22-iyun tań azanda AQSh aviaciyası Fordo hám Natanzdegi yadro obektlerin bombaladı, dep jazdı “New York Times” Iran rásmiylerine súyenip. Prezident Donald Tramptıń da bul maǵlıwmattı tastıyıqladı:

– Biz Irannıń úsh yadrolıq obektine, sonıń ishinde, Fordo, Natanz hám Isfaxonga júdá tabıslı hújimdi juwmaqladıq. Bul isti tek Amerika armiyası ámelge asırıwı múmkin edi.
“Fox News”tiń jazıwınsha, AQSh hújimde bunker bombaları hám “Tomahawk” qanatlı raketalarınan paydalanǵan.
– Fordoga soqqı beriliwin kútken edik, – delingen Islam Respublikası parlamenti baslıǵınıń keńesgóyi Mehdi Muhammadiy tarqatqan bildiriwde. Sonıń ushın obekt evakuaciyalandı. Úlken zıyan joq.
Bul waqıya mámlekettegi hár qıylı siyasiy toparlar tárepinen túrlishe bahalanbaqta. Máselen, Respublikashı kongressmen Tomas Massi ekshembi kúni partiyalası Tramptıń qararın sınǵa alıp, AQShtıń Iranǵa soqqısı mámleket Konstituciyasına qayshı ekenin aytqan.
Bir neshe kún aldın Massi Trampqa Iran menen jeke ózi urıs baslawın qadaǵan etiwshi rezolyuciyanı usınıs etken.
Amerikalı geosiyasiy analitik Skott Ritter de sociallıq tarmaqtaǵı betinde Iran yadro obektlerin bombalaw qararı júdá úlken qáte ekenligin jazǵan:
– Prezident Bushtan keyingi eń aqmaqshılıq qarar. Bombalar nıshanǵa zıyan jetkergen be yamasa joq pa, házirshe bilmeymiz. Izrail bul mánzillerdi bir hápte dawamında toptan oqqa tuttı. Kópshiligi bunnan aldın zıyan kórgen yamasa wayran bolǵan. Aqıbetinde – mashqalanı tınısh jol menen sheshiwde isenimsiz birge islesiwimizdi jáne bir márte kórsettik. Máselen, Rossiya endi bizge qalay iseniwi múmkin?!
Qánige, sonday-aq, Irannıń bunday buzǵınshı háreketke juwabı aldınnan aytıp bolmaytuǵın dárejede kóriniwi múmkin ekenligin atap ótti.
Bizge belgili, Izrail 13-iyunǵa ótetuǵın túnde jasırın áskeriy yadro baǵdarlamasın ámelge asırıwda ayıplap, Iranǵa qarsı ámeliyat baslaǵan.
Óz gezeginde Islam Respublikası yadrolıq joybardıń áskeriy ózgesheligin biykarlap kelmekte.
18-iyun kúni MAGATE bas direktorı Rafael Grossi agentlik qánigeleri Iran yadro quralı baǵdarlamasın ámelge asırıp atırǵanı haqqında anıq dálil kórmegenin atap ótken.
CNN xabarına bola, AQSh razvedka jámiyetshiligi de, Tramp hám Izraildıń bildiriwinen ózgesherek, Iran yadrolıq qural jaratpaqshı emes, dep esaplaytuǵının bildirgen.

S.Rahimov, ÓzA