlandı. Bul bolsa, mámleketimizde maman, bilimli hám zamanagóy talaplarǵa juwap beretuǵın mámleketlik xızmetkerler korpusın qáliplestiriwge xızmet etedi.
Álbette, bul áhmiyetli reformalar Ózbekstan mámleketlik puqaralıq xızmeti sistemasın jańa basqıshqa alıp shıǵadı hám puqaralarǵa jáne de nátiyjeli, jedel hám sapalı xızmet kórsetiw imkaniyatın jaratadı.

ÓzA