Mámleketimizde korporativ qatnasıqlardı rawajlandırıw hám zamanagóy korporativti basqarıw usılların engiziw boyınsha keń kólemli jumıslar alıp barılmaqta.

Akcionerlik jámiyetlerdiń atqarıw uyımları, baqlaw keńesleri aǵzalarınıń fiduciar minnetlemeleri, majoritar akcionerlerdiń ulıwma minnetlemeleri hám usı minnetlemeler boyınsha juwapkershilikti belgilewdi huqıqıy jaqtan tártipke salıw, nızamshılıqtı xalıqaralıq normalarǵa, sonıń ishinde, Jáhán sawda shólkeminiń kelisimlerine beyimlestiriw arqalı sırtqı sawdanı bunnan bılay da liberallastırıw zárúrligi júzege kelgen.
Bul Senattıń Byudjet hám ekonomikalıq máseleler komitetiniń májilisinde atap ótildi. Usınday jaǵdaylardı saplastırıw maqsetinde islep shıǵılǵan “Ózbekstan Respublikasınıń ayırım nızam hújjetlerine qosımshalar hám ózgerisler kirgiziw haqqında”ǵı nızam dodalandı.
Nızam menen “Akcionerlik jámiyetleri hám akcionerlerdiń huqıqların qorǵaw haqqında”ǵı nızamǵa akcionerlerdiń ulıwma minnetlemelerin jáne olardıń juwapkershiligin anıqlastırıwǵa qaratılǵan qosımshalar hám ózgerisler kirgizilmekte.
Bunnan tısqarı, bul nızam menen Bajıxana kodeksine eń qolaylılıq beriw rejimine iye bolmaǵan mámleketlerden Ózbekstanǵa alıp kelinip atırǵan tovarlar ushın tovardıń kelip shıǵıwı haqqındaǵı sertifikatlar bolmaǵan jaǵdayda import bajısın eki esege arttırıp qollanıw ámeliyatınıń biykar etiliwin názerde tutatuǵın ózgerisler kirgizilmekte.
Komitet aǵzaları ózleriniń shıǵıp sóylewlerinde bul nızam akcionerlik jámiyetleri basqarıw uyımlarınıń jáne majoritar akcionerdiń jámiyet hám basqa da akcionerlerdiń máplerin gózlep, hadal hám aqılǵa uǵras jumıs alıp barıwına, olardıń juwapkershiligin arttırıwǵa, sonday-aq, milliy nızamshılıq normaların Jáhán sawda shólkeminiń qaǵıydalarına muwapıqlastırıw esabınan sawdanı ádil qaǵıydalar tiykarında ámelge asırıwǵa, import hám eksport kólemin keńeytiwge xızmet etetuǵının atap ótti.

ÓzA