Usı jıldıń 9-iyun kúni qol qoyılǵan jańa nızam menen ayırım nızam hújjetlerine ózgerisler hám qosımshalar kirgizildi. Bul haqqında Ádillik ministrligi xabar berdi.

Jınayat-processuallıq kodeksine kirgizilgen ózgeriske bola, gúmanlanıwshı, ayıplanıwshı yaki sudlanıwshı qálegen waqıtta úndemew huqıqınan paydalanıwı múmkin ekenligi belgilendi.
Sonday-aq, shaxstıń óz ayıbın tán alǵanlıǵı oǵan qarsı birden-bir dálil bolsa, ol ayıplı dep tabılıwı yaki jazaǵa tartılıwı múmkin emes ekenligi názerde tutıldı.
“Sudlar haqqında”ǵı nızamǵa kirgizilgen ózgerisler hám qosımshalarǵa bola, sudyalardıń belgili bir isler boyınsha esap bermeytuǵını belgilendi.
Bunnan tısqarı, sudyanı belgili bir istiń dodalawınan shetletiwge yaki onıń wákilliklerin toqtatıp turıwǵa, basqa lawazımǵa ótkeriwge tek ǵana nızamda belgilengen tártipte hám tiykarlarǵa bola jol qoyılatuǵını kórsetildi.
Bul nızam rásmiy járiyalanǵan kúnnen baslap kúshke kiretuǵının atap ótiw kerek,-dep málimleme beredi xs.uz saytı.

Qaraqalpaqstan xabar agentligi