Oliy Majlis Nızamshılıq palatasındaǵı Ózbekstan Ekologiyalıq partiyası frakciyasınıń gezektegi májilisinde bir qatar nızam joybarları dodalandı. Sonıń ishinde, Ózbekstan Respublikasınıń Miynet kodeksine ózgerisler kirgiziw haqqındaǵı nızam joybarı dodalawlar orayında boldı.

Atap ótilgenindey, bul nızam joybarında miynet qatnasıqlarındaǵı huqıqıy kepillikler, miynetti qorǵaw hám jumısshılardıń máplerin támiyinlewge qaratılǵan normalar názerde tutılǵan. Jumısshı-xızmetkerlerdiń máplerin, nızamlı huqıqların qorǵawǵa qaratılǵan normalar deputatlar tárepinen qızǵın dodalanıp, usınıslar berildi.
Sonday-aq, májiliste kelispewshiliklerdi táreplerdiń óz-ara kelisiwi tiykarında sheshiw, yaǵnıy mediaciya institutın jetilistiriwge qaratılǵan nızam joybarı da hár tárepleme dodalandı.
Atap ótilgenindey, búgingi kúnde sudlarda jumıs kólemi artıp barmaqta. Sonıń ishinde, 2023-jılı puqaralıq sud isleri 2021-jılǵa salıstırǵanda 46 procentke artqan. Bul bolsa sud uyımlarına jumıs júgin arttırıw menen birge xalıqqa da artıqsha waqıt hám áweregershilik penen baylanıslı mashqalalardı tuwdırmaqta.
Maǵlıwmatlarǵa qaraǵanda, Amerika hám Evropa mámleketlerinde kelispewshiliklerdi mediaciya jolı menen sudqa shekem sheshiw ulıwma islerdiń 80 procentin quraydı. Ózbekstanda bolsa bul kórsetkish puqaralıq islerde 0,2 procentti, ekonomikalıq islerde bolsa tek ǵana 1,8 procentti quraydı.
Bul nızam joybarında mediaciya tártip-qaǵıydaların qollanıw ushın xoshametlewshi normalar, mediatorlarǵa baylanıslı talaplar hám mediativ kelisimlerdi orınlaw qaǵıydaları kelispewshiliklerdi alternativ sheshiw mexanizmlerinen biri sıpatında belgilenbekte.
Joybardıń qabıl etiliwi kelispewshiliklerdi nátiyjeli hám operativ sheshiwge, mediaciya tártip-qaǵıydalarınıń barlıq orınlarda qollanılıwın xoshametlew arqalı sudlardaǵı júklemeni optimallastırıwǵa xızmet etedi.

M.Komilova, ÓzA