IV Tashkent xalıqaralıq investiciya forumı sheńberinde Ózbekstan – Slovakiya biznes-forumı ótkerildi. Ilaj bar qatnasıqlardı tereńlestiriw, jańa birge islesiw tarawların úyreniw hám ekonomikalıq birge islesiwdi rawajlandırıw ushın bekkem tiykar jaratatuǵın áhmiyetli platforma bolıp esaplanadı.

Sırt elli delegaciyanıń belsendiligi Slovakiya tárepinen respublikamız benen birge islesiwdi rawajlandırıwǵa qızıǵıwshılıq joqarı ekenligin jáne bir márte tastıyıqladı. Forum bolsa isbilermenlerge sheriklikti bekkemlew ushın jáne de keń imkaniyat jarattı.
Ózbekstan Respublikası investiciyalar, sanaat hám sawda ministriniń orınbasarı Shohrux Ǵulomov Slovakiya hám Ózbekstan qatnasıqları 2024-jıl sezilerli dárejede jedelleskenin atap ótti. Óz-ara sawda muǵdarı 72,5 million evroǵa jetip, 2023-jılǵa salıstırǵanda 48,8 procent artqan.
Házir elimizde usı mámlekettiń 19 kompaniyası jumıs islemekte. Demek, bul san bar eki tárepleme potencialdı sáwlelendirmeydi. Usı kózqarastan miymanlar mámleketimiz bazarındaǵı ornın bekkemlew hám keńeytiwge ayrıqsha qızıǵıwshılıq bildirgeni itibarlı.
Máselen, AZC, OFZ, “Rokosan”, “Matador” kompaniyaları mashina qurılısı, metallurgiya, infrastruktura, awıl xojalıǵı, azıq-awqat sanaatı hám energetika tarawlarında bay tájiriybege iye. Slovakiya eksportında tiykarǵı orındı shina, avtomobil bólekleri, metall buyımlar iyeleydi. Birge islesiwshiler elimizden gúrish, miywe, kiyim-kenshek import etiw boyınsha bir qatar baslamalardı alǵa qoydı. Usı unamlı ózgerisler eksportın 54,8 procent ósirip, importtı 3,5 procent azaytatuǵını atap ótildi.
Ózbekstan regionda investiciya, innovaciya hám rawajlanıw ushın tartımlı oray bolıp qalmaqta. Hár eki tárep keleshekte qatnasıqlarımızdı jáne de tereńlestirip, birgeliktegi joybarlardı ámelge asırıw arqalı ekonomikalıq birge islesiwde jańa shekler ashıw ushın tayar ekenligin bildirdi.
Forum sheńberinde kóplegen kelisimlerge qol qoyıldı. B2B hám G2B formatında shólkemlestirilgen sóylesiwler dawamında biznes qatnasıqlar ornatıw, sherikliktiń perspektivalı baǵdarların dodalaw imkaniyatı payda boldı. Ilaj juwmaǵında mashina qurılısı, farmacevtika, ximiya, transport, qurılıs materialları, awıl xojalıǵı, energetika, azıq-awqat sanaatı, málimleme texnologiyaları, densawlıqtı saqlaw hám metallurgiya tarawlarındaǵı 15 joybar boyınsha hújjetler qabıl etildi.

Behruz Xudoyberdiev, Rustam Nazarmatov (súwret), ÓzA