Ózbekstan Respublikası Prezidenti hám Ministrler Kabineti tárepinen Qaraqalpaqstan Respublikasın sociallıq hám ekonomikalıq jaqtan rawajlandırıw, xalıqtıń turmısın jaqsılaw, sonnan, turaq jaylar menen támiyinlew, qala hám rayonlardıń infrastrukturasın jaqsılaw, abadanlastırıw boyınsha qabıl etilgen párman hám qararlarǵa tiykarlanıp, búgingi kúnde bir qatar qurılıs jumısları ámelge asırılmaqta.

Bir neshe obektlerde usınday wazıypalardıń sapalı hám óz waqtında orınlanıwı, texnikalıq qadaǵalaw jumısları “Nukus city» JShJ tárepinen ámelge asırılmaqta.
– Jámiyetimiz tárepinen 2025-jıldıń 20-iyun jaǵdayına 20 obektte texnikalıq qadaǵalaw jumısları alıp barılmaqta,-deydi “Nukus city” JShJ baslıǵı Q.Xilalov.
Sonnan, Nókis qalasında 10466 kvartiralı turaq jay hám Balalar emlewxanası, Ámiwdárya rayonındaǵı “Jańa Ózbekstan” massivinde 320 kvartiralı 8 turaq jaydı hám Xojeli rayonında “Jaslar orayı”n qurıw jumısları alıp barılmaqta.
Atap aytqanda, Xojeli rayonındaǵı “Jaslar orayı” joybarı boyınsha. Ózbekstan Respublikası Prezidentiniń 2023-jıl 8-avgusttaǵı PF-129-sanlı pármanınıń 9-bántiniń orınlanıwı boyınsha Qaraqalpaqstan Respublikasında Jaslar sociallıq-ekonomikalıq orayın shólkemlestiriw boyınsha Prezident qararınıń joybarı islep shıǵılıp, Ózbekstan Respublikası Prezidenti Sh.Mirziyoevtiń 2024-jıl 19-20-avgust kúnleri Qaraqalpaqstan Respublikasına saparı dawamında berilgen tapsırmalar boyınsha 36-sanlı bayanlamasınıń 42b-bántindegi tapsırmaǵa tiykarlanıp islep shıǵılǵan qarar joybarı jetilistirildi.
Joybar 16 ministrlik hám uyımlar menen kelisilgen.
Búgingi kúnde islep shıǵılǵan usı qarar joybarı huqıqıy ekspertizadan ótkeriw maqsetinde Ózbekstan Respublikası Ádillik ministrligine kirgizilmekte.
Sonday-aq, Qıtay Xalıq Respublikasınıń “CSADI” kompaniyası tárepinen joybarlaw-smeta hújjetleri islep shıǵılıp, qurılıs jumısları baslap jiberildi. Atap aytqanda, búgingi kúnde oraydıń shtab qurılıs jumısları baslandı hám beton alıw jumıslarına tayar jaǵdayǵa keltirildi. Shtab qurılıs jumıslarında 2 texnika hám 5 jumısshı jumıs alıp barmaqta.
Nókis qalasındaǵı “Shımbay gúzarı” máhállesi aymaǵında da turaq jaylar qurılmaqta. Aukcion sawdaları arqalı jer maydanlarına «EverPROSPER INVESTMENT CONSULTING” JShJ jeńimpaz dep tabıldı.
Bul turaq jaylardı qurıw jumıslarına Qıtay Xalıq Respublikasınıń “China MCC17 Group Co., Ltd” qurılıs kárxanası biriktiriledi.
Zamanagóy hám hár tárepleme xalıqaralıq standartlarǵa say keletuǵın bul turaq jaylardıń joybarlaw-smeta hújjetleri Qıtay Xalıq Respublikasınıń “Central South artichectural institute (CSADI) co Ltd” kompaniyası tárepinen islep shıǵıldı hám bul joybarlar jergilikli “Baxtıbay Nókis” JShJ joybarlawshı kárxana tárepinen beyimlestirildi. Házirgi waqıtta ekspertizaǵa usınıw ilajları kórilmekte.
Búgingi kúnde 5 turaq jaydıń qurılıs jumısları baslandı. Atap aytqanda, 2 turaq jayda podushka jumısları tolıq ámelge asırıldı hám 5 turaq jayda armokarkas toqıw jumısları alıp barılmaqta hám 1 turaq jayda jer tóle bóleginiń cokol jumısları baslandı.
Turaq jaylardıń qurılıs jumıslarında 3 minaralı kran ornatılıp, jumıslar tabıslı dawam etpekte.
Sonday-aq, Ámiwdárya rayonındaǵı “Doslıq” máhállesindegi “Jańa Ózbekstan” massivinde de turaq jaylardıń qurılısı baslanıp, nátiyjeli dawam etpekte. Bıyıl 27-may kúni aukcion sawdaları arqalı 8 jer maydanı “EverPROSPER INVESTMENT CONSULTING” JShJ tárepinen jeńip alındı.
Bul turaq jaylardıń joybarlaw-smeta hújjetleri de Qıtay Xalıq Respublikasınıń “Central South artichectural institute (CSADI) co Ltd” kompaniyası tárepinen islep shıǵılmaqta hám iyun ayınıń aqırına shekem tolıq juwmaqlanıwı rejelestirilgen.
Nókis qalasında kóp tarmaqlı balalar emlewxanasın qurıw jumısları da alıp barılmaqta. Qaladaǵı “Shıǵıs” máhállesi aymaǵınan kóp tarmaqlı balalar emlewxanasın qurıw ushın zárúr jer maydanı tańlandı. Bul emlewxananıń joybarlaw-smeta hújjetleri de Qıtay Xalıq Respublikasınıń “Central South artichectural institute (CSADI) co Ltd” kompaniyası tárepinen islep shıǵılmaqta. Búgingi kúnde emlewxana aymaqları tosıqlar menen qorshalıp, qurılıs jumısların baslaw ushın tayar jaǵdayǵa keltirildi.
Bul jumıslar belgilengen múddetlerde tabıslı ámelge assa, qala hám rayon oraylarında jáne bir qansha zamanagóy imaratlar boy tiklep, olardıń kórkine-kórik qosıp, qaraǵan kózdi quwandıratuǵınlıǵına isenemiz.

Á.Jiyemuratov,
Qaraqalpaqstan xabar agentligi