Ózbekstan Respublikası Prezidenti Shavkat Mirziyoevtiń Mongoliyaǵa bolajaq saparı aldınan Ulan-Bator qalasında Jipek jolı jónelisin, sonday-aq, turistler aǵımın kóbeytiw ushın eki mámlekettiń arnawlı turizm baǵdarlamaların rawajlandırıw hám ǵalaba en jaydırıwǵa qaratılǵan birinshi Mongoliya-Ózbekstan turizm forumı bolıp ótti, dep xabar bermekte “MONTSAME” málimleme agentligi.

Atap ótiliwinshe, forumda eki eldiń 150 den aslam turizm tarawınıń wákilleri qatnasqan.
Májiliste usı mámlekettiń Turizm associaciyasınıń basshısı Dambin Gantumur Mongoliya Prezidenti Uxnaagiyn Xurelsux ótken jılı Ózbekstanǵa mámleketlik saparı waqtında eki mámleket arasında turizm tarawındaǵı birge islesiwdi rawajlandırıwǵa kelisip alǵanın atap ótti. Ol sonday-aq, Mongoliya hám Ózbekstan tek ǵana uqsas tariyx hám mádeniyat emes, al olar basıp ótken joldı sáwlelendiretuǵın ulıwmalıq qádiriyatlarǵa itibar qaratqan.
– Ózbekstan turizmdi, sonıń ishinde, bay tariyxıy-mádeniy miyrastı saqlaw hám rawajlandırıw boyınsha úlken tájiriybege iye,-dedi Dambin Gantumur. – Bunnan tısqarı, elińizde turizm tarawında isbilermenlik subektlerine berilip atırǵan jeńillikler, sırt el investorları ushın jaratılǵan qolaylı sharayatlar tarawdıń turaqlı ósiwine túrtki bermekte. Mongoliya hám Ózbekstan arasındaǵı turizm tarawındaǵı birge islesiw tek ǵana ekonomikalıq emes, al mádeniy hám diplomatiyalıq jaqtan da paydalı. Bul baylanıslar eki xalıq arasında doslıqtı bekkemlep, jańa perspektivalar esigin ashadı.
Xabarda jazılıwınsha, Tashkenttegi “Jipek jolında turizm” xalıqaralıq kórgizbesi sheńberinde mámleketlerimiz arasında turoperatorlar ushın tanısıw turların shólkemlestiriw hám óz-ara tájiriybe almasıw rejelestirilgen.
Bunnan tısqarı, 2023-jılı eki mámleket arasında hawa qatnawınıń huqıqıy tiykarları jaratılǵan. Házirde tikkeley reyslerdi jolǵa qoyıw imkaniyatı kórip shıǵılmaqta. Keleshekte tárepler birgeliktegi turistlik paketlerdi islep shıǵıw, investiciyalıq ortalıqtı jaqsılaw hám jeke menshik sektordı jáne de qollap-quwatlawǵa itibar qaratadı.

Muharrama Pirmatova, ÓzA