Qaraqalpaqstan Respublikasın sociallıq-ekonomikalıq rawajlandırıw, xalıqtıń abadanlıǵın arttırıw hám isbilermenlikti jedel qollap-quwatlaw maqsetinde Ózbekstan Respublikası Prezidenti tárepinen 2024-jıl aprel ayında qol qoyılǵan 129-sanlı Párman regionda keń kólemli reformalar ushın tiykar bolıp xızmet etpekte. Usı hújjet tiykarında Respublikamızdıń túrli aymaqlarında bir qatar sociallıq áhmiyetke iye joybarlar turmısqa engizilmekte.

Usınday baslamalardan biri sıpatında Beruniy rayonında densawlıqtı saqlaw tarawında sapalı xızmetlerdi keńeytiw maqsetinde jeke menshik sektor wákili – “Atabek Global Farm” JShJ tárepinen jańa zamanagóy klinika qurılısı baslandı. Joybar bahası 4,5 milliard sumdı quraytuǵın bul jer ushın jer maydanı tikkeley ajıratıp berilgen bolıp, búgingi kúnde qurılıs jumıslarınıń bir bólegi juwmaqlanǵan.
Joybar 2026-jılı tolıq iske qosılıwı rejelestirilgen. Eń itibarlısı, bul jańa mákeme arqalı jańa jumıs orınları jaratıladı. Bul bolsa aymaqta bántlik dárejesiniń artıwına, ásirese, jas qánigeler ushın jańa imkaniyatlar ashılıwına xızmet etedi.
– Xalıqqa sapalı medicinalıq xızmet kórsetiwdi maqset etkenbiz. Klinikamızda stacionar hám ambulator sharayatlarda emlew jumısları alıp barıladı, – deydi A.Allayarov isbilermenler ushın jaratılıp berilip atırǵan imkaniyatlarǵa minnetdarshılıq bildirip.
Prezident pármanı sheńberinde ámelge asırılıp atırǵan bunday joybarlar Respublikamızdıń turaqlı rawajlanıwında áhmiyetli basqısh bolıp, mámleketlik hám jeke menshik sektor arasındaǵı nátiyjeli birge islesiwdiń ayqın úlgisi sıpatında qaralmaqta.

Qaraqalpaqstan xabar agentligi