Parlament tómengi palatasınıń májilsinde jumıs waqtınan tısqarı miynetke haqı tólew hám onıń dawamlılıǵın ápiwayılastırıwǵa qaratılǵan nızam joybarı ekinshi oqılıwda kórip shıǵıldı. Bul hújjet boyınsha Nızamshılıq palatası Miynet, densawlıqtı saqlaw hám sociallıq máseleler komitetiniń baslıǵı Nazira Muxtarova tolıq aytıp berdi.

Atap ótilgenindey, usı nızam joybarı menen jumıstıń bir kúnde birinshi eki saatına keminde 1,5 esesi muǵdarında, eki saattan artıq bólegine keminde 2 ese muǵdarında (miynet sharayatları qolaysız bolǵan jumıslarda – hár bir saatı ushın keminde eki ese muǵdarında) haqı tóleniwi belgilenbekte.
Sonday-aq, jumıstan tısqarı jumıstıń dawamlılıǵı xızmetker ushın izbe-iz eki kún dawamında tórt saattan (miynet sharayatları qolaysız bolǵan jumıslarda – bir kúnde eki saattan) aspawı kerek ekenligi názerde tutılmaqta.
Sonday-aq, xızmetkerlerdiń qosımsha dáramat alıw imkaniyatın támiyinlew hám olardı rásmiy emes jumıs waqtınan tısqarı jumıslarǵa tartıw jaǵdayların azaytıw maqsetinde nızam joybarında jumıs waqtınan tısqarı miynet etiw dawamlılıǵın jılına 120 saat penen sheklewshi normanı biykarlaw usınıs etilmekte.
Jumıs waqtınan tısqarı jumıstıń dáramatları tallanǵanda, 5 kúnlik jumıs isleytuǵın xızmetkerdiń dáramatları jıllıq limit belgilengenine salıstırǵanda 2,8 esege, 6 kúnlik jumıs isleytuǵınlardıń dáramatı bolsa 3,8 esege artıwı múmkin ekenligi anıqlandı.
Dodalawlar dawamında bul nızam joybarınıń qabıl etiliwi puqaralardıń miynet huqıqları kepillikleriniń támiyinleniwine, shólkemlerde jumıs ónimdarlıǵın arttırıw hám xızmetkerlerdiń dáramatlarınıń kóbeyiwine xızmet etetuǵını ayrıqsha atap ótildi.

Muhtarama Komilova, ÓzA