Jeneva qalasında bolıp ótip atırǵan Xalıqaralıq miynet konferenciyasınıń 113-sessiyası sheńberinde 12-iyun – Pútkil jer júzilik balalar miynetine qarsı gúresiw kúni múnásibeti menen arnawlı konferenciya ótkerildi.
Ilajda Xalıqaralıq miynet konferenciyasına qatnasıp atırǵan 187 mámleket arasında qısqa waqıt ishinde balalar miyneti hám májbúriy miynetti pútkilley saplastırǵan mámleket sıpatında Ózbekstan tájiriybesi kórsetildi.
Ózbekstan Prezidenti Shavkat Mirziyoevtiń kúshli siyasiy erk-ıqrarı hám jeke baslaması menen bul illetke qarsı kórilip atırǵan qatań ámeliy ilajlar óziniń unamlı nátiyjesin berip atırǵanı atap ótildi.
Konferenciyada Oliy Majlis Senatınıń Baslıǵı, Adam sawdasına qarsı gúresiw hám múnásip miynet máseleleri boyınsha milliy komissiyanıń baslıǵı Tanzila Norboeva “Balalar miynetin saplastırıwda Ózbekstan tájiriybesi” atamasında bayanat jasadı.
Mámleketimizdiń balalar miyneti hám májbúriy miynetke qarsı qatań poziciyası jáne xalıqaralıq hújjetler, sonıń ishinde, Xalıqaralıq miynet shólkeminiń tiykarǵı konvenciyaları hám 29-sanlı Konvenciyaǵa Protokol ratifikaciyalanǵanı tarawǵa baylanıslı reformalardıń bekkem huqıqıy tiykarı bolǵanın atap ótti.
Jańa redakciyadaǵı Konstituciya hám Miynet kodeksi bolsa balalar miynetine pútkilley shek qoyıwǵa qaratılǵanı, hár bir puqaranıń sociallıq qorǵalıwın kepillew bolsa insan qádirin joqarılatıwǵa qaratılǵan mámleketlik siyasattıń orayınan orın alǵanı atap ótildi.
Konferenciya jumısında elimizde Xalıqaralıq miynet shólkeminiń tiyisli konvenciyaların ratifikaciyalaw, milliy nızamshılıqtı xalıqaralıq standartlar tiykarında jetilistiriw, balalar miyneti hám májbúriy miynet ushın juwapkershilik ilajların kúsheytiw, institucionallıq tiykarlardı bekkemlew baǵdarında ámelge asırılıp atırǵan jumıslar joqarı bahalandı.
Ilajda Xalıqaralıq miynet shólkemi, Xalıqaralıq kásiplik awqamları konferenciyası, Xalıqaralıq jumıs beriwshiler konferenciyası, YuNISEF hám Filippin, Marokko, CHili, Germaniya, Braziliya húkimetiniń wákilleri bayanat penen qatnastı.
Ekspertler búgingi kúnde Ózbekstan tájiriybesi balalar miyneti hám májbúriy miynetke qarsı gúres alıp barıp atırǵan mámleketler ushın model bolıp xızmet etip atırǵanın ayrıqsha atap ótti.
N.Abduraimova, ÓzA