Ózbekstan Respublikası Prezidenti Shavkat Mirziyoev Rossiya Federaciyası Prezidenti Vladimir Putin menen telefon arqalı sóylesti.

Sóylesiw aldınan mámleketimiz basshısı Rossiya jetekshisi hám kóp milletli xalqın jaqınlap kiyatırǵan mámleketlik bayramı – Rossiya kúni menen qızǵın qutlıqladı.

Ózbekstan menen Rossiya arasındaǵı keń kólemli strategiyalıq sheriklik hám awqamlaslıq qatnasıqların jáne de bekkemlew, joqarı dárejedegi ushırasıwlarda erisilgen kelisimlerdi ámelge asırıw sheńberinde kóp táreplemeli birge islesiwdi keńeytiw máseleleri kórip shıǵıldı.

Óz-ara tovar almasıw pátin saqlap qalıw hám sanaat kooperaciyası joybarların qollap-quwatlaw maqsetinde muwapıqlastırılǵan ilajlardı kóriwge ayrıqsha itibar qaratıldı.

Eki mámleket aymaqları dárejesindegi jedel almasıwlar hám ámeliy birge islesiwdi dawam ettiriw áhmiyetli ekenligi atap ótildi.

Sonday-aq, Ózbekstan hám Rossiya mádeniy ilajlar turaqlı túrde ótkerilip atırǵanı qanaatlanıwshılıq penen atap ótildi.

ÓzA