Ózbekstan Respublikası Prezidenti Shavkat Mirziyoev Tashkent investiciyalıq forumında qatnasıw ushın mámleketimizge kelgen Lombardiya wálayatınıń gubernatorı Attilio Fontana basshılıǵındaǵı delegaciyanı qabılladı.
Lombardiya Italiyanıń xalıq sanı eń kóp hám iri aymaqlarınan biri bolip, Evropanıń ekonomikalıq jaqtan eń rawajlangan wálayatları qatarına kiredi.
Óz-ara paydalı birge islesiwdi, bárinen burın, sawda-ekonomikalıq hám investiciyalıq sheriklikti rawajlandırıwdıń ámeliy jaqları dodalandı.
Jaqında Samarqand qalasında Bas ministr Jorja Meloni menen bolıp ótken sóylesiwlerdiń nátiyjeleri, olar dawamında aymaqlararalıq baylanıslardı qollap-quwatlawǵa kelisip alınǵanı úlken qanaatlanıwshılıq penen atap ótildi.
Búgingi kúnde elimizde Lombardiya kompaniyaları menen birgelikte pomidor, shafran jetistiriw, toqıma emes gezleme hám trikotaj, azıq-awqat ónimlerin islep shıǵarıw boyınsha joybarlar tabıslı ámelge asırılmaqta. Tayar tekstil, avtoelektronika, qurılıs materialların islep shıǵarıw, sút hám miywe-ovoщ ónimlerin qayta islew, jámiyetlik transporttı rawajlandırıw hám basqa da joybarlar islep shıǵılmaqta.
Birgeliktegi joybarlar portfelin keńeytiw, Italiyanıń aldınǵı texnologiyaları hám investiciyaların Ózbekstan ekonomikasınıń túrli tarmaqlarına jáne de keńnen tartıw áhmiyetli ekenligi atap ótildi.
Milan qalasında Ózbekstannıń sanaat hám eksport potencialı kórgizbesin ótkeriw, sawda úyin ashıw hám “Uzbek Organic” brendi astında eksport liniyasın iske qosıwǵa kelisip alındı.
Mádeniy-gumanitarlıq almasıwdı keńeytiw maqsetinde 2026-jılı Milanda Ózbekstan muzeyleriniń kórgizbesin shólkemlestiriw máselesi úyrenilmekte.
Gubernator, óz gezeginde, Lombardiya isbilermen toparlarınıń joybarları menen baslamaları hár tárepleme qollap-quwatlanıp atırǵanı ushın Prezidentimizge shın júrekten minnetdarshılıq bildirdi. Ózbekstan aymaqları menen keń kólemli sheriklikti jolǵa qoyıwǵa hár tárepleme járdemlesiwge tayar ekenin tastıyıqladı.
Ushırasıw sońında mámleketimiz basshısı Attilio Fontanaǵa 2026-jılı Milan qalasında bolıp ótetuǵın qısqı Olimpiadaǵa tayarlıq kóriw hám onı ótkeriwde tabıslar tiledi.
ÓzA