Atayı sharwalar shańaraǵında tuwılǵan Genjebaydıń balalıǵı da, jaslıǵı da mal sharwashılıǵı arasında ótti.
Universitettiń tariyx fakultetin oqıp tamamlaǵan ol, óz qánigeligi boyınsha Shımbay rayonındaǵı 15-sanlı ulıwma orta bilim beriw mektebinde eki jıl ǵana muǵallim bolıp isledi.

Sońınan ata kásibin quwıp jigit aǵası Orazbay, Rozımbay, Esenbay, Kárimbaylardıń jolın tutıp, mal sharwashılıǵı menen aylanıstı. Mine, sonnan berli de 30 jılǵa shamalas waqıt ótti. Dáslep Shımbay, sońınan Nókis rayonındaǵı Esenbay Aytmuratov basshılıǵındaǵı «Qońıratbay-Mehri» fermer xojalıǵında óz tájiriybesin arttırǵan Genjebay 2009-jılı «Yuventa Nókis» juwapkershiligi sheklengen jámiyetin shólkemlestirip, kótere sawda, kiyim-kenshek islep shıǵarıw menen shuǵıllandı.
Nókis qalasındaǵı qarawsız qalǵan burınǵı kiyim tigiw fabrikasın satıp alıp, imarattı iri ońlawdan shıǵardı.
Ózbekstan Respublikası Prezidentiniń 2022-jıl 31-avgusttaǵı «Qaraqalpaqstan Respublikasında Isbilermenlik, innovaciyalıq texnologiyalar hám infrastrukturalardı jedel túrde rawajlandırıw arqalı xalıqtıń abadanlıǵın arttırıwdıń qosımsha ilajları haqqında»ǵı pármanı Genjebayday isbilermenler ushın oǵada áhmiyetli nızam hújjeti boldı.
-Húrmetli Prezidentimizdiń 213-sanlı pármanı tiykarında, Nókis qalası hákimliginiń qollap-quwatlawı menen 2024-jılı «Agrobank»ten 10 mlrd sumlıq jeńilletilgen kredit alıp, Italiya hám Polshadan sútti qayta islewshi hám onnan 20 túrdegi muzqaymaqlardı islep shıǵaratuǵın texnologiyalardı satıp aldıq,-deydi Genjebay Aytmuratov.-Sońınan olardı arnawlı qánigelerdiń járdeminde ornatıp, usı jıldıń may ayınan baslap, «Monte» brendi menen islep shıǵara basladıq. Házirgi waqıtta bul kárxanada 15 adam turaqlı jumıs penen támiyinlenip, olar tárepinen 5 túrdegi muzqaymaqlar islep shıǵarılmaqta.
-2022-jılı Nókis mámleketlik pedagogikalıq institutın tamamlap, úyde jumıssız otırǵan edim,-deydi qadaqlaw cexınıń xızmetkeri Mehriban Xalilaeva.-Mine, eki aydan berli bul jerde jumıs islep atırman. Tabısım da jaman emes. Túste asxanada awqat beriledi. Ózim qatarlı qızlar menen jumıs islep atırǵanımnan quwanıshlıman. Eń tiykarǵısı, bizler shıǵarıp atırǵan muzqaymaq óniminiń respublikamız boylap qarıydarı kóbeyip atırǵanınan oǵada quwanamız.
-Bazar hám kóshelerde sanitariyalıq jaǵdayı tómen jerlerde satılıp atırǵan, sapasına hesh qanday kepillik berilmeytuǵın arzan muzqaymaqlardı balalarına satıp alıp berip atırǵan ata-analarǵa janım ashıydı,-deydi Genjebay óz sózin dawam etip.-Sebebi, sútten tayarlanǵan ónimler ıssı hawa-rayına shıdamay, sapası buzıladı hám adamnıń densawlıǵına óziniń keri tásirin kórsetedi. Al, muzqaymaq satıwshılar bolsa, aldına aq korobkanı qoyıp, qálegen kóshe boyında kún boyı shıjǵırǵan quyash astında satıp otırǵanın kórip, bul muzqaymaqlardıń erimeytuǵınlıǵına, sapasınıń buzılmaytuǵınlıǵına hayran qalamız…
Aldaǵı waqıtları muzqaymaq túrlerin kóbeytip, olardıń quramına qaraqalpaq xalqınıń milliyligin kórsetiwshi palız ónimlerinen qosıp, ózlerimizdiń jańa ónimlerimizdi shıǵarıwdı maqset etkenbiz.
-2025-jılı Nókis qalasında 2 trln 259 mlrd sum bolǵan, 107 joybardı iske túsiriw hám sol arqalı 2471 jańa jumıs orınların jaratıwdı rejelestirilgenbiz,-deydi Nókis qalası hákiminiń orınbasarı Adilbek Aybekov.-Sonnan búgingi kúnge shekem 773 mlrd sumlıq 36 joybar ámelge asırılıp, 504 jańa jumıs orınları jaratıldı.
Shınında da sońǵı jılları Prezidentimizdiń basshılıǵında Qaraqalpaqstandı hár tárepleme rawajlandırıw, xalıqtıń abadan turmısta jasawın támiyinlew baǵdarında kóplegen unamlı isler ámelge asırılmaqta. Isbilermenlik penen shuǵıllanıwshı puqaralarǵa keń jol ashılıp, qala hám awıllarımızda óndiris kárxanaları iske túspekte.
«Monte» muzqaymaqları usınday iygilikli islerdiń ayqın kórinisi desek boladı.

Adilbay Orazov,
Qaraqalpaqstan xabar agentligi sholıwshısı.