Shanxay birge islesiw shólkemine aǵza mámleketlerdiń málimleme-kommunikaciya texnologiyaların rawajlandırıw áhmiyetli hám strategiyalıq áhmiyetke iye.
ShBShǵa aǵza mámleketlerde málimleme-kommunikaciya texnologiyaların rawajlandırıw – tek ǵana ishki emes, al regionallıq turaqlılıq hám qáwipsizlikti támiyinlew ushın da úlken áhmiyetke iye. Bul mámleketler sanlı infrastruktura, kiberqáwipsizlik, elektron húkimet hám jasalma intellekt tarawlarında birge islesiwdi kúsheytip, zamanagóy sanlı dúnyada óz ornın bekkemlewge umtılmaqta. Óz-ara tájiriybe almasıw, birgeliktegi joybarlar hám innovaciyalıq baslamalar – ShBSh mámleketlerin ulıwma sanlı keleshekke qaray jeteklewshi tiykarǵı faktorlardan bolıp esaplanadı.
Shinjon-Uyǵur avtonom rayonı Karamay qalasında Shanxay Birge islesiw Shólkemine aǵza mámleketlerdiń málimleme-kommunikaciya texnologiyaların rawajlandırıwǵa juwapker ministrlikler hám uyımlar basshılarınıń gezektegi májilisi bolıp ótti.
Bul ushırasıw dawamında ShBSh sheńberinde sanlı transformaciya processlerin jedellestiriw, jasalma intellekt, úlken maǵlıwmatlar, bultlı esaplawlar, aqıllı qala texnologiyaları sıyaqlı aldınǵı sanlı sheshimlerdi engiziw sıyaqlı máseleler kórip shıǵıldı. Sonday-aq, málimleme qáwipsizligi, sanlı infrastruktura, mámleketlik basqarıw hám sanlı ekonomika tarawlarında birge islesiwdi keńeytiw dodalandı.
Ilajǵa Ózbekstan Respublikası Sanlı texnologiyalar ministri Sherzod Shermatov qatnastı.
Májilis juwmaǵında ShBShǵa aǵza mámleketler arasında sanlı transformaciya tarawında birge islesiwdi bekkemlewge qaratılǵan Háreketler rejesi qabıl etildi.
N.Rahmonova, ÓzA