Sud-huqıq tarawında puqaralardıń múrájatların tikkeley tıńlaw, olarǵa huqıqıy másláhátler beriw hám mashqalaların sheshiwge járdemlesiw – mámleketlik uyımlardıń tiykarǵı wazıypalarınan biri bolıp esaplanadı. Usı tiykarda, Qaraqalpaqstan Respublikası sudı tárepinen jolǵa qoyılǵan onlayn qabıllawlar puqaralar ushın úlken qolaylıq jaratıp atırǵanın ayrıqsha atap ótiw zárúr.

Fizikalıq jaqtan sud imaratına barıw imkaniyatı bolmaǵan yamasa alıs aymaqta jasaytuǵın puqaralar onlayn sóylesiw arqalı óz mashqalasın ańsat jetkeriw imkaniyatına iye bolmaqta. Bul bolsa, sud sistemasınıń adamlardıń ishine tereń kirip barıwı, xalıqtıń dártin tıńlawı hám turmıslıq mashqalalardı ádillik tiykarında sheshiwge umtılıwınan dárek beredi.
Qaraqalpaqstan Respublikası sudınıń baslıǵı Kamal Tarixov tárepinen Ámiwdárya hám Tórtkúl rayonlarında jasawshı puqaralar ushın onlayn qabıllaw shólkemlestirildi. Bul qabıllawda xalıqtıń sud-huqıq máselelerine baylanıslı múrájatları tıńlandı hám olarǵa huqıqıy sheshimler menen birge ámeliy usınıslar berildi.
Videokonferenc-baylanıs rejiminde shólkemlestirilgen onlayn qabıllawda puqaralar ózlerin qızıqtırǵan huqıqıy máseleler, sonıń ishinde, miyras, shańaraqlıq kelispewshilikler, múlk huqıqları, jumıstan bosatıw, sud qararların orınlawǵa baylanıslı mashqalalar boyınsha múrájatlar jolladı.
Sud baslıǵı tárepinen hár bir múrájat ayrıqsha kórip shıǵılıp, puqaralarǵa nızamshılıq sheńberinde tiykarlanǵan túsinikler berildi. Ayırım jaǵdaylarda múrájat etiwge tiykar bolǵan jaǵdaylar boyınsha sud hújjetleri qayta úyreniliwi hám tiyisli uyımlarǵa ótinish xatı jiberiliwi belgilendi.
Onlayn qabıllaw procesinde puqaralardıń huqıqıy sawatlılıǵın arttırıw maqsetinde, olarǵa ámeldegi milliy nızamshılıq, puqaralıq-processual hám hákimshilik is júrgiziw tártipleri, múrájat etiw huqıqları haqqında qosımsha maǵlıwmatlar da berildi.
-Biziń baslı maqsetimiz puqaralar menen ashıq sáwbetlesiw, sud uyımları hám xalıq arasında ashıq-aydınlıq, isenim hám óz-ara pikirlesiwdi kúsheytiwge qaratılǵan,- deydi Qaraqalpaqstan Respublikası sudınıń baslıǵı Kamal Tarixov.
Bunday baslamalar puqaralardıń uzaǵın jaqın etiw, awırın jeńilletiw hám eń áhmiyetlisi – sud uyımları jumısınıń ashıqlıǵı hám puqaralardıń sudqa bolǵan isenimin bekkemlewde áhmiyetli faktor bolıp esaplanadı.

Qaraqalpaqstan xabar agentligi