Ózbekstan Respublikası Prezidentiniń pármanı

Mámleketlik puqaralıq xızmetin zamanagóy standartlar tiykarında shólkemlestiriw, mámleketlik xızmetkerlerdiń jumısın nátiyjelilikke baǵdarlaw, xalıqtıń mámleketlik xızmetke bolǵan isenimin jáne de arttırıw, tarawǵa perspektivalı kadrlardı tartıw hám olardı professional qánige etip tayarlawdıń nátiyjeli sistemasın engiziw, sonday-aq, «Mámleketlik puqaralıq xızmet haqqında»ǵı nızam hám «Ózbekstan – 2030» strategiyasında belgilengen wazıypalardıń orınlanıwın támiyinlew maqsetinde qarar etemen:
I. Mámleketlik puqaralıq xızmetin shólkemlestiriwdiń tiykarǵı baǵdarları
1. Tómendegiler 2025-2026-jıllarda mámleketlik puqaralıq xızmetin jańa kózqaraslar tiykarında shólkemlestiriwdiń tiykarǵı baǵdarları etip belgilensin:
a) mámleketlik uyımlarda kadrlar menen islesiwdiń zamanagóy usıl hám mexanizmlerin hám bir pútin sistemasın engiziw;
b) mámleketlik uyımlarda potenciallı hám perspektivalı basshı kadrlar rezervin qáliplestiriw hám jańa áwlad basshı kadrların tayarlaw sistemasın bunnan bılay da jetilistiriw;
v) xızmetkerlerdiń mámleketlik puqaralıq xızmetine (keyingi orınlarda – mámleketlik xızmet) qabıl etilgeninen baslap pútkil miynet jolı dawamında zárúr bilim hám kásiplik kompetenciyaların úzliksiz rawajlandırıwın shólkemlestiriw hám monitoring etiw;
g) mámleketlik xızmetke hayal-qızlardı keńnen tartıw ushın olardıń tarawǵa bolǵan qızıǵıwshılıǵın, mápdarlıǵın hám isenimin arttırıw;
d) Mámleketlik puqaralıq xızmetin 2030-jılǵa shekem rawajlandırıw strategiyasın ámelge asırıw;
e) mámleketlik puqaralıq xızmetkerleri (keyingi orınlarda – mámleketlik xızmetkerler) xızmet wazıypaların orınlawda ádep-ikramlılıq qaǵıydalarına qatań ámel etiliwin támiyinlew hám kásiplik mádeniyatın rawajlandırıw arqalı mámleketlik uyımlarǵa jámiyetshiliktiń isenimin bekkemlew;
j) mámleketlik xızmetkerlerdiń nátiyjeli miynetke umtılıwın kúsheytiw, óziniń kásiplik kónlikpelerin rawajlandırıw hám joqarı nátiyjelerge mápdarlıǵın arttırıwǵa qaratılǵan miynetke haqı tólewdiń tartımlı mexanizmlerin engiziw.
II. Mámleketlik xızmette kadrlar tayarlawdıń bir pútin sistemasın engiziw
2. Mámleketlik xızmetti rawajlandırıw agentligi, Mámleketlik siyasat hám basqarıw akademiyası jáne «El-yurt umidi» qorınıń turaqlı birge islesiwi tiykarında mámleketlik xızmette kadrlar tayarlawdıń bir pútin sisteması engizilsin. Onda:
a) Mámleketlik xızmetti rawajlandırıw agentligi:
(I) ashıq hám ádil tańlawlar tiykarında mámleketlik xızmetke eń múnásip kadrlardı tartadı, sonday-aq, olardıń gorizontal hám vertikal kareralıq ósiwine járdemlesedi;
(II) mámleketlik xızmetkerlerdiń potencialı hám kásiplik kompetenciyaların diagnostikadan ótkeredi hám nátiyjelerine qaray xızmetkerdiń portfoliosın qáliplestiredi hám rawajlandırıw talap etiletuǵın bilim hám kónlikpelerin arttırıw ilajların kóredi;
(III) Milliy kadrlar rezervin qáliplestiredi hám rezervtegi talabanlardıń maqsetli tayarlanıwın shólkemlestiredi, Mámleketlik siyasat hám basqarıw akademiyasınıń qánigeligin arttırıw hám qayta tayarlaw kurslarına mámleketlik buyırtpanı ámelge asıradı;
(IV) talap joqarı bolǵan qánigelikler hám baǵdarlar boyınsha talaplardı úyrenedi hám usı baǵdarda mámleketlik xızmetkerlerdiń sırt elde maqsetli stajirovka ótewi boyınsha buyırtpalardı qáliplestiredi;
(V) «El-yurt umidi» qorı stipendiantlarınıń gorizontal hám vertikal kareralıq ósiwi boyınsha zárúr ilajlardı kóredi;
b) Mámleketlik siyasat hám basqarıw akademiyası:
(I) Mámleketlik xızmetti rawajlandırıw agentliginiń buyırtpasına tiykarlanıp mámleketlik xızmetkerlerdiń qánigeligin arttıradı hám olardı qayta tayarlaydı, sonday-aq magistraturada oqıtadı;
(II) mámleketlik uyımlar sistemasındaǵı kadrlardı qayta tayarlaw hám olardıń mamanlıǵın arttırıw oraylarınıń (institutlarınıń) basshı hám basqarıw kadrların tayarlaw baǵdarındaǵı jumısın oqıw-metodikalıq jaqtan muwapıqlastırıp baradı, sonıń ishinde, olardıń tiyisli oqıw baǵdarlamaların ekspertizadan ótkeredi hám tastıyıqlaydı, oqıw procesinde paydalanılatuǵın bilimlendiriw texnologiyalarınıń úlgi túrlerin islep shıǵadı;
v) «El-yurt umidi» qorı:
(I) Mámleketlik xızmetti rawajlandırıw agentliginiń buyırtpasına tiykarlanıp mámleketlik xızmetkerlerdiń sırt eldegi mámleketlik hám mámleketlik emes shólkemler jáne ilimiy-izertlew hám bilimlendiriw mákemelerinde ámeliy kónlikpelerin rawajlandırıwǵa qaratılǵan maqsetli stajirovkasın shólkemlestiredi;
(II) perspektivalı kadrlardıń sırt elde ámeliy kónlikpelerin rawajlandırıw hám bilim alıwın muwapıqlastırıw tiykarında talabanlardı kásipke baǵdarlaw ilajların ámelge asıradı.
III. Tarawdı túpkilikli reformalaw
1. Sonday tártip ornatılsın, oǵan muwapıq 2026-jıl 1-yanvardan baslap:
a) mámleketlik xızmetke birinshi márte qabıl etilgen mámleketlik xızmetkerler menen miynet shártnaması dáslep bir jıl múddetke dúziledi hám keyin ala jumısınıń unamlı nátiyjelerine bola miynet shártnaması belgisiz múddetke sozdırıladı;
b) mámleketlik xızmetke birinshi márte qabıl etilgen mámleketlik xızmetkerler májbúriy «Mámleketlik xızmetke kiriw» arnawlı kurslarınan hám keyin ala hár úsh jılda keminde bir márte mamanlıǵın arttırıw kurslarınan ótedi hám usı kurslardıń juwmaqları boyınsha olardıń teoriyalıq bilim hám kónlikpeleri diagnostikadan ótkeriledi;
v) diagnostikada mámleketlik xızmetkerlerdiń tiyisli taraw hám tarmaq boyınsha bilim dárejesi, hújjetlerdi dúziw hám mámleketlik tilde jumıs júrgiziw kónlikpeleri, analitikalıq, basshılıq hám kommunikativlik kónlikpeleri, kompyuter sawatlılıǵı, nızamshılıqtaǵı jańalıqlardı, Ózbekstan tariyxı hám shet tillerin ózlestirgenligi, ulıwma erudiciyası, psixologiyalıq diagnozı hám intellektuallıq koefficienti (IQ) sıyaqlı kórsetkishleri bahalanadı;
g) diagnostika hám jumıs nátiyjeliligi (KPI) nátiyjeleri Xızmetkerlerdiń kásiplik kompetenciyaları rawajlanıwın úzliksiz onlayn monitoring etiw sistemasında (keyingi orınlarda – Monitoring sisteması) jıynaladı hám tallanadı;
d) Monitoring sistemasın tallaw nátiyjelerine bola, xızmetkerdiń bar bilim hám kónlikpelerin kásiplik rawajlandırıw kartası – portfoliosı jaratıladı;
e) kásiplik rawajlanıw kartası tiykarında mámleketlik xızmetker rawajlandırıwı kerek bolǵan «jumsaq» hám «qattı» kónlikpeler boyınsha májbúriy tájiriybe arttırıw, sonıń ishinde, óz betinshe bilim alıw baǵdarlamasın óteydi;
j) ministrlikler hám uyımlar tárepinen xızmetkerlerdi sırt elde oqıtıw, tayarlaw, mamanlıǵın arttırıw jáne stajirovkasın shólkemlestiriw, sonıń ishinde, grantlar yamasa donorlardıń qarjıları esabınan ámelge asırılıp atırǵan joybarlar sheńberinde mámleketlik xızmetkerlerdi oqıtıw, tayarlaw, mamanlıǵın arttırıw hám stajirovkası menen baylanıslı ilajlar májbúriy tártipte Mámleketlik xızmetti rawajlandırıw agentligi menen kelisilgennen soń ámelge asırıladı.
Mámleketlik xızmet lawazımların iyelew boyınsha tańlaw ótkeriwde 2025-jıl 1-avgusttan baslap tómendegiler belgilensin:
a) respublika, aymaqlıq hám rayon (qala) dárejesindegi shólkemlerdegi lawazımlardıń basqarıw hám járdemshi toparları ushın tańlawlar tek ǵana Mámleketlik puqaralıq xızmetkerleri vakant lawazımlarınıń birden-bir portalı arqalı ótkeriledi;
b) nızamshılıqta lawazımǵa tayınlawda tiyisli uyımlar menen kelisiliwi kerek bolǵan lawazımlar boyınsha kelisiw usı uyımlardıń wákillerin tańlaw komissiyası quramına kirgiziw jolı menen ámelge asırıladı;
v) test sınaqları Mámleketlik xızmetkerlerdi sınaqtan ótkeriw moduli arqalı arnawlı úskenelengen xanalarda yamasa aralıqtan onlayn proktoring sisteması arqalı ótkeriledi. Onda tiyisli mámleketlik uyımda test sınaqların arnawlı úskenelengen xanalarda yamasa aralıqtan ótkeriw máselesi Mámleketlik xızmetti rawajlandırıw agentligi tárepinen múrájatlardı tallaw, úyreniwler hám sorawnamalar nátiyjelerine bola sheshiledi;
g) Mámleketlik xızmetti rawajlandırıw agentligine tómendegi huqıqlar berilsin:
(I) tańlawdıń sáwbet basqıshına mámleketlik uyımlar, puqaralıq jámiyeti institutları, joqarı bilimlendiriw mákemeleri, ilimiy shólkemler yamasa mámleketlik uyım janındaǵı jámiyetlik keńeslerdiń wákillerinen ekspertlerdi tartıw;
(II) tańlaw juwmaqlarına tásir kórsetken hám saplastırıp bolmaytuǵın kemshilikler anıqlanǵan jaǵdayda, tiyisli mámleketlik uyımǵa tańlaw komissiyasınıń qararın biykarlaw boyınsha kórip shıǵılıwı májbúriy bolǵan usınıs kirgiziw.
5. 2026-jıldan baslap qábiletli basqarıwshılar hám liderlerdi, jańa áwlad basshıların anıqlaw hám tańlaw boyınsha «TOP-100» baǵdarlaması engizilsin.
a) «TOP-100» baǵdarlaması tiykarında hár eki jılda bir márte 100 potenciallı basqarıw kadrların tańlap alıw boyınsha respublikalıq tańlaw ótkeriletuǵını;
b) «TOP-100» baǵdarlamasında belgilengen normalarǵa tiykarlanıp mámleketlik xızmetkerler, jámiyetlik shólkemlerdiń wákilleri, isbilermenler, sırt eldegi watanlaslar hám basqa da shaxslar ıqtıyarıy tiykarda qatnasatuǵını;
v) «TOP-100» baǵdarlaması qatnasıwshılarınıń tańlaw tapsırmaların orınlaw procesinde kórsetken bilimi hám intellektuallıq potencialı, watansúyiwshiligi, shólkemlestiriwshiligi, basqarıwshılıq hám liderlik sapası olardı bahalawdıń tiykarǵı ólshemleri bolıp esaplanatuǵını;
g) «TOP-100» baǵdarlamasınıń jeńimpazları bazalıq esaplaw muǵdarınıń 100 esesi muǵdarında bir mártelik aqshalay sıylıq penen xoshametlenetuǵını, arnawlı oqıw baǵdarlaması tiykarında oqıtılatuǵını, «ustaz-shákirt» dástúri tiykarında tájiriybeli basshılarǵa shákirt sıpatında biriktiriletuǵını, basqa mámleketlik uyımlarǵa tájiriybe arttırıw ushın tiyisli lawazımdı iyelegen halda bir jılǵa shekemgi múddetke waqıtsha xızmet saparına hám sırt el stajirovkasına jiberiletuǵını;
d) «TOP-100» baǵdarlaması jeńimpazları Milliy kadrlar rezervine kirgiziletuǵını hám respublikalıq hám jergilikli atqarıw hákimiyatı uyımlarında jáne basqa da mámleketlik hám xojalıq basqarıw uyımlarında basshılıq lawazımların iyelew ushın tiykarǵı talabanlar esaplanatuǵını belgilep qoyılsın.
6. Potenciallı hám perspektivalı basshılardıń turaqlı rezervin támiyinlew maqsetinde:
a) respublikalıq atqarıw hákimiyatı uyımları basshılıq lawazımlarına keminde 500 hám jergilikli atqarıw hákimiyatı uyımları basshılıq lawazımlarına keminde 1 000 talabannan ibarat Milliy kadrlar rezervi qáliplestiriletuǵını;
b) máhállede jumıs islep, sońǵı eki jıllıq jumısı dawamında unamlı nátiyjelerge erisken máhálle baslıǵı, hákim járdemshisi, hayal-qızlar belsendisi, jaslar jetekshisi, sociallıq xızmetker hám salıq inspektorlarınan ibarat 1000 adamnan ibarat Potenciallı kadrlar rezervi qáliplestiriletuǵını hám Mámleketlik xızmetti rawajlandırıw agentliginiń usınısına tiykarlanıp lawazımlarǵa tańlawsız tayınlanatuǵını;
v) mámleketlik xızmette talantlardı rawajlandırıw hám hár tárepleme stajirovkaǵa jiberiletuǵını belgilensin. Onda, birinshi gezekte, ekonomikanıń jetik basshı kadrlardı tayarlaw sheńberinde Milliy kadrlar rezervi quramına kirgizilgen talabanlar islep atırǵan lawazımınan basqa mámleketlik uyımlarǵa bir jılǵa shekemgi múddetke waqıtsha xızmet saparına, sonday-aq, sırt mámleketlerge maqsetli drayver tarawlarına ústinlik beriledi.
IV. Mámleketlik xızmette korrupciyaǵa qarsı gúresiw hám sanlastırıw
Mámleketlik xızmetti rawajlandırıw agentliginiń Basshı kadrlardı bahalaw orayı Korrupciyaǵa qarsı gúresiw agentligi menen birgelikte mámleketlik xızmetkerlerde korrupciyaǵa mawasasız múnásibetti qáliplestiriw, olarǵa «hadallıq vakcinası»n sińdiriw hám bul baǵdarda preventivlik mexanizmlerdi engiziw maqsetinde Mámleketlik xızmetti rawajlandırıw agentliginiń Basshı kadrlardı bahalaw orayı Korrupciyaǵa qarsı gúresiw agentligi menen birgelikte:
a) Korrupciyaǵa qarsı gúresiw agentliginiń buyırtpası tiykarında basshılıq lawazımlarında islep atırǵanlar hám usı lawazımlar ushın rezervte turǵanlardıń korrupciyaǵa qarsı turaqlılıq dárejesin bahalaw mexanizmin engizsin;
b) mámleketlik xızmetkerlerde korrupciyaǵa mawasasız qatnastı sińdiriw boyınsha qádiriyatlar sistemasın qáliplestiriw boyınsha izertlewler alıp barıw tiykarında tásirsheń ilajlardı engiziwge baylanıslı usınıslardı islep shıqsın;
v) mámleketlik xızmetkerler hár bir sırt elge xızmet saparlarınıń juwmaqları boyınsha esabat tapsıradı hám esabat tiykarında xızmet saparınıń nátiyjeliligi bahalanıp barıladı.
9. 2026-jıl 1-yanvardan baslap:
a) tómendegi tiykarǵı baǵdarlarda erisilgen nátiyjeler boyınsha Mámleketlik uyımlardıń belsendiliginiń milliy reytingi engiziledi:
(I) mámleketlik uyımlardıń insan resursların basqarıw hám rawajlandırıw nátiyjeliligi;
(II) mámleketlik xızmetlerdi kórsetiwdiń operativliligi hám sapası;
(III) mámleketlik uyımlar hám shólkemler jumısınıń ashıq-aydınlıǵı;
(IV) mámleketlik uyımlar hám shólkemlerde korrupciyaǵa qarsı gúresiw jumıslarınıń nátiyjeliligi;
(V) mámleketlik uyımlardıń hám shólkemler jumısınıń sanlastırılǵanlıq dárejesi;
(VI) respublikalıq hám jergilikli atqarıw hákimiyatı uyımları basshıları hám olardıń orınbasarlarınıń jumıs nátiyjeliligi;
(VII) normativlik huqıqıy hújjetler menen engizilgen hám mámleketlik uyımlar hám shólkemlerdiń jumısına baylanıslı bolǵan basqa da reytingler;
b) reyting nátiyjeleri boyınsha tómengi buwındaǵı mámleketlik uyımlardıń jumıs usılların ózgertiw, basqarıw processlerin optimallastırıw (BPR-reinjiniring) ilajları ámelge asırıladı hám Húkimet májilislerinde basshılardıń jumısına baha beriledi.
10. Tómendegiler:
a) Mámleketlik xızmetti rawajlandırıw agentligi respublikalıq hám jergilikli atqarıw hákimiyatı uyımları jáne xojalıq birlespeleri basshıları hám olardıń orınbasarları, sonday-aq, xızmetkerleriniń jumıs nátiyjeliligin bahalaw tarawında muwapıqlastırıwshı mámleketlik uyım esaplanatuǵını;
b) respublikalıq hám jergilikli atqarıw hákimiyatı uyımları jáne xojalıq birlespeleri basshıları hám olardıń orınbasarları, sonday-aq, jumısınıń nátiyjeliligin bahalaw, sonıń ishinde, eń áhmiyetli nátiyjelilik kórsetkishlerin belgilew máselelerine baylanıslı normativlik-huqıqıy hújjetler joybarları Mámleketlik xızmetti rawajlandırıw agentligi menen májbúriy tártipte kelisiletuǵını belgilensin.
11. 2025-jıl 1-sentyabrden baslap mámleketlik xızmetkerlerdiń óz kónlikpelerin turaqlı rawajlandırıp barıwı hám olar arasında óz-ara sóylesiwdi kúsheytiw boyınsha tómendegi imkaniyatlardı názerde tutatuǵın «Mámleketlik xızmetker» mobil qosımshası iske qosılsın:
a) aralıqtan turıp mámleketlik xızmetkerlerdiń kompetenciyaların rawajlandırıw hám mamanlıǵın arttırıw hám bul boyınsha statistikalıq maǵlıwmatlardı qáliplestiriw;
b) mámleketlik xızmetkerler tárepinen mámleketlik uyımnıń jumısın jetilistiriw boyınsha baslamalar beriw hám basshı tárepinen olarǵa múnásibet bildiriw;
v) mámleketlik xızmetkerdiń jeke rawajlanıw rejesin dúziw, onıń orınlanıwın monitoring etiw;
g) xızmetker haqqındaǵı maǵlıwmatlar, basshı xızmetkerler ushın olar tárepinen muwapıqlastırılatuǵın taraw hám bólimler, baylanısıw ushın telefon nomeri, pochtası hám sociallıq tarmaqlardaǵı betleri haqqındaǵı maǵlıwmatlardı názerde tutatuǵın maǵlıwmatlar bazasın jaratıw.
V. Mámleketlik xızmettiń imidjin jaqsılaw hám mámleketlik xızmetkerler ushın múnásip sharayatlar jaratıw.
12. Birlesken Milletler Shólkemi tárepinen 23-iyun kúni – BMShtıń Mámleketlik xızmet kúni dep járiyalanǵanlıǵı hám usı kúnde mámleketlik xızmettiń áhmiyetin sáwlelendiriwge baylanıslı arnawlı ilajlar shólkemlestiriwge shaqırılǵanlıǵı maǵlıwmat ushın qabıl etilsin.
a) arnawlı ilajlar sheńberinde hár jılı:
(I) hárbir ministrlik hám uyımlar (tarmaq hám baǵdarlar) tárepinen jıl dawamında erisilgen nátiyjeler, tarawda puqaralarǵa jaratılıp atırǵan qolaylıqlar hám keleshektegi wazıypalar interaktiv túrde keń jámiyetshilikke jetkeriletuǵını;
(II) eń úlgili mámleketlik xızmetkerlerdiń jumısı, mámleketlik xızmetkerlerdiń bir kúni haqqında videorolik hám filmler kórsetiw ótkeriletuǵını;
(III) hár bir ministrlik hám uyımlarda mámleketlik xızmetkerleridiń shańaraq aǵzaları ushın “shańaraq kúni” ilajları(family day) shólkemlestirletuǵını.
b) Mámleketlik xızmetti rawajlandırıw agentligi hár jılı shólkemlestiriw usınıs etiletuǵın arnawlı ilajlar dizimin tastıyıqlap baratuǵını belgilep qoyılsın.
13. Mámleketlik uyımlardıń insan resursların rawajlandırıw hám basqarıw bólimleriniń jumısın nátiyjeli jolǵa qoyıwdıń tómendegi mexanizmleri engizilsin:
a) bul bólimler mámleketlik uyımlardıń wazıypalarınıń nátiyjeli orınlanıwın támiyinley alatuǵın insan resurslarınıń san hám sapa quramın qáliplestiriw jáne turaqlı rawajlandırıp barıwǵa qaratılǵan insan resursların strategiyalıq rejelestiriw jumısına juwapker etip belgilenedi;
b) insan resursların basqarıwǵa baylanıslı maǵlıwmatlar hám hújjetler tek ǵana «hrm.argos.uz» platformasında qáliplestiriledi hám júrgiziledi;
v) insan resursların rawajlandırıw hám basqarıw bólimleriniń basshıları:
(I) kadrlar siyasatı boyınsha baslıqtıń másláhátshisi statusına iye boladı;
(II) Mámleketlik xızmetti rawajlandırıw agentligi yaki onıń filialları menen kelisilgen halda lawazımǵa tayınlanadı hám lawazımınan bosatıladı;
(III) hár úsh jılda Mámleketlik xızmetti rawajlandırıw agentligi tárepinen attestaciyadan ótkeriledi;
g) mámleketlik uyımlar tárepinen insan resursların rawajlandırıw hám basqarıw bólimleri xızmetkerlerine nızamshılıq hújjetlerinde názerde tutılmaǵan funkciya hám wazıypalar júklewge jol qoyılmaydı.
14. Mámleketlik xızmetkerler arasında salamat turmıs tárizin úgit-násiyatlaw maqsetinde:
a) 2025-jıl 1-avgusttan baslap mámleketlik uyımlar hám shólkemlerde hár jumıs kúniniń belgili bir waqıtlarında denetárbiya hám háreket aktivligi boyınsha ilajlar ótkerip barılsın;
b) Mámleketlik uyımlar xızmetkerlerdiń wákillikli uyımları menen birgelikte:
(I) imkaniyatınan kelip shiqqan halda shólkem aymaǵında sport zonaların shólkemlestirsin;
(II) xızmetkerler dene tárbiyası menen shuǵıllanıwı ushın zárúr sharayatlar jaratılıwın támiyinlesin;
(III) sport úgit-násiyatlawshıları tárepinen xızmetkerler arasında dene salmaǵı indeksi ólshep barılıwın jáne hár bir xızmetker boyınsha maǵlıwmatlardıń «hrm.argos.uz»platformasına turaqlı kirgizip barılıwın támiyinlesin;
(IV) xızmetkerler arasında salamat turmıs tárizine ámel etiw boyınsha zárúr ilajlardı ámelge asırıp barsın.
IV. Shólkemlestiriw ilajları.
Mámleketlik xızmetti rawajlandırıw agentligi Ekonomika hám qarjı ministrligi, Ádillik ministrligi hám Sırtqı isler ministrligi menen birgelikte úsh ay múddette Sırt el xızmet saparlarınıń nátiyjeliligin bahalaw metodikasın tastıyıqlaw boyınsha Ministrler Kabinetiniń qararı joybarın kirgizsin.
Sanlı texnologiyalar ministrligi mápdar ministrlikler hám uyımlar menen birgelikte úsh ay múddette Sanlı texnologiyalardı rawajlandırıw qorınıń qarjıları esabınan Mámleketlik uyımlar belsendiliginiń milliy reytingi elektron platformasın islep shıqsın hám platformanıń iske qosılıwın, sonday-aq, basqa da uyımlardıń málimleme sistemaları menen integraciyalanıwın támiyinlesin.
Ekonomika hám qarjı ministrligi Kámbaǵallıqtı qısqartıw hám bántlik ministrligi, Mámleketlik xızmetti rawajlandırıw agentligi menen birgelikte 2026-jıl 1-yanvardan baslap mámleketlik xızmetkerlerdiń lawazımlıq miynet haqısın olardıń jumıs tájiriybesi, ilimiy hám mamanlıq dárejesi, nátiyjeliligi hám basqa da kórsetkishlerinen kelip shıǵıp, birden-bir princip tiykarında qáliplestiriw boyınsha 2025jıl 1-noyabrge shekem mámleketlik xızmetkerlerdiń aylıq miynet haqı sistemasın túp-tiykarınan jetilistiriwge baylanıslı Ózbekstan Respublikası Prezidenti Pármanınıń joybarın kirgizsin.
18. Mámleketlik xızmetti rawajlandırıw agentliginiń bar shtat birlikleri sheńberinde mámleketlik xızmetkerlerdiń ádep-ikramlılıq qaǵıydalarına qayshı is-háreketleriniń aldın alıwǵa qaratılǵan jumıslardı muwapıqlastırıw wazıypasın atqaratuǵın ádep-ikramlılıq komissiyaları menen islesiw boyınsha bólimsheni shólkemlestirsin.
19. Mámleketlik xızmetkerler arasında salamat turmıs tárizin engiziw maqsetinde:
a) Sport ministrligi Ózbekstan kásiplik awqamları federaciyası, Mámleketlik xızmetti rawajlandırıw agentligi menen birgelikte úsh ay múddette denetárbiya hám háreket aktivligi boyınsha usınıs ilajlar hám ásbap-úskenelerdiń dizimin jáne olardıń normaların tastıyıqlasın;
b) Densawlıqtı saqlaw ministrligi 2026-jıl 1-yanvardan baslap mámleketlik xızmetkerlerdiń jılına keminde bir márte medicinalıq tekseriwden ótkeriliwin shólkemlestirsin;
v) Sanlı texnologiyalar ministrligi Mámleketlik xızmetti rawajlandırıw agentligi menen birgelikte úsh ay múddette “hrm.argos.uz” platformasında xızmetkerlerdiń dene salmaǵı indeksin kirgizip barıw imkaniyatların jaratsın;
g) mámleketlik uyımlar 2026-jıl 1-yanvardan baslap ózlerine tiyisli asxanalardı tolıq aucorsing tiykarında shólkemlestirsin, olarda salamat awqatlanıwdı keńnen engizsin hám mazalı zatlar, maylı, qamırlı azıq-awqat ónimleri hám taǵamlar, sonday-aq, insan salamatlıǵına unamsız tásir etiwshi basqa túrdegi ónimlerdiń sawdasın sheklesin;
d) Densawlıqtı saqlaw ministrligi Mámleketlik xızmetti rawajlandırıw agentligi menen birgelikte úsh ay múddette mámleketlik xızmetkerlerdi medicinalıq tekseriwden ótkeriw tártibin jáne mámleketlik uyımlardıń asxanalarına qoyılatuǵın talaplardı hám salamat awqatlanıw normaların tastıyıqlaw ilajların kórsin.
20. Mámleketlik xızmetkerlerge mámleketlik xızmet lawazımlarınıń mamanlıq dárejeleri beriliwin támiyinlew maqsetinde:
a) mámleketlik uyımlardıń basshıları 2025-jıl 1-noyabrge shekem mámleketlik xızmetkerlerge, burınǵısınan basqasha tárizde, bir márte, olar iyelep turǵan lawazımǵa muwapıq, biraq olardaǵı házirgi arnawlı ataqlardan (dáreje yamasa mamanlıq dárejelerinen) tómen bolmaǵan mámleketlik puqaralıq xızmeti lawazımlarınıń mamanlıq dárejeleri beriliwin támiyinlesin;
b) mámleketlik puqaralıq xızmeti lawazımlarınıń mamanlıq dárejeleri ushın qosımsha tólemler engizilgenge shekem mámleketlik xızmetkerlerge ámeldegi arnawlı ataqları (dáreje hám mamanlıq dárejesi) boyınsha qosımsha tólemler (ústeme, haqı) tólew dawam ettiriledi.
21.Tómendegiler:
a) Mámleketlik puqaralıq xızmetin 2030-jılǵa shekem rawajlandırıw strategiyası 1-qosımshaǵa muwapıq;
b) Mámleketlik puqaralıq xızmetin 2030-jılǵa shekem rawajlandırıw strategiyasınıń maqsetli kórsetkishleri 2-qosımshaǵa muwapıq;
v) Mámleketlik puqaralıq xızmetin 2030-jılǵa shekem rawajlandırıw strategiyasın ámelge asırıw boyınsha 2025-2026-jıllarǵa mólsherlengen ilajlar baǵdarlaması 3-qosımshaǵa muwapıq;
g) Mámleketlik puqaralıq xızmeti engiziletuǵın mámleketlik uyımlar hám shólkemlerdiń dizimi 4-qosımshaǵa muwapıq;
d) Respublikalıq, aymaqlıq hám rayon dárejesindegi mámleketlik uyımlar mámleketlik puqaralıq xızmeti lawazımlarınıń mámleketlik reestri 5-qosımshaǵa muwapıq;
e) Milliy dárejedegi mámleketlik uyımlar mámleketlik puqaralıq xızmeti lawazımlarınıń mámleketlik reestri 5a-qosımshaǵa muwapıq;
j) Mámleketlik puqaralıq xızmeti lawazımın iyelew ushın tańlaw ótkeriw tártibi haqqındaǵı reje 6-qosımshaǵa muwapıq;
z) Milliy kadrlar rezervin qáliplestiriw hám júrgiziw tártibi haqqındaǵı reje 7-qosımshaǵa muwapıq;
i) Mámleketlik puqaralıq xızmetkerlerine mamanlıq dárejelerin beriw tártibi haqqındaǵı reje 8-qosımshaǵa muwapıq;
k) Mámleketlik puqaralıq xızmetkerlerdiń kásiplik kompetenciyaların úzliksiz túrde arttırıw tártibi haqqındaǵı reje 9-qosımshaǵa muwapıq tastıyıqlansın.
VII. Pármannıń orınlanıwın shólkemlestiriw, támiyinlew hám qadaǵalaw
22.Ózbekstan Respublikası Prezidentiniń ayırım hújjetlerine 10-qosımshaǵa muwapıq ózgerisler hám qosımshalar kirgizilsin.
23.Ózbekstan Respublikası Prezidentiniń ayırım hújjetleri 11-qosımshaǵa muwapıq óz kúshin joyıtqan dep esaplansın.
24.Mámleketlik xızmetti rawajlandırıw agentligi Ádillik ministrligi menen birgelikte úsh ay múddette nızamshılıq hújjetlerine usı pármannan kelip shıǵatuǵın ózgerisler hám qosımshalar haqqında usınıslardı kirgizsin.
25.Usı pármannıń orınlanıwın qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidentiniń keńesgóyi Ǵ.Ǵ.Mirzaevqa júklensin.

Ózbekstan Respublikası
Prezident Sh.MIRZIYoEV
Tashkent qalası,
2025-jıl 19-iyun