Paytaxtımızdaǵı “Doslıq” kanalı boyında Qaraqalpaqstan Respublikası shańaraq hám hayal-qızlar komiteti , “Ónerment” birlespesi Qaraqalpaqstan Respublikası basqarması hám Nókis qalası hákimligi menen birgelikte “Milliy kiyimler” kórgizbe-yarmarkası shólkemlestirildi.

Ilaj sheńberinde, milletler aralıq tatıwlıq, doslıqtı bekkelew, xalqımızdıń ázeliy qadiriyatlarınan biri bolǵan kesteshilik, milliy kiyimler, gúl basılǵan gezlemeler, estelik buyımları, ápiwayı metaldan zergerlik buyımların tayarlaw, qolda gilem toqıw hám basqada túrdegi ónimlerden ibarat ónermentler kórgizbesi usınıldı.
Sonday-aq, ónermentlerdiń milliy kiyimler moda kórgizbesi, qol miynetleri menen islengen ónimleriniń sawda-yarmarkası hám kestelengen ónimler tańlawı, tájiriybeli ónermentlerdiń sheberlik sabaqları da shólkemlestirildi. Ásirese, ustaz-shákirt principi tiykarında alıp barılıp atırǵan miynetlerdiń jemisi ilajda kózge taslanıp turdı.
-Bunday ilajlardıń ótkeriliwi biz ónermentlerdiń bir-birimiz benen tájiriybe almasıwımızǵa tiykar jaratadı. Ásirese, ata-babalarımızdan miyras bolıp qalǵan qol ónermentshiligi, kesteshilik, milliy naǵıslardı ele de úyrenip, zamanagóylestirip, xalqımızǵa jetkerip beriw biz ónermentlerdiń tiykarǵı wazıypası esaplanadı. Bul baǵdarda biz ustazlardan ele de úyrenetuǵınlarımız kóp,-deydi ilajda birinshi orınǵa ılayıq dep tabılǵan ónerment Mehriban Jumaniyazova.
Ilaj sońında kórgizbe-yarmarka sheńberinde shólkemlestirilgen tańlaw jeńimpazları shólkemlestiriwshiler tárepinen diplom hám estelik sawǵaları menen sıylıqlandı.

Qaraqalpaqstan xabar agentligi

M.Habibullaevtıń túsirgen súwretleri