Tashkent qalasında Ózbekstan hám Ázerbayjan húkimetleri delegaciyalarınıń ushırasıwı bolıp ótti.

Ózbekstan Respublikası Bas ministri Abdulla Aripov hám Ázerbayjan Respublikası Bas ministri Ali Asadovtıń basshılıǵında ótken májiliste mámleketlerimiz basshıları tárepinen eki mámleket arasındaǵı strategiyalıq sheriklik hám awqamlaslıq qatnasıqların bunnan bılay da rawajlandırıw boyınsha belgilep berilgen áhmiyetli wazıypalardıń ámeliy orınlanıwın támiyinlew máseleleri kórip shıǵıldı.
Ilajda ellerimiz arasındaǵı nátiyjeli sóylesiwdi izbe-iz dawam ettiriw hám bunnan bılay da bekkemlewge ayrıqsha itibar qaratıldı. Bul tiykarǵı maqsetlerge erisiwde ótken jılı avgust ayında Ózbekstan Respublikası Prezidenti Shavkat Mirziyoev hám Ázerbayjan Respublikası Prezidenti Ilham Aliev tárepinen qol qoyılǵan Awqamlaslıq qatnasıqları haqqındaǵı shártnama áhmiyetli qollanba bolatuǵını atap ótildi.
Ózbekstan hám Ázerbayjan tek ǵana ulıwma tariyx, mádeniyat hám ruwxıy qádiriyatlardı birlestirgen emes, al barlıq baǵdarlarda birge islesiwdi izbe-iz rawajlandırıp atırǵan isenimli awqamlas mámleketlerge aylanǵan. Házirgi processte, álbette, mámleketlerimiz jetekshileri arasındaǵı shın júrekten doslıq, tuwısqanlıq baylanısları sheshiwshi áhmiyetke iye ekeni atap ótildi.
Haqıyqatında da, barlıq baǵdarlarda unamlı ósiw baqlanbaqta, baylanıslar izbe-iz rawajlanbaqta. Atap aytqanda, keyingi tórt jılda óz-ara sawda kólemi eki esege arttı. Ekonomikanıń túrli tarawlarında áhmiyetli birgeliktegi joybarlar ámelge asırılmaqta.
Májiliste mámleket basshıları eki mámleket húkimetleri aldına ámeliy birge islesiwdi bekkemlew boyınsha anıq wazıypalar belgilep bergeni, bul maqsetlerge erisiw ushın úlken potencial hám imkaniyat bar ekenligi atap ótildi. Sonday-aq, sawda, transport, energetika, sanaat kooperaciyası hám awıl xojalıǵı tarawlarındaǵı sheriklik kólemin bunnan bılay da keńeytiw, aymaqlararalıq baylanıslardı tereńlestiriw, mádeniy-gumanitarlıq baǵdardaǵı qatnasıqlardı bunnan bılay da rawajlandırıw boyınsha hár tárepleme pikir alısıldı.

Ǵayrat Xonnazarov, ÓzAnıń xabarshısı