Ózbekstan Respublikası Korrupciyaǵa qarsı gúresiw agentligi, Baltıq ǵalaba xabar quralların rawajlandırıw orayı hám Riga joqarı yuridikalıq mektebi menen birgelikte jergilikli hám xalıqaralıq ekspertler tárepinen ǵalaba xabar quralları, blogerler, baspasóz xatkerleri, studentler ushın trening ótkerildi.

Bul ilaj Evropa Awqamı hám Germaniya ekonomikalıq birge islesiw hám rawajlanıw federal ministrligi (VMZ) tárepinen qarjılandırılıp atırǵan «Ózbekstanda mámleketlik basqarıwdı jetilistiriw, korrupciyanıń keń kólemli aldın alıw» joybarı sheńberinde shólkemlestirildi.
Ilajdıń ashılıwında Latviya Respublikasınıń Ózbekstandaǵı Ayrıqsha hám tolıq huqıqlı elshisi Reynis Troksha, Baltıq ǵalaba xabar quralların rawajlandırıw orayınıń atqarıwshı direktorı Gunta Sloga, Korrupciyaǵa qarsı gúresiw agentligi málimleme xızmetiniń basshısı Sherzod Saparov korrupciyaǵa qarsı gúresiwde, bul illettiń aldın alıwda ǵalaba xabar quralları áhmiyetli orın ieleytuǵının atap ótti. Olardıń bilim hám potencialın arttırıw arqalı korrupciyanı saplastırıw seminardan gózlengen tiykarǵı maqset bolıp esaplanadı.
Sorastırıw jurnalistikası boyınsha xabardarlıq hám kónlikpelerdi arttırıwǵa qaratılǵan dáslepki treningte qatnasıwshılarǵa jurnalistlik sorastırıw tiykarları, korrupciyalıq jaǵdaylardı anıqlawda jurnalistlik sorastırıwdıń ornı, ǵalaba xabar quralları hám internet arqalı korrupciyanıń aldın alıw hám hadallıqtı qáliplestiriwde ózine tán mexanizmler haqqında tolıq maǵlıwmat berildi.
Xalıqaralıq ekspertler media wákilleri menen korrupciyaǵa baylanıslı materiallar tayarlawda maǵlıwmatlar toplaw, olardan paydalanıw, tallaw hám jámiyetshilikke jetkeriwde nızamshılıq talapları hám kásiplik etikasına ámel etiw boyınsha óz tájiriybesi menen ortaqlastı.
Qatnasıwshılar jurnalistlik sorastırıw alıp barıwda taraw wákilleri ushın ámeldegi kepillikler, jurnalistlerdiń qorǵalıwı, sorastırıwda itibar qaratılıwı kerek bolǵan tiykarǵı tárepler, korrupciyaǵa baylanıslı jurnalistlik materiallardı tayarlawda jasalma intellekt imkaniyatlarınan paydalanıw boyınsha ózlerin qızıqtırǵan sorawlarǵa juwap aldı hám óz-ara pikir alıstı.
Jurnalistlik sorastırıw alıp barıwda faktlerdi durıs tallaw hám talqılaw, obektivlik hám ashıq-aydınlıqtı támiyinlew hár qıylı keysler hám ámeliy shınıǵıwlar mısalında kórip shıǵıldı.

N.Abduraimova,
N.Haydarov (súwret), ÓzA