Ózbekstan Respublikası Prezidenti Sh.Mirziyoevtiń baslaması menen usı jıldıń 10-12-iyun kúnleri mámleketimiz paytaxtı Tashkent qalasında «Tashkent xalıqaralıq investiciya forumı» bolıp ótken edi.
Forum sheńberinde ótkerilgen sessiyada Prezidentimizdiń járdemshisi Saida Mirziyoeva investorlardı Qaraqalpaqstan aymaǵına kelip, respublikanıń úlken potencialın óz kózleri menen kóriwge hám keń imkaniyatlar kólemin bahalawǵa mirát etti.
Nókis qalasındaǵı Aq quw kompleksinde usı forumnıń dawamı sıpatında Qaraqalpaqstannıń investiciyalıq potencialın tanıstırıwǵa arnalǵan xalıqaralıq investiciya forumı ótkerildi.
Forumda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, húrmetli Prezidentimizdiń ayrıqsha itibarı menen Qaraqalpaqstanda isbilermenlikti rawajlandırıw hám qollap-quwatlaw, investiciyalıq tartımlılıqtı arttırıw boyınsha ayrıqsha qabıl etilgen párman hám qararları tiykarında jaratılǵan imkaniyatlardı keń túrde atap ótti.
Ótkerilgen forumda respublikamızdıń investiciyalıq tartımlılıǵı, jańa joybarlarlardı ámelge asırıw boyınsha bar imkaniyatlar, resurslar potencialı hám basqa da áhmiyetli baǵdarlar haqqında keń túrde túsinikler berildi.
Sonday-aq, ótkerilgen forum sheńberinde kompleks aymaǵındaǵı shólkemlestirilgen arnawlı pavilonda Qaraqalpaqstanda islep shıǵarılǵan ónimler kórgizbesi jıynalǵanlar názerine usınıldı.
-Forum elimizde bar imkaniyatlardı dodalaw, isbilermenlik baylanısların ornatıw hám birgeliktegi joybarlardı ámelge asırıw ushın ózine tán maydanǵa aylandı,-deydi Qaraqalpaqstan Respublikası investiciyalar, sanaat hám sawda ministriniń orınbasarı Akmal Kamalov.
Bunnan soń forum qatnasıwshıları «QORAQALPOQ BASALTWOOL» kárxanası, sonday-aq, I.V.Savickiy atındaǵı Qaraqalpaq mámleketlik kórkem óner muzeyinde bolıp, respublikamızdıń sanaat, turizm baǵdarlarındaǵı imkaniyatları menen jaqınnan tanıstı.
Ilajda Ministrler Keńesiniń Baslıǵı F.Ermanov qatnastı.
Qaraqalpaqstan xabar agentligi