Zergerlik buyımlarınıń bajıxana shegaraları arqalı nızamsız túrde alıp ótiliwine shek qoyıldı.

Qaraqalpaqstan Respublikası Bajıxana basqarmasınıń Kontrabandaǵa qarsı gúresiw bólimi hám “Qaraqalpaqstan” temir jol shegara bajıxana postı xızmetkerleri tárepinen usı postqa 652-sanlı “Beynew-Nókis” jónelisinde háreketlenip kelgen jolawshı poezdınıń 9-vagonında jolawshı sıpatında kiyatırǵan Ózbekstan Respublikası puqarasınıń qol sumkası qalıslardıń qatnasıwında kózden ótkerildi.
Nátiyjede, bajıxana xızmetkeriniń awız-eki sorawında aytılmaǵan, jolawshı bajıxana deklaraciyasında jazıp kórsetilmegen, jasırın túrde alıp ótiwge urınǵan 7 túrdegi 47 dana jámi salmaǵı 140,5 gramm bolǵan altın bahalı metalldan islengen zergerlik buyımların hesh qanday hújjetlersiz Qazaqstan Respublikasınan mámleketimiz aymaǵına alıp kirip atırǵanlıǵı anıqlandı.
“Qaraqalpaqstan” temir jol shegara bajıxana postında anıqlanǵan gezektegi jaǵdayda bolsa, lawazımlı shaxs esaplanıwshı vagon baqlawshısınıń zergerlik buyımların ózi kiyip júrgen shulıǵına jasırıp alıp ótiw sıyaqlı qılıǵına shek qoyıldı.
Qaraqalpaqstan Respublikası bajıxana basqarmasınıń Kontrabandaǵa qarsı gúresiw bólimi xızmetkerleri tárepinen Mámleketlik qáwipsizlik xızmeti Qaraqalpaqstan Respublikası basqarması xızmetkerleri menen birgelikte “Qaraqalpaqstan” temir jol bándirgisinde 649-sanlı “Nókis-Mańǵıstaw” jónelisindegi jolawshı poezdınıń 11-sanlı vagonı kózden ótkerilgende, usı vagon baqlawshısı bolıp ketip baratırǵan puqara ózi kiyip júrgen shulıǵına jasırın túrde jasırıp tiyisli hújjetleri bolmaǵan qara reńli celufan pakette jámi salmaǵı 122,7 g.ǵa teń bolǵan altınnan islengen zergerlik buyımların alıp ótpekshi bolǵanlıǵı anıqlandı.
Qaraqalpaqstan Respublikası bajıxana basqarması tárepinen usı jıldıń basınan berli jámi 7 jaǵdayda 2187 gramm muǵdarında qımbat bahalı taslardan tayarlanǵan zergerlik buyımlarınıń bajıxana shegaraları arqalı nızamsız túrde alıp ótiliwine shek qoyılǵanlıǵın atap ótiw orınlı.
Joqarıda anıqlanǵan jaǵdaylar boyınsha bajıxana uyımları tárepinen tergewge shekem tekseriw háreketleri alıp barılmaqta.

Qaraqalpaqstan xabar agentligi