Sońǵı jılları óziniń belgili sportshıları menen pútkil dúnyaǵa belgili bolıp kiyatırǵan Ózbekstanda barlıq sport túrleri sıyaqlı, gimnastika da tez pát penen rawajlanbaqta.

Sonıń ishinde, 8 márte Olimpiada oyınlarına qatnasıp, Ginnes rekordlar kitabına kirgen aramızdaǵı ápsanawiy sportshı, Olimpiada chempionı Oksana CHusovitina, Olimpiada oyınlarınıń qola medalı iyeleri Ekaterina Xilko hám Anton Fokin, jerlesimiz Olimpiada oyınlarınıń qatnasıwshısı Shaxzada Ibragimovalardıń qolǵa kirgizip atırǵan jetiskenlikleri ósip kiyatırǵan jas áwlad wákilleriniń gimnastikaǵa degen qızıǵıwshılıqların arttırmaqta.

Ásirese, bunda Ózbekstan Respublikası Prezidenti Sh. Mirziyoev tárepinen jaslarımızǵa jaratılıp atırǵan qolaylı imkaniyat hám sharayatlar áhmiyetli orın tutpaqta.
-Húrmetli Prezidentimiz tárepinen xalqımız arasında gimnastika sport túrlerin keńnen engiziw, jaslar arasınan qábiletli sportshılardı tańlap alıw sistemasın jetilistiriw, xalıqaralıq talap hám standart tiykarında professional sportshılardı tayarlaw arqalı milliy saylandı komandalarımızdıń abıraylı jarıslarda joqarı nátiyjelerdi qolǵa kirgiziwin támiyinlew maqsetinde, 2022-jıldıń 23-dekabrdegi “Gimnastika sport túrlerin bunnan bılayda rawajlandırıw ilajları haqqında”ǵı tariyxıy qararı pútkil sport jankúyerlerin quwanıshǵa bóledi,-deydi Qaraqalpaqstan Respublikası Sport ministrligine qaraslı Respublikalıq gimnastika sport túrlerine qánigelestirilgen sport mektebiniń direktorı Ulıǵbek Jumaniyazov.-Usı qarar tiykarında, Samarqand hám Ferǵana qalaları menen bir qatarda, paytaxtımız Nókis qalasında da barlıq qolaylı sharayatlarǵa iye zamanagóy Gimnastika sport túrlerine tayarlaw orayı qurılmaqta.
-Qurılıs jumısların ótken jılı baslaǵan edik,-deydi “Invest stroy Nukus” juwapkershiligi sheklengen jámiyetiniń bas injeneri Tilepbay Babakov.-Házirgi waqıtları qurılısshılarımız tárepinen qızǵın jumıslar alıp barılmaqta. Nesip etse, qurılıs jumısların tez kúnler ishinde, sapalı juwmaqlap, jańa oqıw jılına paydalanıwǵa tapsıramız.
-Usı kúnge shekem respublikamızdıń shetki aymaqlarında jasawshı jaslardıń gimnastika menen professsional túrde shuǵıllanıwı ushın imkaniyatlar az edi,-dep óz sózin dawam etti Ulıǵbek Jumaniyazov.-Jańa oraydıń iske túsiwi menen awıl balalarınıń da gimnastika túrleri menen turaqlı túrde shuǵıllanıwı ushın barlıq qolaylıqlar jaratıladı. Oqıwshılarımız orayǵa jaqın jaylasqan mektepte bilim alıp, Gimnastika orayında professional trenerlerdiń basshılıǵında shınıǵıwlar alıp baradı. Olar bul jerde jatıp oqıwı ushın arnawlı jataqxana hám asxanalar menen támiyinlenedi. Házirgi waqıtları respublikamızdan 17 jas gimnastlar Ózbekstan saylandı komandasınıń aǵzaları bolıp tabıladı. Olar tek ǵana mámleket birinshiliklerinde emes, al, xalıqaralıq jarıslarda jeńimpazlıqtı qolǵa kirgizbekte. Endi jańa Gimnastika sport túrlerine tayarlaw orayı paydalanıwǵa tapsırılsa, olardıń arasınan Aziya hám Olimpiada oyınlarınıń jeńimpazları jetilisip shıǵadı dep oylaymız.
Haqıyqatında, Ózbekstan Respublikası Prezidentiniń arnawlı qararı tiykarında Nókis qalasında boy tiklep atırǵan Gimnastika sport túrlerine tayarlaw orayı keleshekte jaslarımız ushın tálim-tárbiya oshaǵı bolıw menen birge, dúnya sport arenasına jol ashatuǵın teberik oqıw ornı bolatuǵınlıǵına bekkem isenemiz.

Adilbay Orazov,
Qaraqalpaqstan xabar agentligi sholıwshısı