Qaraqalpaqstan Respublikası Salıq basqarması tárepinen aymaqlarda kishi hám orta biznesti bunnan bılay da rawajlandırıw, bul baǵdarda olardıń jumısına tosqınlıq etip atırǵan mashqalalardı saplastırıw maqsetinde isbilermenler menen ashıqtan-ashıq sóylesiwler ótkerilmekte. Usınday ushırasıwlardıń gezektegisi Beruniy rayonında bolıp ótti.

Ushırasıwdan maqset – kishi hám orta biznes wákilleriniń salıq tarawındaǵı mashqala hám usınısları menen sheklenip qalmastan, basqa tarawlarda da ushırasıp atırǵan mashqala hám usınıslardı úyrenip, tiyisli mákemeler birgelikte unamlı sheshimin tabıwdan ibarat.
Júzbe-júz, ashıqtan-ashıq ótkerilgen sáwbetlesiwde salıq basqarması basshıları qatnasıp, kishi hám orta biznesti jáne de rawajlandırıw, bul baǵdarda usı tarmaq wákillerine berilgen jeńillikler hám salıq jeńillikleri, sonday-aq, salıq uyımları tárepinen jasırın ekonomikanıń aldın alıw, rásmiy emes isbilermenlik jumısın sayadan alıp shıǵıw baǵdarında ámelge asırılıp atırǵan jumıslarǵa toqtap ótip, isbilermenlerge salıq jeńillikleri haqqında tolıq túsinikler berildi.
Atap ótilgenindey, Prezidentimizdiń basshılıǵında usı jıldıń 19 mart kúni kishi hám orta biznes wákilleri menen tarawdıń ekonomikadaǵı úlesin arttırıw hám rawajlanıwın jańa basqıshqa alıp shıǵıw máselelerine baǵıshlanǵan ushırasıwı bolıp ѳtip, bir qatar wazıypalar belgilendi.
Búgingi kúnde Qaraqalpaqstan Respublikasında 2025 jıl 1-yanvar sánesine 34574 (sonnan, 16 91 mikrofirma, 1 471 kishi kárxana, 16 312 jeke isbilermenler) kishi hám orta biznes wákilleri isbilermenlik penen shuǵıllanıp atır.
Sonnan, Beruniy rayonında 4137 (sonnan, 2 090 mikrofirma, 140 kishi kárxana, 1 907 jeke isbilermenler) kishi hám orta biznes wákilleri isbilermenlik penen shuǵıllanbaqta.
Qaraqalpaqstan Respublikası byudjet dáramatlarına 2024 jıl ushın belgilengen 2 trln. 837 mlrd. sum prognoz kórsetkishi jıl juwmaǵı menen 3 trln. 30 mlrd. sumǵa (106,8%) orınlanıp, byudjetke qosımsha 192 mlrd. sum túsim boldı yamasa byudjetke túsimler 2023 jılǵa salıstırǵanda 120 procentke, yaǵnıy 500 mlrd. sumǵa ósti.
Sonnan Beruniy rayonında byudjet dáramatlarına 2024 jıl ushın belgilengen 57,7 mlrd. sum prognoz kórsetkishi jıl juwmaǵı menen 62,5 mlrd. sumǵa (108,3%) orınlanıp, byudjetke qosımsha 4,8 mlrd. sum túsim támiynlendi yamasa 2023 jılǵa salıstırǵanda 123 procentke, yaǵnıy 11,6 mlrd. sumǵa ósim boldı.
Kishi hám orta biznestiń jedel rawajlanıwı ushın qolaylı sharayatlar jaratıw, aymaqlarda biznes ortalıǵın jáne de jaqsılaw, ekonomikalıq ósiwge túrtki beretuǵın jańa biznes baslamaların ámelge asırıwǵa járdemlesiw, básekige shıdamlı ónimler menen jańa sırtqı bazarlarǵa shıǵıwdı qollap quwatlaw maqsetinde Prezidentimizdiń usı jıl 19 mart kúni PP 50 sanlı pármanı qabıl etildi.
Usı párman menen 2025 jıl 1 maydan baslap “ózin ózi bánt etken puqara jeke tártiptegi isbilermen kishi biznes orta biznes iri kárxana” shınjırı tiykarında isbilermenlik subektleriniń irileniwin xoshametlew boyınsha mexanizmler engizildi. Atap aytqanda, ózin ózi bánt etken puqaralar jeke tártiptegi isbilermen yamasa yuridikalıq shaxs sıpatında mámleketlik dizimnen ótkerilgende mámleketlik bajı óndirilmeydi, óz jumısın jeke tártiptegi isbilermen, mikrofirma yamasa kishi kárxana kategoriyasına shekem irilendirgen ózin ózi bánt etken puqaralar hám isbilermenlik subektlerine shańaraqlıq isbilermenlikti rawajlandırıw baǵdarlaması sheńberinde 50 million sumǵa shekem, kishi biznesti úzliksiz qollap quwatlaw kompleksli baǵdarlaması sheńberinde 150 million sumǵa shekem girewsiz kreditler beriledi.
Óz jumısın orta yamasa iri biznes kategoriyasına shekem irilendirgen isbilermenlik subektlerine bir jıl dawamında qosımsha qun salıǵı summasınıń ornın qaplaw (qaytarıw) jeti kún múddette tezlestirilgen tártipte ámelge asırıladı.
Usı párman menen isbilermenlik subektlerin qollap-quwatlaw boyınsha bir qatar salıq jeńilikleri de berilgen.
Bul ózgerisler álbette, elimizde isbilermenlerdiń sanın kóbeyip, jańa jumıs orınlarınıń jaratılıwına hám ekonomikamızdıń rawajlanıwına tiykar boladı.
Ushırasıwda isbilermenlerdiń mashqalaları, pikir-usınısları tıńlanıp, olar ózlerin qızıqtırǵan sorawlarǵa juwap aldı.
Isbilermenler menen ushırasıwlar orınlarda dawam etpekte.

Á.Jiyemuratov,
Qaraqalpaqstan xabar agentligi.