Prezident qararı hárekette

Mámleketimiz basshısınıń 2021-jıl 18-sentyabrdegi “Islam rawajlanıw banki hám OPEK xalıqaralıq rawajlanıw qorınıń qatnasıwında “Awıllıq jerlerdi turaqlı rawajlandırıw” joybarın ámelge asırıw ilajları haqqında”ǵı qararınıń orınlanıwı sheńberinde Nókis rayonında keń kólemli dóretiwshilik jumısları alıp barılmaqta. Bunı “Diyqan arna” mákan puqaralar jıyınında qurılıp atırǵan zamanagóy awıllıq shıpakerlik punkti mısalında da kóriw múmkin.
Joybar ushın 3 milliard 40 million sum qarjı ajıratılǵan bolıp, qurılıs jumısları “Shoraxonqurilishmontaj” JShJ tárepinen ámelge asırılmaqta.
Házirgi waqıtta qurılısshılar imarattıń ishki bólegin boyaw, pardozlaw, átiraptı abadanlastırıw sıyaqlı jumıslar menen bánt.
Maǵlıwmat ornında aytıp ótiw kerek, 4 mıń 300 den aslam xalıq jasaytuǵın máhállede bunnan aldın shıpakerlik punkti bolmaǵanı sebepli, puqaralar 10-12 kilometr aralıqtaǵı medicinalıq orayǵa barıwǵa májbúr edi.
Joybar tiykarında rayonda 8 mánzilde sociallıq obektler qurılıwı belgilengenligin atap ótiw kerek.

Qaraqalpaqstan xabar agentligi

ÓzAnıń fotoxabarshısı Maqset Habibullaevtıń túsirgen súwretleri