Endi 12 mámleket puqaraları ushın AQShqa sayaxat etiw qadaǵan etiledi. Bul ilaj Donald Tramptıń birinshi prezidentlik múddetinde baslanǵan tartıslı «musılmanlarǵa qadaǵan etiw» siyasatınıń dawamı sıpatında bahalanbaqta.

Jańa qararǵa bola, Awǵanstan, Myanma, CHad, Kongo Respublikası, Ekvatorial Gvineya, Eritreya, Gaiti, Iran, Liviya, Somali, Sudan hám Yaman puqaralarınıń AQShqa kiriwi qatań qadaǵan etiledi. Sonıń menen birge Burundi, Kuba, Laos, Serra-Leone, Togo, Túrkmenstan hám Venesuela puqaralarına da qosımsha sheklewler engizilmekte. Tramp bul haqqındaǵı bildiriwinde: «Men mámleket hám xalıq milliy qáwipsizligi hám mápin qorǵaw ushın háreket etiwim kerek», – dep atap ótken.
Bul dizim 20-yanvar kúni, Tramp inauguraciyadan soń shıǵarılǵan párman tiykarında qáliplestirildi. Sol hújjet penen Mámleketlik xatker, Milliy qáwipsizlik departamenti baslıǵı hám Milliy razvedka direktorına ayırım mámleketlerden mámleketke kiriw qáwipsizlikke qáwip salmaytuǵının tallaw wazıypası júklenedi.
Tramp 2017-jıl yanvarda shıǵarǵan usıǵan uqsas pármanda da musılman xalqı kóp Irak, Siriya, Iran, Sudan, Liviya, Somali hám Yaman puqaralarınıń AQShqa kiriwi qadaǵan etilgen edi. Keskin narazılıqqa sebep bolǵan, máselen aeroportlarda kóterilislerge alıp kelgen sol qarardıń qayta kórip shıǵılǵan túrin Joqarǵı sud 2018-jılı maqullaǵan. Keyingi sheklewler Iran, Somali, Yaman, Siriya, Liviya, Arqa Koreya puqaraları hám Venesuela mámleketlik xızmetkerleri hám olardıń shańaraq aǵzaların qamtıp alǵan.
Tramp tárepdarları bul siyasattı qáwipsizlik kózqarasınan qorǵap, diniy yamasa milliy kemsitiwge tiykarlanbaǵanın atap kelmekte. Sınshılar bolsa qarardı insan huqıqına qayshı, dep esaplaydı.

K.Bekjanov, ÓzAnıń xabarshısı