10-iyun kúni Kóksaray rezidenciyasında mámleketimizge rásmiy sapar menen kelgen Bolgariya Respublikası Prezidenti Rumen Radevti rásmiy kútip alıw máresimi boldı.

Rezidenciya aldındaǵı maydanda eki mámlekettiń mámleketlik bayraqları kóterildi, húrmetli qarawıl sap tarttı.
Prezidentimiz joqarı mártebeli miymandı qızǵın kútip alıp, minberge mirát etti.
Mámleket gimnleri jańladı. Áskeriy orkestr hawazları astında jetekshiler húrmetli qarawıl qatarı aldınan ótip, rásmiy delegaciyalar aǵzaların qutlıqladı.
Soń, Ózbekstan Respublikası Prezidenti Shavkat Mirziyoevtiń hám Bolgariya Respublikası Prezidenti Rumen Radevtiń rásmiy delegaciyalar qatnasıwındaǵı sóylesiwleri bolıp ótti.
Ózbekstan menen Bolgariya arasındaǵı ámeliy birge islesiwdi jáne de rawajlandırıwdıń áhmiyetli máseleleri kórip shıǵıldı.
Eki mámleket arasındaǵı diplomatiyalıq qatnasıqlar 1992-jılı ornatılǵanın atap ótiw zárúr. Sońǵı jıllarda joqarı dárejedegi eki tárepleme qatnasıqlar jedellesti.
Mámleketimiz basshısı Bolgariya jetekshisin qızǵın qutlıqlap, sońǵı 17 jıldaǵı birinshi sammit tariyxıy áhmiyetke iye ekenin, Ózbekstan – Bolgariya doslıq hám sheriklik qatnasıqların sapa jaǵınan jańa dárejege alıp shıǵatuǵının atap ótti.
Parlamentler, ekonomika hám sırtqı siyasat uyımları arasındaǵı birge islesiw jedelleskeni úlken qanaatlangıwshılıq penen atap ótildi.
Tovar almasıw kórsetkishleri óspekte, kooperaciyanıń jańa baǵdarları hám joybarları islep shıǵılmaqta.
Gumanitarlıq almasıwlar ámelge asırılmaqta, Buxara hám Varna, Samarqand hám Plovdiv arasında jaqınlıq qatnasıqları ornatılǵan.
Kóp táreplemeli birge islesiwdi jáne de bekkemlew maqsetinde sırtqı siyasat uyımları arasında sistemalı qatnasıqlardı jolǵa qoyıw áhmiyetli ekenligi atap ótildi.
Sawdanı, bárinen burın, toqımashılıq, azıq-awqat, ximiya hám farmacevtika ónimleri, metall búyımlar hám texnologiyalıq úskeneler jetkerip beriwdi keńeytiw arqalı kóbeytiw máselelerine ayrıqsha itibar qaratıldı.
Óz-ara sawdanıń ósiwin xoshametlew maqsetinde paytaxtlarda sawda úylerin ashıw, laboratoriyalardı akkreditaciyadan ótkeriw hám jeńillikli kredit liniyaların ajıratıw haqqında qarar qabıl etildi.
Agrosanaat kompleksi hám azıq-awqat sanaatı, farmacevtika, geologiya, jasalma intellekt, sanlı texnologiyalar hám IT, turizm tarawlarında birgeliktegi joybarlardı alǵa qoyıw tiykarǵı baǵdar sıpatında atap ótildi.
Nátiyjeli jer ústi hám hawa transport koridorların rawajlandırıw máselelerine ayrıqsha itibar qaratıldı. Usı mániste, tárepler eki mámleket arasında tikkeley aviaqatnawlardı jolǵa qoyıw imkaniyatın kórip shıǵıwǵa kelisip aldı.
Miynet resursları tarawında sistemalı birge islesiwdi jolǵa qoyıw ushın Sofiya qalasında Ózbekstan Respublikası Migraciya agentliginiń wákilxanasın ashıw máselesi kórip shıǵıladı.
Gumanitar baylanıslardı, sonıń ishinde, akademiyalıq hám ilimiy almasıwlardı jedellestiriw, usı jılı Ándijan qalasında jetekshi joqarı bilimlendiriw mákemeleri rektorlarınıń ushırasıwın ótkeriw baslamaları qollap-quwatlandı.
Sonday-aq, kelesi jılı Ózbekstan hám Bolgariya mádeniyatı hám kinosı hápteligin shólkemlestiriwge kelisip alındı.
Erisilgen kelisimlerdiń orınlanıwı ústinen sistemalı qadaǵalawdı támiyinlew maqsetinde tárepler birgeliktegi “jol kartası”n qabıl etiw hám Húkimetleraralıq komissiyalardıń járdemshi baslıqlarınıń dárejesin arttırıw, onıń jumısına aymaqlar hám iri kompaniyalardıń basshıların tartıwǵa wádelesildi.
Ushırasıw juwmaǵında Prezident Rumen Radev Prezident Shavkat Mirziyoevti ózi ushın qolaylı waqıtta juwap saparı menen Bolgariyaǵa barıwǵa usınıs etti.
Tashkent qalasında bolıp ótken sóylesiwler juwmaǵında Ózbekstan Respublikası Prezidenti Shavkat Mirziyoev hám Bolgariya Respublikası Prezidenti Rumen Radev Eki tárepleme birge islesiwdi keńeytiw haqqında birgeliktegi deklaraciyaǵa qol qoydı.
Jetekshiler janında eki tárepleme hújjetler, sonıń ishinde, Sırtqı isler ministrlikleri arasında 2026-2027-jıllarǵa mólsherlengen birge islesiw baǵdarlaması jáne Tashkent hám Sofiya qalaları arasında sheriklik qatnasıqların ornatıw haqqındaǵı kelisim almasıldı.
Joqarı dárejedegi sóylesiwler juwmaǵında Kóksaray rezidenciyasında terek egiw máresimi boldı.
Prezidentler Shavkat Mirziyoev hám Rumen Radev xalıqlarımız doslıǵı hám birge islesiwi, eki tárepleme qatnasıqlar tariyxında jańa bet ashıwǵa birdey umtılıstıń kórinisi sıpatında Húrmetli miymanlar qıyabanına terek ekti.
Usı kúni joqarı mártebeli miyman “Jańa Ózbekstan” parkine barıp, Ǵárezsizlik monumentine gúl qoydı.
Rumen Radev usı sawlatlı baǵdıń qurılıs tariyxı menen tanıstı. Monumentte sáwlelendirilgen ullı oyshıllar, qaharman sárkarda hám jáhángirler, jadid babalarımız haqqında aytıp berildi.
Delegaciya aǵzaları “Jańa Ózbekstan” kompleksiniń ideyalıq hám arxitekturalıq sheshimlerine itibar qarattı. Bul jerdegi baǵ – siyrek ushırasatuǵın terek hám gúller, amfiteatr, fontanlardıń únlesligi atap ótildi.
Bolgariya Respublikası Prezidenti Rumen Radevtiń Ózbekstanǵa rásmiy saparı dawam etpekte.

Ziyodulla JONIBEKOV,
ÓzA