Ámiwdárya rayonında mayıplıǵı bolǵan balalarǵa sociallıq xızmet kórsetiwdi jetilistiriwge qaratılǵan jańa joybar ámelge asırılmaqta. Bul joybar Ózbekstan Respublikası Prezidentiniń “Mayıplıǵı bolǵan balalarǵa sociallıq xızmet hám járdem kórsetiw sistemasın bunnan bılay da jetilistiriw boyınsha qosımsha ilajlar haqqında”ǵı qararı tiykarında ámelge asırılmaqta, – dep maǵlıwmat beredi rayon hákimligi Málimleme xızmeti bólimi.

Sonıń menen birge, Ámiwdárya rayonında jaylasqan “Aristokrat” atındaǵı mektepke shekemgi bilimlendiriw shólkeminde Prezident janındaǵı Sociallıq qorǵaw milliy agentligi Qaraqalpaqstan Respublikası basqarması tárepinen “Kúndizgi tárbiya” xızmeti shólkemlestirildi. Jańadan ashılǵan bul xızmet járdeminde mayıplıǵı bolǵan balalarǵa óz waqtında hám nátiyjeli járdem kórsetiw, olardıń sociallıq belsendiligin arttırıw maqset etilgen.
“Kúndizgi tárbiya” toparına qosılıw ushın balalar Basqarma janındaǵı psixologiyalıq-medicinalıq-pedagogikalıq komissiya tekseriwinen ótkerildi hám mayıplıǵı bar ekenligi tastıyıqlanǵan balalar qamtıp alındı. Bul xızmet tek ǵana balalardıń medicinalıq hám psixologiyalıq talapların qanaatlandırıwǵa emes, al olardıń sociallıq integraciyasın támiyinlewge de xızmet etedi.
Bul joybar “Kámbaǵallıqtan abadanlıqqa qaray” baǵdarlaması sheńberinde ámelge asırılmaqta hám onıń tiykarǵı wazıypası – sociallıq xızmetler hám járdem kórsetiw imkaniyatların keńeytiw arqalı ata-analarlardıń jumıs islew imkaniyatın sheklewshi faktorlardı saplastırıwdan ibarat.

Qaraqalpaqstan xabar agentligi