Qońırat rayonında ámelge asırılıp atırǵan iri joybarlardan biri bul – “Yuldash Alixan” JShJ tárepinen qurılıp atırǵan duzdı qayta islew kárxanası.

Bul zamanagóy zavod rayondaǵı «Almazar» máhállesinde qurılmaqta hám Qıtay texnologiyaları tiykarında xızmet etedi. Kárxanada duz 14 grammlıq tabletka túrinde islep shıǵarıladı.
Joybardıń ulıwma bahası 7 milliard sumdı qurap, bul qarjılardıń barlıǵı jeke kapital esabınan juwmaqlanbaqta. Zavod tolıq quwatlılıq penen iske túskennen keyin, 30 puqara turaqlı jumıs ornı menen támiyinlenedi.
Qaraqalpaqstan Respublikası Awıl xojalıǵı ministrliginiń juwapker jumısshı toparınıń aǵzaları usı kárxanadaǵı jaǵday, mashqala hám zárúrlikler menen tanıstı.
Qońırat rayonında ámelge asırılıp atırǵan bunday joybarlar tek ǵana jańa jumıs orınlarınıń jaratılıwına emes, al ishki bazarda jergilikli ónimlerdiń úlesin arttırıwǵa hám eksport imkaniyatların bekkemlewge xızmet etedi. Mámleketlik hám jeke sektor menen birgeliktegi bunday baslamalar Qaraqalpaqstannıń ekonomikalıq rawajlanıwında áhmiyetli orın iyeleydi.

Qaraqalpaqstan xabar agentligi.