Jenevada ótip atırǵan Sociallıq ádillik boyınsha Global koaliciyanıń forumı sheńberinde «Birge islesiwshilerdiń sáwbeti – insan huqıqları ekonomikası» temasında bolıp ótken paneldi dodalaw boyınsha Senat Baslıǵı Tanzila Norboeva rásmiy bayanat penen qatnastı.

Senat baslıǵı Ózbekstan Prezidentiniń baslaması menen turmısqa engizilip atırǵan «Ózbekstan – 2030» strategiyası sheńberinde insan huqıqların támiyinlew, sociallıq ádillikti bekkemlew hám hár bir puqaraǵa múnásip turmıs sharayatların jaratıwǵa ayrıqsha itibar qaratılıp atırǵanın atap ótti.
Bayanatta ekonomikalıq hám sociallıq siyasat puqaralardıń máplerine xızmet etiwi, insan huqıqları bolsa inklyuziv hám turaqlı ekonomikanıń negizine aylanıwı kerek ekenligi ayrıqsha atap ótildi.
Atap ótilgenindey, Ózbekstan insan potencialın rawajlandırıw, korrupciyaǵa qarsı gúresiw, nátiyjeli basqarıw hám ekologiyalıq turaqlılıqqa erisiwdi tiykarǵı ústinlik dep biledi. Bul principler insan huqıqlarına tiykarlanǵan ekonomika procesi menen sáwlelendiriledi.
Sońǵı jılları Ózbekstan miynet huqıqları tarawında áhmiyetli nátiyjelerge eristi. XMShnıń barlıq tiykarǵı hám ayrıqsha konvenciyaları ratifikaciyalandı. 2023-jılı qabıl etilgen jańa Konstituciya hám Miynet kodeksinde usı xalıqaralıq standartlar óz kórinisin tapqan. Ásirese, hayal-qızlar, jaslar hám ázzi toparlardıń máplerin qorǵaytuǵın jámáátlik kelisim institutı kúsheytildi.
Sonday-aq, sociallıq qorǵawǵa tek ǵana jeńillik emes, al fundamental huqıq sıpatında qaralıp atırǵanı atap ótildi. XMSh menen birgelikte islep shıǵılǵan “2030-jılǵa shekem sociallıq qorǵaw boyınsha milliy strategiya” universallıq qamtıp alıw, sociallıq xızmetler, sociallıq qamsızlandırıw hám miynet bazarındaǵı jedel ilajlardı názerde tutadı.
Bayanat juwmaǵında insan huqıqları principlerin globallıq finanslıq basqarıw sistemalarına tereń integraciyalaw zárúr ekenligi atap ótildi. Bunday qatnasıq Turaqlı rawajlanıw maqsetlerine erisiw hám “hesh kim itibardan shette qalmawı” principin ámelge asırıwda áhmiyetli orın tutadı.
Ilaj dawamında BMShtıń Insan huqıqları boyınsha Joqarı komissarı basqarması sońǵı jıllarda Ózbekstanda insan huqıqları tarawında erisilgen unamlı tájiriybeni atpa ótti.
Ózbekstan birge islesiwge tayar ekenin, tájiriybe almasıwǵa ashıq ekenin hám hár bir siyasat, byudjet hám reforma insan huqıqların esapqa alǵan halda islep shıǵılıwı kerek, degen isenimli poziciyasın jáne bir márte tastıyıqladı.
***
Jenevaǵa saparı sheńberinde Senat Baslıǵı, Adam sawdasına qarsı gúresiw hám múnásip miynet máseleleri boyınsha milliy komissiyanıń baslıǵı Tanzila Norboeva XMShtıń Xalıqaralıq miynet standartları departamentiniń direktorı Korin Varga menen ushırastı.
Onda Ózbekstan xalıqaralıq miynet konvenciyaların ratifikaciyalaw boyınsha sistemalı jumıslardı alıp barıp atırǵanı atap ótildi. Sonıń ishinde, búgingi kúnge shekem 25 konvenciya hám 1 protokol ratifikaciyalanǵan.
Bıyılǵı sapar etiw juwmaqları boyınsha XMSh departamentiniń usınısların esapqa alǵan halda arnawlı “jol kartası” islep shıǵılatuǵını atap ótildi. Ózbekstanda múnásip miynet boyınsha 2021-2025-jıllarǵa mólsherlengen mámleketlik baǵdarlamanı ámelge asırıw sheńberinde barlıq rejeler, sonıń ishinde, miynet inspekciyası institutın bunnan bılay da rawajlandırıw boyınsha wazıypalar orınlanbaqta.
K.Varga Ózbekstannıń miynet huqıqların támiyinlewde erisken jetiskenliklerin joqarı bahaladı. Ózbekstan XMShtıń xalıqaralıq standartlarǵa sadıqlıǵın kórsetip atırǵan isenimli sherigine aylanǵanı atap ótildi. Ózbekstan miynet inspekciyası sisteması basqa mámleketler ushın úlgi bola alatuǵını hám XMSh hár tárepleme qollap-quwatlawdı dawam ettiriwge tayar ekeni atap ótildi.

N.Abduraimova,
ÓzA