Prezident Shavkat Mirziyoev Yakkabaǵ rayonında qurılǵan “Jańa Ózbekstan” massivin barıp kórdi.

Xalıqtıń abadanlıǵı hám turmıs mádeniyatın arttırıwǵa qaratılǵan bul massiv aldınǵı qala qurılısı sheshimleri tiykarında qurılǵan. Kóp qabatlı turaq jaylar kórkemligi, tártipliligi hám abadanlıǵı menen rayon kórinisin ózgertip jiberdi. 18 gektar maydandı iyelegen massivte 54 bes qabatlı turaq jaylar qurılıp, 1 mıń 400 kvartira xalıqqa beriledi.
Imaratlar tek ǵana zamanagóy arxitekturası emes, al xalıq ushın jaratılǵan infrastrukturanıń qolaylıǵı menen de ajıralıp turadı. Hár bir úy zamanagóy kommunikaciya tarmaqları, átirapı bolsa balalar maydanshaları hám avtomobil turatuǵın orınlar menen támiyinlengen.
Sonıń menen birge, aymaqta qurılǵan úsh qabatlı “Eko bazar” qurılǵan. Ol arqalı jergilikli diyqanlar óz ónimlerin tikkeley tutınıwshılarǵa jetkeriw imkaniyatına iye. Bul bolsa hám sapa, hám baha jaǵınan adamlarǵa maqul bolmaqta. Bazarda 640 jumıs ornı jaratılǵan.
Mámleketimiz basshısı bul ekobazarda jaratılǵan sharayatlardı kózden ótkerdi, satıwshı hám qarıydarlar menen sóylesti.
– Bazarlar molshılıq, abadanlıq hám xalıqtıń mádeniyatın kórsetedi. Yakkabaǵda usınday abat orın qurılǵanı quwanıshlı. Xalqımızdıń satıp alıw qábileti, bazar mádeniyatı artıp barmaqta. Soǵan múnásip bunday qolaylı sawda orayların kóbeytiw kerek,-dedi Prezident.
Ayrıqsha itibarǵa ılayıq tárepi, massivtegi infrastruktura imaratlarına quyash panelleri hám geliokollektorlar ornatılǵan. Bul bolsa energiyanı únemlew hám úzliksizlik, ekologiyalıq qáwipsizlikti támiyinlewde áhmiyetli faktor bolmaqta.
Xalıqtıń dem alıwı, balalar hám jaslardıń belsendi waqıt ótkeriwi ushın da qolaylıqlar jaratılǵan. Atap aytqanda, seyil etiw orınları, balalar baqshası, sport maydanshaları, salamatlandırıw orayları hám servis punktleri birden-bir koncepciya tiykarında qurılǵan.
Juwapkerlerge usı koncepciya tiykarında basqa rayon orayları hám massivlerdi de rawajlandırıw boyınsha kórsetpeler berildi.

ÓzA