Facebook óziniń platformasında videolardı ornalastırıw sisteması túp-tiykarınan ózgertiletuǵının járiyaladı. Endi paydalanıwshılar video júklep alıwda óz aldına reels yamasa ápiwayı video sıpatında tańlamaydı. Hár qanday video – uzınlıǵına yamasa formatına qaramastan – avtomat tárizde «reels» (yaǵnıy qısqasha video rolik) sıpatında járiyalanadı.

Bul qarar sociallıq tarmaq paydalanıwshıları arasında video kontentti almasıw usılın ápiwayılastırıw hám kóbirek dóretiwshilik imkaniyatlar jaratıw maqsetinde qabıl etilgen.
Aldın Facebookte paydalanıwshılar eki ayrıqsha varianttan birin tańlawı kerek edi:
ápiwayı video (Video jaylastırıw)
yaki reels (Qısqa rolik)
Biraq endi bul ekewiniń ornına bir ulıwma format – reels saqlanıp qaladı. Barlıq videolar usı formatta kórsetiledi. Sonıń menen birge, platformadaǵı “Video” bóliminiń atı da rásmiy túrde “Reelsler” dep ózgertilmekte.
Facebook wákilleriniń maǵlıwmatına bola, bul ózgerisler:
usınıs sistemasına tásir etpeydi, yaǵnıy paydalanıwshılar ele de ózleri ushın sáykes videolardı kóriwdi dawam etedi;
video uzınlıǵı yamasa formatına sheklew qoymaydı – yaǵnıy Reels endi tek 90 sekundlı emes, al qálegen uzınlıqtaǵı video bolıwı múmkin;
barlıq túrdegi videolar – qısqa rolikler, uzaq videolar hám janlı efirler platformada saqlanıp qaladı.
Jańa sistema arqalı paydalanıwshılar:
video jaylastırıwda bir qıylı, ápiwayılastırılgan processten paydalanadı;
video auditoriyasın belgilew imkaniyatına iye boladı – mısalı, kim kóretuǵının anıqlaw: hámmege, tek doslarga yaki anıq adamlar toparına;
dóretiwshilik qurallarǵa keńirek kiriw huqıqına iye boladı – montaj, effektler, muzıka, tekst hám basqa da funkciyalar.
Facebook bul ózgerislerdi paydalanıwshılarǵa birdey tájiriybe jaratıw hám dóretiwshiler ushın imkaniyatlardı keńeytiw ushın ámelge asırmaqta.
Meta keń strategiyanıń bir bólegi.
Meta kompaniyası bul qádemdi birinshi márte qollanıp atırǵan joq. 2022-jılı Instagram da barlıq 15 minutqa shekem bolǵan videolardı reels formatında avtomat tárizde jaylastırıwǵa ótken edi. Endi Facebook ta usıǵan uqsas sistemanı engizbekte, bul bolsa Meta kompaniyasınıń barlıq sociallıq tarmaqlarda birdey video almasıw mexanizmin jaratıwǵa umtılıp atırǵanın kórsetedi.

Madinabonu Nasrieva, Uluǵbek Twxtaev (video), ÓzA