“Milliy tiklanish” demokratiyalıq partiyası Qaraqalpaqstan Respublikası Keńesi tárepinen Ózbekstan mámleketlik kórkem óner hám mádeniyat institutı Nókis filialında Ózbekstan “Milliy tiklanish” demokratiyalıq partiyası dúzilgeniniń 30 jıllıǵı múnásibeti menen bayram ilajı ótkerildi.

Ilajda partiyanıń Qaraqalpaqstan Respublikası Keńesiniń wákilleri, veteranlar, Joqarǵı Keńes hám jergilikli Keńes deputatları, “Jaslar qanatı” hám “Hayal-qızlar qanatı”, partiya belsendileri hám jaslar qatnastı.
Ilaj ónermentlerdiń hám jas talant iyeleriniń súwretlew kórgizbesi hám jas baqsılardıń milliy qosıqları menen ashıldı.
Ilajda atap ótilgenindey, “Milliy tiklanish” demokratiyalıq partiyası 1995-jıldıń 3-iyun sánesinde shólkemlestirildi.
Házirgi waqıtta “Milliy tiklanish”tiń Ózbekstan boyınsha 770 mıńnan aslam aǵzası bar. Jańa Ózbekstan reformaları dáwirinde partiyanıń ideyalarına bolǵan qızıǵıwshılıq kúsheydi. 2024-jılǵı saylawlardıń juwmaǵı boyınsha jergilikli keńeslerge partiyanıń 1800 wákiliniń saylanǵanı da onıń ideya hám baslamaların qollap-quwatlawshılardıń sheńberi keńeyip atırǵanın kórsetedi.
Búgingi kúnde partiyanıń Qaraqalpaqstandaǵı aǵzalarınıń sanı 51130 ǵa jetken bolsa, baslanǵısh partiya shólkemleriniń sanı 680 ge jetti. Sonday-aq, partiya 2024-jıl 27-oktyabrde Parlament hám jergilikli Keńeslerge bolıp ótken saylawda belsene qatnasıp, Ózbekstan Respublikası Senatına 1 deputat, Oliy Majlis Nızamshılıq palatasına proporcional saylaw túri boyınsha 2 deputat, Qaraqalpaqstan Respublikası Joqarǵı Keńesine 9 deputat jáne qalalıq hám rayonlıq Keńeslerge 63 deputat saylandı.
Ilajda shıǵıp sóylegenler ótken jıllar dawamında partiyanıń siyasatı qatańlasıp, reformalarǵa bolǵan kózqarasları, erteńgi kúnge degen múnásibetleri ózgergenin atap ótti. Saylawshınıń talabınan kelip shıǵıp, deputatlardıń wazıypaları kúsheydi. Parlamentte de, jergilikli keńeslerde de deputat shın mánisinde xalıq wákili bolıwı shárt, degen haqıyqıy talap jumıslarınıń tiykarına aylanbaqta.
Házirgi waqıtta tiykarǵı itibar tárbiya hám bilimlendiriw sistemasın jetilistirip, kúshli áwladtıń qáliplesiwine xızmet etetuǵın sistema jaratıwǵa qaratılmaqta. Sonday-aq, bárkamal áwladtı tárbiyalaw ushın, bárinen burın, ziyalı pedagoglardı, oqımıslı ata-analardı tárbiyalaw kerek, degen ideya da kún tártibine qoyıldı.
Ilaj sońında partiya veteranları hám belsendilerine estelik sawǵaları tapsırıldı.
Orınlarda partiyanıń 30 jıllıǵın belgilew boyınsha ilajlar dawam etpekte.

Á.Jiyemuratov,
Qaraqalpaqstan xabar agentligi.