Ózbekstan Respublikası Prezidenti Shavkat Mirziyoev 10-iyun kúni tórtinshi Tashkent xalıqaralıq investiciya forumı sheńberinde Ázerbayjan Respublikası Bas mnistri Ali Asadov, Qazaqstan Respublikası Bas ministri Oljas Bektenov, Qırǵız Respublikası Ministrler Kabineti Baslıǵı –Prezident Administraciyası basshısı Adilbek Kasımaliev, Tájikstan Respublikası Bas ministri Qohir Rasulzoda, Rossiya Federaciyası Húkimeti Baslıǵınıń orınbasarı Aleksandr Novak, Túrkmenstan Ministrler Kabineti Baslıǵınıń orınbasarı Nokerguli Atagulievti qabılladı.

Ázerbayjan Respublikası Bas ministri Ali Asadov penen ushırasıw aldınan Ózbekstan jetekshisine Ázerbayjan Prezidenti Ilham Alievtiń sálemi menen eń jaqsı tileklerin jetkerdi.
Ózbekstan menen Ázerbayjan arasındaǵı doslıq, strategiyalıq sheriklik hám awqamlaslıq qatnasıqların jáne de keńeytiw hám bekkemlewdiń áhmiyetli máselelerin kórip shıqtı.
Ekonomikalıq kooperaciya jılı sheńberinde birgelikte nátiyjeli jumıslar ámelge asırılıp atırǵanı qanaatlanıwshılıq penen atap ótildi. Tovar almasıw kólemi artpaqta, ekonomikanıń túrli tarmaqlarında, sonıń ishinde, birgeliktegi Investiciya kompaniyası járdeminde ámelge asırılıp atırǵan kooperaciya joybarları qızǵın alıp barılmaqta. Mádeniy-gumanitarlıq almasıwlar jedel dawam etpekte.
Erisilgen kelisimlerdiń orınlanıwın qadaǵalaw hám bolajaq joqarı dárejedegi ushırasıw ushın jańa baslamalardı alǵa qoyıw maqsetinde húkimetler dárejesinde tıǵız birge islesiwdi dawam ettiriw áhmiyetli ekeni atap ótildi.
Usı mániste, Húkimetleraralıq komissiyanıń gezektegi májilisi hám eki mámleket aymaqları forumnıń joqarı nátiyjeliligin támiyinllew kerek ekenligi kórsetip ótildi.
Qazaqstan Respublikası Bas ministri Oljas Bektenov mámleketimiz basshısına Qazaqstan Respublikası Prezidenti Qasım-Jomart Toqaevtıń sálemi hám jaqsı tileklerin jetkerdi.
Joqarı dárejedegi ushırasıwlarda erisilgen kelisimler sheńberinde Ózbekstan-Qazaqstan strategiyalıq sheriklik hám awqamlaslıq qatnasıqların jáne de rawajlandırıw hám bekkemlewdiń áhmiyetli máseleleri dodalandı.
Tovar almasıw turaqlı artıp baratırǵanı qanaatlanıwshılıq penen atap ótildi. Avtosanaat, elektrotexnika, toqımashılıq, metallurgiya, farmacevtika, qurılıs, awıl xojalıǵı tarmaqlarında joybarlar tabıslı ámelge asırılmaqta.
Óz-ara sawdanı kóbeytiw hám tiykarǵı tarmaqlarda, sonıń ishinde, aymaqlar dárejesinde sanaat kooperaciyasınıń uzaq múddetli baǵdarlamasın qáliplestiriw boyınsha eki mámleket húkimetleri tárepinen muwapıqlastırılǵan ilajlardıń kóriliwi áhmiyetli ekeni atap ótildi.
Qırǵız Respublikası Ministrler Kabinetiniń Baslıǵı – Prezident Administraciyasınıń basshısı Adilbek Kasimaliev mámleketimiz basshısına Qırǵız Respublikası Prezidenti Sadir Japarovtıń sálemi hám eń jaqsı tileklerin jetkerdi.
Ózbekstan menen Qırǵızstan arasındaǵı doslıq hám keń kólemli strategiyalıq sheriklik qatnasıqların jáne de bekkemlew, sawda kólemin arttırıw, sanaat kooperaciyasın keńeytiw, aymaqlararalıq baylanıslar hám mádeniy-gumanitarlıq almasıwdı jedellestiriw máseleleri kórip shıǵıldı.
Energetika hám transport kommunikaciyalarındaǵı iri regionallıq joybarlardı, sonıń ishinde, Qambarata GES-1 hám “Qıtay-Qırǵızstan-Ózbekstan” temir jolınıń qurılısın jedellestiriwge ayrıqsha itibar qaratıldı.
Usı jılı ótkeriletuǵın Húkimetleraralıq komissiya hám Aymaqlar basshıları keńesiniń gezektegi májilislerin nátiyjeli shólkemlestiriw kerek ekenligi atap ótildi.
Tájikstan Respublikası Bas ministri Qohir Rasulzoda mámleketimiz basshısına Tájikstan Respublikası Prezidenti Emomali Rahmonnıń sálemi hám eń jaqsı tileklerin jetkerdi.
Ózbekstan – Tájikstan doslıq, jaqsı qońsıshılıq, strategiyalıq sheriklik hám awqamlaslıq qatnasıqların joqarı dárejedegi kelisimlerdiń orınlanıwı sheńberinde bunnan bılay da bekkemlewdiń áhmiyetli máseleleri kórip shıǵıldı.
Kóp táreplemeli birge islesiwde joqarı dárejege ersilgeni qanaatlanıwshılıq penen atap ótildi. Tovar almasıw hám júk tasıw kólemi artpaqta, sanaat, energetika, elektrotexnika, toqımashılıq, awıl xojalıǵı hám basqa tiykarǵı tarmaqlarda kooperaciya joybarları ámelge asırılmaqta.
Nátiyjeli aymaqlararalıq baylanıslar hám jedel mádeniy-gumanitarlıq almasıw jolǵa qoyılǵan.
Sherikliktiń jańa ekonomikalıq kún tártibin qáliplestiriw, tovar almasıw kóbeytiw boyınsha tásirsheń ilajlardı islep shıǵıw, kooperaciya hám shegaraaldı birge islesiw joybarların belsene alǵa qoyıw áhmiyetli ekeni atap ótildi.
Rossiya Federaciyası Húkimeti Baslıǵınıń orınbasarı Aleksandr Novak mámleketimiz basshısına Rossiya Prezidenti Vladimir Putinniń sálemi hám jaqsı tileklerin jetkerdi hám forum tabıslı ótip atırǵanı menen qutlıqladı.
Ótken jılı may ayında Rossiya jetekshisiniń Ózbekstanǵa mámleketlik sapar hám joqarı dárejedegi basqa sóylesiwler dawamında erisilgen kelisimlerdi ámelge asırıw máseleleri kórip shıǵıldı.
Energetika tarawındaǵı óz-ara paydalı birge islesiwdi keńeytiw, neft-gaz tarmaǵındaǵı birgeliktegi joybarlardı jedellestiriw, tınısh atom tarawında birge islesiwdi jáne de rawajlandırıwǵa ayrıqsha itibar qaratıldı.
Túrkmenstan Ministrler Kabineti Baslıǵınıń orınbasarı Nokerguli Ataguliev mámleketimiz basshısına Túrkmenstan Prezidenti Serdar Berdimuhamedov hám Túrkmen xalqınıń milliy jetekshisi, Xalıq Másláháti Baslıǵı Gurbanguli Berdimuhamedovtıń sálemi hám eń jaqsı tileklerin jetkerdi.
Ózbekstan menen Túrkmenstan arasındaǵı doslıq, jaqsı qońsıshılıq hám strategiyalıq sheriklik qatnasıqların bunnan bılay da rawajlandırıw hám bekkemlewdiń áhmiyetli máseleleri kórip shıǵıldı.
Sawda-ekonomikalıq, transport-kommunikaciya, energetika, suw xojalıǵı tarawlarında keń kólemli birge islesiwdiń jańa kún tártibin qáliplestiriw, ekonomikanıń túrli tarmaqlarında kooperaciyanı kúsheytiw máselelerine ayrıqsha itibar qaratıldı.
Bolajaq Aymaqlar forumı hám birgeliktegi isbilermenlik hám mádeniy ilajlarǵa puqta tayarlıq kóriw kerek ekenligi atap ótildi.

ÓzA