Shańaraq hám hayal-qızlar komitetiniń baslıǵı Zulayho Mahkamova basshılıǵındaǵı “Mikrokreditbank” AKB wákilleri hám isbilermen hayal-qızlardan ibarat Ózbekstan delegaciyası Germaniya Federativlik Respublikasına rásmiy saparı sheńberinde bir qatar áhmiyetli ushırasıwlar ótkerdi. Hayal-qızlar isbilermenligi tarawında eki tárepleme birge islesiwdi keńeytiw boyınsha hújjetlerge qol qoyıldı.

Sapar Germaniyanıń “Sparkassenstiftung for International Development e.V.” hám mámleketimizdiń Germaniyadaǵı elshixanası járdeminde shólkemlestirildi. Onnan gózlengen tiykarǵı maqset isbilermen hayal-qızlardı qollap-quwatlaw baǵdarında birge islesiwdi rawajlandırıw, Germaniya institutları hám qorları menen tikkeley baylanıslardı ornatıw jáne finanslıq sawatlılıq hám biznesti basqarıw tarawında tájiriybe almasıw bolıp esaplanadı.
Ózbekstan delegaciyası Germaniya Ekonomikalıq birge islesiw hám rawajlanıw federal ministrligi, Ekonomika hám energetika ministrligi, Awıl hayal-qızları associaciyası, Qor kassalarınıń finanslıq toparı (Sparkassen-Finanzgruppe) hám basqa da tiyisli shólkemlerdiń wákilleri menen sóylesiwler ótkerip, bir qatar bank strukturalarınıń jumısı menen tanıstı.
Sapar etiw juwmaǵında áhmiyetli kelisimlerge qol qoyıldı. Atap aytqanda, “Mikrokreditbank” AKB, “Hamroh” kompaniyası hám “Sparkassenstiftung” qorı hayal-qızlardıń finanslıq sawatlılıǵın arttırıw, biznesti rejelestiriw kónlikpelerin rawajlandırıw hám maqsetli kreditlerdi alıwda járdem kórsetiwge qaratılǵan birgeliktegi baǵdarlamalardı jolǵa qoyıwǵa kelisip aldı. Bunnan tısqarı, hújjetler bilimlendiriw baǵdarlamaları hám qarjılandırıw mexanizmlerin, sonıń ishinde, grant hám subsidiyalı kredit liniyaların ámelge asırıwdı názerde tutadı.
Sonday-aq, “Hamroh” kompaniyası hám Germaniyanıń “West-Östliche Begegnungen” qorı arasında mádeniyatlararalıq qarım-qatnastı rawajlandırıw, hayal-qızlardıń jetekshiligin alǵa qoyıw hám hayal-qızlardıń jámiyetlik-siyasiy processlerdegi qatnasın keńeytiwge qaratılǵan kelisimge qol qoyıldı.
Ózbekstan delegaciyası wákilleriniń atap ótiwinshe, erisilgen kelisimler mámleketimizde hayal-qızlar isbilermenligin turaqlı rawajlandırıw ushın bekkem tiykar jaratıp, sociallıq-ekonomikalıq tarawda xalıqaralıq birge islesiwdi bekkemlewge xızmet etedi.

Aziza Alimova, ÓzA