Joqarı mamanlıqtaǵı sport kadrların tayarlaw, jańa áwlad sportshı hám trenerlerin jetistiriw arqalı mámleketimizdiń sporttaǵı jetiskenliklerin jańa basqıshqa alıp shıǵıw, denetárbiya hám sport tarawında oqıw hám ilimiy-izertlew procesin xalıqaralıq standartlar tiykarında shólkemlestiriw maqsetinde Ózbekstan Respublikası Prezidentiniń 2024-jıldaǵı tiyisli qararına tiykarlanıp Ózbekstan mámleketlik sport akademiyası shólkemlestirildi.

Usı jıldan óz jumısın baslaǵan Sport akademiyası 2025-2026-oqıw jılı ushın hújjet qabıllawdı baslaydı. Akademiya mámleketlik joqarı bilimlendiriw mákemesi statusına iye bolıp, óz jumısında Ózbekstan Respublikası Sport ministrligine boysınadı. Studentlerdi qabıllaw parametrleri respublikadaǵı basqa da joqarı bilimlendiriw mákemeleri ushın belgilengen mámleketlik buyırtpa sheńberinde ámelge asırıladı.
Studentler kontingenti, tiykarınan, olimpiada hám paralimpiya sport túrlerine tayarlaw oraylarında qáliplesip atırǵan sport túrleri boyınsha, sońǵı bir jıl ishinde jáhán, Aziya hám Ózbekstan chempionatlarında jeńimpaz hám sıylı orın iyelegen olimpiada hám paralimpiya kolledjleriniń pitkeriwshileri, sonday-aq, ulıwma orta, orta arnawlı hám professional bilimlendiriw mákemeleriniń pitkeriwshi jasları arasınan selekciya tiykarında tańlap alınadı.

Akademiyanı tamamlaǵanlarǵa Ózbekstan Respublikasında joqarı maǵlıwmat haqqındaǵı hújjet sıpatında tán alınatuǵın diplom beriledi. Studentler respublikadaǵı sport hám ǵalabalıq denetárbiya ilajlarınıń kalendar rejesine muwapıq ótkeriletuǵın respublikalıq jarıslarda tikkeley qatnasıw huqıqına iye boladı.
Sport baǵdarlarında bilim alıp atırǵan studentler jasaw ornı hám azıq-awqat penen arnawlı normativler tiykarında, yaǵnıy, olimpiada hám paralimpiya sport túrlerine tayarlaw oraylarınıń standartlarına muwapıq támiyinlenedi.

Pitkeriwshilerge trenerlik jumısı menen shuǵıllanıw ushın 6 jılǵa ámel etiwshi mamanlıq sertifikatı burınǵısınan basqasha tárizde tikkeley beriledi.

Akademiyanı tamamlaǵan Ózbekstan Respublikası puqaraları Mámleketlik xızmetti rawajlandırıw agentligi tárepinen Milliy kadrlar rezervine, úsh jıllıq jumıs stajına iye bolǵannan keyin – qánigeligi boyınsha basshılıq lawazımlarına tayınlanatuǵın perspektivalı talabanlar dizimine kirgiziledi.
Akademiyada shet tilleri hám Ózbekstan tariyxı tereńlestirilgen tártipte úyretiledi. Usı maqsette Málimleme-kitapxana orayı jáne Tariyx hám shet tillerin oqıtıw orayı shólkemlestirilgen.
Olimpiada hám paralimpiya kolledjleriniń pitkeriwshileri tikkeley ekinshi basqıshqa qabıl etiledi.

Nigora RAHMONOVA,
ÓzA xabarshısı