Ózbekstan Jazıwshılar awqamı tárepinen «Parkent dóretiwshilik úyi»nde Respublikalıq awdarmashılar forumı óz jumısın basladı.

Forum Ózbekstan Respublikası Prezidentiniń 2024-jıl 4-iyundegi «Kórkem awdarma tarawında Muhammad Rizo Agahiy atındaǵı xalıqaralıq sıylıqtı shólkemlestiriw haqqında»ǵı qararınıń orınlanıwı sheńberinde shólkemlestirildi.
Forumǵa kórkem awdarma tarawında miynet etip atırǵan dóretiwshiler, ustazlar, jaslar mirát etildi.
– Kórkem awdarma tarawına Prezidentimiz tárepinen úlken itibar qaratılmaqta, – dedi Ózbekstan Jazıwshılar awqamı baslıǵınıń birinshi orınbasarı, belgili shayır hám jurnalist Minhojiddin Mirzo. – Bul baǵdarda qabıl etilgen qarar tarawdıń rawajlanıwında jańa perspektivalardı ashıp beredi. Oǵan bola, elimizde awdarmashılar ushın Agahiy atındaǵı xalıqaralıq tańlaw járiyalandı. Tańlawǵa ózbek ádebiyatınıń prozalıq shıǵarmalarınan shet tillerge islengen eń jaqsı awdarma, ózbek ádebiyatınıń poeziyalıq shıǵarmalarınan shet tillerge islengen eń jaqsı awdarma, ózbek balalar ádebiyatı úlgilerinen shet tillerge awdarılǵan eń jaqsı awdarma, shet tillerde jaratılǵan prozalıq shıǵarmalardan ózbek tiline islengen eń jaqsı awdarma, shet tillerde jaratılǵan poeziyalıq shıǵarmalardan ózbek tiline islengen eń jaqsı awdarma, shet tillerde jaratılǵan balalar ádebiyatı úlgilerinen ózbek tiline islengen eń jaqsı awdarma úlgileri qabıl etiledi. Bul bolsa ádebiyatımızdı jáhán kólemine alıp shıǵıwda úlken áhmiyetke iye.
Forumda ózbek ádebiyatın dúnya júzinde úgit-násiyatlaw jumısına múnásip úles qosıp atırǵan bir qatar sırt el dóretiwshileri Ózbekstan Jazıwshılar awqamınıń húrmetli aǵzası etip qabıl etildi. Óziniń dóretiwshilik belsendiligi menen ádebiy jámiyetshiliktiń itibarına túsken bir topar awdarmashılarǵa Ózbekstan Jazıwshılar awqamınıń aǵzalıq gúwalıqları tapsırıldı.
Awdarmashılar ánjumanında Respublikalıq Ruwxıylıq hám aǵartıwshılıq orayı janındaǵı Sociallıq-ruwxıy izertlewler institutınıń direktorı, nawayıtanıwshı ilimpaz Olimjon Davlatov, Ózbekstan xalıq jazıwshısı Muhammad Ali, belgili ádebiyattanıwshı ilimpaz, awdarmashı Zuhriddin Isomiddinov, awǵanstanlı tiltanıwshı ilimpaz, publicist Azizullo Aral hám basqalar awdarmashılıq tarawınıń búgingi áhmiyetli máseleleri haqqında hár tárepleme sóz etti.
Sheberlik sabaqların belgili awdarmashılar Tohir Qahhor, Muhiddin Omon, Shermurod Subhon, Begoyim Xolbekova alıp barmaqta.
Kórkem awdarmanıń hár qıylı baǵdarları boyınsha Olimjan Salimov, Azizulloh Orol, Lola Yunus qızı, Kavsar Turdieva, Iqbol Qwshshaeva, Rahmat Bobojon, Bahodir Otashtıń dóretiwshilik bayanatları tıńlandı.
2025-jıl kórkem awdarma tarawında úlken jańalıqlar menen baslanǵanın aytıw kerek. Muhammad Rizo Agahiy atındaǵı xalıqaralıq sıylıq tańlawı járiyalandı. Qırǵızstanda Abdulla Qadiriydiń «Ótken kúnler» romanı qırǵız tilinde basıp shıǵarıldı. Moskvada XX-XXI ásir milliy poeziyamızdıń 122 wákili shıǵarmaları jámlengen «Ózbek poeziyası antologiyası» («Antologiya uzbekskoy poezii») kitabınıń 3-tomı basıp shıǵarıldı.
Ózbekstan Respublikası Prezidentiniń 2025-jıl 7-fevraldaǵı «Ullı shayır hám oyshıl Mir Áliysher Nawayınıń dóretiwshilik miyrasın elimiz hám dúnya kóleminde keńnen úgit-násiyatlaw jáne Nawayı wálayatında «Áliysher Nawayı jılı»n joqarı dárejede ótkeriw ilajları haqqında»ǵı qararınıń orınlanıwı sheńberinde ullı oyshıl shayırdıń shıǵarmaların shet tillerine awdarıp basıp shıǵarıw jumısları baslap jiberilgen. 2025-2027-jıllarǵa mólsherlengen awdarma reje-kestesi islep shıǵıldı. Awdarmashılar toparı awdarılıp atırǵan tiller hám janrlar kesiminde qáliplestirilmekte, awdarmashılar menen islesetuǵın másláhátshi ádebiyattanıwshı ilimpazlar toparı shólkemlestirilmekte.
«Jáhán balalar ádebiyatı dúrdanaları» 100 tomlıq shıǵarmalar toplamın basıp shıǵarıw jumıslarına tayarlıq dawam etpekte. Bul toplamǵa dúnyanıń bes kontinenti – Aziya, Evropa, Afrika, Avstraliya hám Amerika kontinenti balalar jazıwshılarınıń shıǵarmaları kirgiziledi. Házirgi waqıtqa shekem 5 kontinenttegi 65 mámlekette jasaytuǵın 345 avtordıń shıǵarmaları 100 tomlıq joybarǵa kirgizildi.
Házirgi waqıtta Agahiy atındaǵı sıylıq tańlawına shıǵarmalar qabıl etilmekte. Tańlaw saytı iske túsirilgen. Sıylıqqa talabanlardıń ómirbayanı, usınıs etilgen shıǵarmalar haqqındaǵı maǵlıwmatlar usı saytqa jaylastırıp barıladı.
«Parkent dóretiwshilik úyi»nde shólkemlestirilgen Respublikalıq awdarmashılar forumı ámelge asırılatuǵın jumıslardı rejelestirip, aldaǵı wazıypalardı dodalap, sheshimler tabıwda áhmiyetli basqısh wazıypasın atqaradı.

Nazokat Usmonova,
ÓzA xabarshısı