Iran húkimeti dáldalshılar arqalı Izrail hám AQShtan áskeriy háreketlerdi jedellik penen toqtatıwdı soradı. Bul haqqında Jaqın Shıǵıs hám Evropa rásmiylerine súyenip The Wall Street Journal xabar berdi. Rásmiylerdiń málim etiwinshe, eger AQSh Izraildıń hújimlerine qatnaspasa, Iran Vashington menen yadrolıq sóylesiwlerdi qayta baslawǵa tayar. Iran, sonday-aq, Izrailge zorlıqtı toqtatıw hár eki táreptiń máplerine sáykes keletuǵının bildirgen.

Rossiyada prezident Vladimir Putinniń tapsırmasına bola 7 jastan úlken balalar ushın dronlardı basqarıw boyınsha jarıslar ótkeriledi. 2026-jıldan baslap ótkeriletuǵın balalar ushın Pútkilrossiya jarısları “Keleshek ushıwshıları” dep ataladı. Putin tapsırmasına bola, bunday jarıslarda qatnasıw ushın minimal jas 10 jastan 7 jasqa túsiriledi. Qatnasıwshılarǵa “dronlar jarısı” sport túri boyınsha ataq hám razryadlar beriw jolǵa qoyıladı.
Rossiya 17-iyunǵa ótetuǵın túnde Ukraina paytaxtı Kievke dronlar menen keń kólemli soqqı berdi. Waqıya aqıbetinde 14 adam qaytıs boldı. Málim etiliwinshe, hádiyse aqıbetinde 40 tan aslam adam jaraqatlanǵan. Solomenskiy rayonındaǵı eki turaq jay imaratı zıyanlanǵan, olardıń keminde birewinde órt kelip shıqqan, ekinshisinde bolsa imarat konstrukciyaları wayran bolǵan. Qutqarıwshılar búlingen jerler astınan adamlardı izlew jumısların alıp barmaqta.
Braziliyada eki jasar bala ákesiniń quralı menen oynap, tosattan anasına oq attı. Waqıya aqıbetinde 27 jastaǵı Debora Rodriges qaytıs boldı. Oq dawısınan keyin hayal shok jaǵdayında, ornınan turıp, denesindegi jaraqatlardı kózden ótkergen. Ol bir neshe adım júrdi de, jıǵıldı. Onıń ómirlik joldası birinshi járdem kórsetiwge urınǵan. Hayal emlewxanaǵa alıp ketilgen, biraq shıpakerler onıń ómirin saqlap qala almaǵan.
Izrail bas ministri Binyamin Netanyaxu Iran joqarı basshısı Xomanaiydiń óltiriliwi mámleket penen kelispewshilikke shek qoyatuǵının ayttı. Netanyaxudıń aytıwınsha, Islam respublikası “Jaqın Shıǵıstaǵı hámmege qorqınısh salmaqta hám dúnyanı yadro urısı jaǵasına alıp kelmekte”. Izrail bolsa “jawızlıq kúshlerine qarsı turıw arqalı bul agressiyaǵa shek qoyıw niyetinde”.
Hindstannıń Nagpur qalasında IndiGo aviakompaniyasına qaraslı samolyot bortta bomba bar ekenligi haqqındaǵı qáwip sebepli dárhal jerge qondırıldı. Málim etiliwinshe, samolyot Kochi qalasınan paytaxt Nyu-Delige ushıp baratırǵan bolǵan. Jolawshılar ayrıqsha jaǵdaydan keyin evakuaciya etilgen. Samolyot tekseriwden ótkerilgen, biraq gúmanlı predmetler anıqlanbaǵan. Házirgi waqıtta bomba haqqındaǵı maǵlıwmat dáregi hám qáwiptiń isenimliligi boyınsha tergew alıp barılmaqta.

Iroda Jwraeva, Uluǵbek Twxtaev, ÓzAnıń xabarshıları