Tashkent qalasında jónelissiz taksi jumısı menen shuǵıllanıwǵa baylanıslı engizilgen sheklew keń jámiyetshilik tárepinen túrli pikir hám narazılıqlarǵa sebep bolmaqta. Oǵan bola, endi hár bir aydawshı óz aymaǵında hám oǵan tutas aymaqta taksi jumısın ámelge asırıwı belgilengen. «Bul tártip Ózbekstan Respublikasınıń jańadan qabıl etilgen Konstituciyasınıń 67-statyasında belgilengen talapqa qayshı keledi», dep múnásibet bildirdi Xalıq demokratiyalıq partiyası.

Partiyanıń atap ótiwinshe, Konstituciyamızǵa muwapıq, mámleket qolaylı investiciyalıq hám isbilermenlik ortalıǵın támiyinleydi. Ózbekstan Respublikası aymaǵında ekonomikalıq mákan birligi, tovarlar, xızmetler, miynet resursları hám finanslıq qarjılardıń erkin háreketleniwi kepillenedi.
Jónelissiz taksi jumısı menen baylanıslı engizilgen sheklew hár qıylı nızamsız jumıslardıń baslanıwına, olardıń erkin jumıs islewine tosqınlıq etiwge, sonday-aq, eń tiykarǵısı puqaralarımızdıń konstituciyalıq huqıqlarınıń shekleniwine alıp keledi.
Sonday-aq, Bas nızamımızdıń 42-statyasına bola, hár kim múnásip miynet etiw, kásip hám jumıs túrin erkin tańlaw, jumıssızlıqtan nızamda belgilengen tártipte qorǵalıw huqıqına iye ekenligi názerde tutılǵan.
Jónelissiz taksi jumısı menen shuǵıllanıp atırǵan puqaralarımız ózin-ózi bánt etken adam sıpatında jumıssızlıqtan qorǵalıw huqıqınan paydalanǵan esaplanadı. Bunday adamlar nızamlarda belgilengen tártipte tiyisli licenziya alıp, tiyisli salıqlardı tólegen halda tolıq nızamlı jumıs alıp barmaqta.
«Joqarıdaǵılardan kórinip turǵanınday, jónelissiz taksilerge sheklew engiziwge hesh qanday huqıqıy tiykarlar joq. Kerisinshe, konstituciyalıq normalarǵa qayshı keletuǵın tárepleri anıq kórinip tur», delinedi XDP múnásibetinde.
Málim etiliwinshe, Oliy Majlis Nızamshılıq palatasındaǵı Ózbekstan XDP frakciyası Transport ministrinen bul máselede anıq túsinik beriw boyınsha soraw jibergen hám transport tarawındaǵı mashqalalardı saplastırıw boyınsha húkimet saatında deputatlardıń sorawlarına juwaplardı tıńlaw ushın Transport ministri mirát etilgen.

Umidjon Qurbonov tayarladı, ÓzA